Press "Enter" to skip to content

Pynpep skul ki Kmie ki Kpa ïa ki khun ba tieng ïa ka injekshon ñiangpyrsit

ïai bteng ban pynsngewthuh ka tnad ka koit ka khiah
Nongpoh Risaw, 09: Ka jingshah ïalam bakla bad ka ki khubor hamsaia ki her sted sha ki paidbah khamtam haki thaiñ nongkyndong kaba la pynlong ïaki ban sheptieng ban ai injek tika ñiangpyrsit bad Rubella kumba ka sorkar lyngba ka tnad ka koit ka khiah ka buh thong ban ai injek lut sha baroh ki khynnah kiba naduh 9 bnai haduh 15 snem ka rta.
Katkum ka khubor bala iohlum la ïathuh ruh ba ki don katto katne tylli ki shnong haki thaiñ nongkyndong jong ka Jirang Constituency la ïathuh ruh ba ki kmie ki kpa kila sdang ban pynpep skul noh ïala ki khun namar ka jingsheptieng ïa katei ka injek namar ka jing shah ïalam bakla bad shah hikai bakla hano re hano.
Haba pyrshang ban wad ïaka jingshisha la ioh ruh ban ïakren bad katto katne ngut ki riew rangbah ka thaiñ Jirang naduh u Sordar ka Patharkhmah u Bah Najim Kharmalki bad kiwei kiwei ki riew rangbah kiba la kubur ruh halor katei ka khubor ba ki don ki kmie ki kpa kiba la pynpep skul noh ïala ki khun namar ka jingsheptieng ba ka sorkar lyngba ka tnad ka koit ka khiah kan wan sha ki skul ban ai injek ïaki khun jong ki.
Ki don ruh kiba ngeit ba naduh hyndai hynthai ïa katei ka jait jingpang ym ju donkam ban ai injek, bad don ruh kiba ngeit ba katei ka injek ka dei ka jingwan jong u mrad khlaw 666 bad kumta ter ter ki jingshah hikai bad shah ïalam bakla namar ba ki dang dei kiba duna haki jingnang jingtip haduh ba ki paidbah kim nud shuh ban phah skul ïala ki khun.
Hynrei ban rat dyngkhong ïa kum kitei ki jingshah ïalam bakla sha ki paidbah khamtam sha ki thaiñ Nongkyndong naka liang ka sorkar ka dei ban pynlong ïaki jingpynsngewthuh paidbah bad ki jingai jinghikai sha manla ki shnong khamtam sha ki shnong nongkyndong kiba dang duna ka jingnang ka jingtip khnang ba kin nym shah ïalam bakla bad shai halor katei ka jingthmu ka sorkar ban rat dyngkong ïakitei ki jingpang ñiangpyrsit bad Rubella.
Ka tnad ka koit ka khiah kala nang bteng ïaka jingpynsngewthuh paidbah shaduh ki thaiñ Nongkyndong, halor ka jingdonkam ban ai tika ñiangpyrsit bad Rubella naka bynta ban ïada na kitei ki jait jingpang kiba ktah bha haki khynnah kiba naduh 9 bnai haduh 15 snem ka rta, namar kumba long mynta bun naki paidbah ki shah ïalam bakla bad ngeit biej haduh ba ka pynlong ïaki ba kin kyntait ïaka jingai injek tika ïala ki jong ki khun namar ka jing sheptieng bad shah ïalam bakla.
Ïa katei ka jingpynsngewthuh paidbah halor ka jing donkam ban ai injek tika ïaki khynnah kiba naduh 9bnai haduh 15 snem ka rta la pynlong ha C&RD Block Jirang bala wan ruh ban pynsngewthuh paidbah da u Dr. M Mawrie DMHO ka Ri-bhoi District bad I Dr. AJ Syiemlieh District Surveillance Officer, Dr. M Kalwing BMO Jirang, Dr Priyanka Sharma na WHO, U Bah D Syiemiong BDO ka Jirang Block u ba long ruh u Shongknor ha katei ka jingïalang bad la sakhi ruh da ka jingdon lang u MLA ka Jirang u bah Sosthenes Sohtun, Paiem ka Jirang u Bah H Wahlang, ki nongsynshar shnong naduh ki Sordar, ki Rangbah Shnong bad kiwei kiwei ki riew rangbah ka thaiñ Jirang.
Naka liang u Dr. M Mawrie DMHO bad ka Dr. AJ Syiemlieh DSO, kila batai shai ha katei ka sngi ba ki paidbah kim dei ban sngewthuh bakla bad kyntait ïa katei ka injek tika hynrei katei ka injek ka dei kaba la ai ei da ka sorkar naka bynta ban ïada na ka jingpang ñiangpyrsit bad Rubella.
Kila ong ruh ba katei ka jingpang ka long kaba ma lada ym lah ban sumar bad ai jingiada ïaka haka por kaba biang eh bad dei nakata ka daw ba ka sorkar kala buh thong ban ai injek tika sha baroh ki khynnah kiba naduh 9bnai haduh 15 snem ka rta naka bynta ka jingiada bad ka jingthmu ban rat diengkhong ïa kitei ki jingpang kiba kynrei haki khynnah rit.
Dei halor katei ka nongrim naka liang ka sorkar lyngba ka tnad ka koit ka khiah kala pynlong ruh ïaki prokram bapher bapher sha ki shnong ki thaw, ki skul bad ka jing sdang ruh ban ai injek tika sha ki skul bad ki shnong bapher bapher khnang ba ki khynnah kin ioh lut ka jingïada na katei ka jait jingpang.