Press "Enter" to skip to content

Shah pynkynriah kam u ophisar MCS tang namar bym kohnguh ïa u para u Myntri sorkar

Bun ki ophisar IAS ba la phet sha Delhi, ong ka Congress

Shillong: Uwei u ophisar ba trei ha Jaiñtia Hills, u la shah pynkynriah kam tang namar ba um treh ban kohnguh ïa u para jong u Myntri ka sorkar jylla, uba dei na Jaiñtia Hills.
Ïa kane la kynnoh da u MLA jong ka Seng Congress, u Bah HM Shangpliang. Haba batai ïa kane ka jingjia, u MLA ka Mawsynram uba long ruh u nongaiktien jong ka Congress, u la ong ba u Bah SC Laloo, uba long u Additional Deputy Commissioner ka West Jaiñtia Hills District, u la shah pynkynriah kam haba u la kyntait ban kohnguh ïa kaei ka jingkwah une u para jong u Myntri, namar ba kam ïahap satia bad ka rukom treikam jong ka sorkar. “U Bah Laloo, ym tang ba u la shah pynkynriah kam, hynrei u la shah tim bad shah kren beiñ ruh ha une u para jong u Myntri”, la ong u nongaiktien ka Congress. Hadien ba u la shah kynhied ha une u para, kham hadien pat la wan hi syndon da une u Myntri ba la kham kynhied bad byrthen ruh ba un pynshitom ïa u. Ha kajuh ka sngi ha ka por janmiet, u Bah Laloo, u la shah pynkynriah kam noh sha Ampati, South West Garo Hills.
Wat lada u Bah Shangpliang um shym la jer kyrteng ïa une u Myntri, hynrei u la maham ïa ka sorkar Meghalaya Democratic Alliance (MDA) ba ïalam da ka NPP ba kan sangeh shisyndon ïa kane ka jingpynkynriah kam thurmur ïa ki ophisar, khlem ki daw kiba biang. “Ka long kaei kaei kaba sngewsih ban ïohi ba ki ophisar ki shah pynkynriah kam tang ha ka mon jong ki Myntri”, la ong u MLA Mawsynram.
Da kaba kynnoh ba ka Secretariat ka la kylla long tang ka jaka pynkynriah kam ïa ki nongtrei, u Bah Shangpliang, u la ong ba ka long kaba lyngngoh ba wat haduh ki Peon, ki Draibar, ki Nonghikai ruh ki shah pynkynriah kam la jan man la ka sngi. U la kynnoh ruh ba bun ki ophisar IAS, ki la mih noh na ka jylla ban leit trei noh sha Delhi ha kine ki hynriew bnai baladep.
Dang ha kane ka taïew baladep, u nongïalam ka Liang Pyrshah u Dr. Mukul Sangma, u la phah da ka jingthoh sha u Myntri Rangbah ka jylla, u Conrad Sangma ba un tuklar halor ka jingshah pynkynriah kam ba thurmur jong ki ophisar ka jylla.