Press "Enter" to skip to content

Pynneh pynsah ïaki Mrad Khlaw ban kyntiew ïaka kam jngohkai: Lahkmen Rymbui

Jowai, Risaw 09: U Myntri ka tnad Kam Khlaw, Pule Puthi bad kiwei Ma Lahkmen Rymbui ula ong ba “Ka donkam bha ban tyngkai bad ban pynneh pynsah ïaki khlaw ki btab bad ki mrad mreng ban kyntiew ïaka kam jngohkai haka jylla baroh kawei”. “Ka Jylla Meghalaya ka dei kaba riewspah bha haka jingdon ki mrad mreng, hynrei mynta kine ki mrad mreng kila don haka jingma bad ki lah ban duh jait namar ka jinglalot jong u briew”, la ong u ma Lahkmen haba kren haka jingïalang pynkut noh ïaka prokram Wildlife Week jong Wildlife Wing ka tnad Kam Khlaw ka Jylla ha ïing hall ka Syiem Jingsuk Secondary School, Amlarem.
U ma Lahkmen ong “Mynta ka Jylla ka don haduh 1750 tylli ki Hati, 5500 jait ki mrad, haduh 540 jait ki dei tang ki jait sim, 33 jait ki jakoid, 3000 ki syntiew ki skud, 4580 ki jait mrad ba don budlum (vertebrate), 1235 jait tang ki jingthung kiba long kyrpang haka kane ka jylla, 94 ki jait bseiñ bad kiwei kiwei ki jait jingthaw ba im”.
Haba kren shuh shuh u Myntri ka Kam Khlaw, ula ka ri War Jaiñtia ruh ka dei kaba riew spah haka jingdon ki mrad ki mreng, ki syntiew ki skud, ki kynbat bad kiwei kiwei, hynrei mynta kila nang nang duh namar ba ngi briew ngim don ka jingkitkhlieh ban sumar ïaka sawdong sawkun ka mariang. “Wat ka jinglehniam Rongkhli kaba pyndep da ka Raij Nongtalang ka dei kaba pyrshah ïaka aiñ Wildlife Protection Act namar ba hap lehniam da u ‘la Thabasim” la ong u ma Lahkmen.
Baroh ki jingthaw ba im ki don ka hok ban im, kumta ngi ki briew ngi dei ban don ka jingkitkhlieh ban ïada ïaka sawdong ka sawkun jong ki ban suk ban saiñ ka pateng kaba mynta bad kaban wan, la ong u Myntri bad ula ong ruh b aka jingkyrmen ka ap ïaka jylla ban kyntiew ïaka kam jngohkai na ki mrad ki mreng bad ka jingitynnad ka mariang namar ba ki briew kila sdang ban sngewthuh ïaka jinglong kongsan ka mariang bad ki jingthaw ba im bad bun ki shnong bad ki Raij kila ïatreilang bad ka tnad Kam Khlaw ban ïada ïaki khlaw ki btab naka prorkam ai jinghikai bad kiwei kiwei ki prorkam.
U Myntri ula wer ïa baroh ban ai ka jingtreilang ban pynneh pynsah ïaka sawdong sawkun ka mariang bad ki jingthaw ba im haka ban pynlong ïaka Jylla kum kawei na ki jaka ban khring ïaki briew ban wan jngoh ïaki khlaw bad ki mrad mreng ba don ha kane ka rilum jong ngi.
Kiwei kiwei kiba kren ki kynthup ïa u Rev. HH Mohrmen, Kong JU Kharpuri MCS, Kong H Lato DFO Wildlife, U Bah PS Nongbri IFS, Chief Conservator of Forest Social Forestry and Environment jong ka Sorkar Jylla ha ka jingïadonlang kiwei kiwei ki Ophisar ka tnad Kam Khlaw, ki Khynnah Skul bad ki nonghikai.
La pynkup burom ïaki 5 ngut kiba pyllait im ïaki mrad bad sam ruh ki khusnam shaki khynnah skul ba la jop haki jingïakop bapher bapher kynthup ka drawing, painting, eassy bad kiwei.