Press "Enter" to skip to content

Takraiñ ka PAC ïa ka Forest Dept ba duh khajna palat 100 klur

Shillong, Risaw 09: Ka Public Account Committee (PAC) jong ka Ïingdorbar Thaw Aiñ ka Jylla, hynne ka sngi kaa takraiñ tyngeh ïa ka Tnad Forest & Environment ka Jylla namar ka jingbym lah ban treikam bha, kaba la wanrah ïa ka jingduh khajna kaba kot palat T. 100 klur.
“Ngi la shem ba na ka jingtrei kam mynthi jong ka Tnad, ka Sorkar kala duh ei ïa ka khajna ba jan kot T. 100 klur” ong u Bah Charles Pyngrope, Chairman ka PAC bad MLA ka Congress haba ïakren bad  ki Nongthoh Khubor hynne ka janmiet hadien ka jing ïalang bad ka Tnad Forest & Environment.
U Bah Charles uba dei ruh u MLA ka Nongthymmai, ula kdew ruh ïa ki jingtreikam bymhok ha ka Tnad haba ïadei bad ka kam tih mar poh khyndew jong ki Minor Mineral ba kynthup ïa ki maw bad ki mawshun hapoh ka Jylla.
Kat kum ka jingong jong u, kane kam dei satia ban hia hapoh ka Jylla kaba shaniah tylli hala ka jong ka rukom pynmih khajna.
Haba kylli,u Chairman ka Committee ula ong ba ka kaiphod Comptroller & Auditor General (CAG) kala kren shai ba na ka jing bym biang ha ka rukom treikam ka Tnad, ka Sorkar Jylla kala duh ei ïa ka khajna ba kot haduh T. 400 klur.
“Namar ka jingshem jong ka CAG, ngi la ai jingmut ïa ka Tnad ba kan shim ïa ki sienjam ba kan pynbeit ïa ka rukom treikam khnang ba kine ki khajna kin wan phai biang sha ka Jylla” ong u Bah Charles.
Ai jingmut ka PAC ban khang noh ïa ki karkhana plywood ha ka jylla
Ha kajuh ka por, ka Committee, ka la ai jingmut sha ka sorkar ban khang noh shisyndon ïa ki karkhana plywood ha ka jylla, da kaba ong ba kim wanrah jingmyntoi eiei ïa ka jylla, hynrei ki shu long pynban tang ki nongbam duh ïa ki khlaw ki btap.
U Chairman ka PAC, u Bah Charles Pyngrope, haba ïakren bad ki nongthoh khubor hadien bala wai ka jingïalang jong ka Committee kaba la khot hajir ïa ki ophisar jong ka tnad khlaw, u la ong ba ka jingong ba ka jylla ka donkam ïa ki karkhana plywood kadei kaba bakla, namar ïa ka plywood hangne la wanrah na Assam, West Bengal bad kiwei kiwei ki jylla bad kam ktah satia ïa ki khlaw ki btap ka jylla.
U la ong ba ka Committee ka sngewdei ba ka sorkar kadei ban shitom ïa ki ophisar ka tnad khlaw ki bym shym la shimkhia ban peit ba kine ki karkhana ki treikam ne em katkum ki kyndon ba la buh. Ha kajuh ka por u la ong ba ka sorkar kadei ban pynkhlaiñ shuh shuh ïa ki aiñ ka tnad khlaw, khnang ba kan nym nym don kano kano ka jingpom pathar ïa ki dieng ki siej, kaba ktah pat ïa ka mariang.
U Bah George Lyngdoh, MLA Umroi uba long uwei na ki dkhot ka PAC, u la ïathuh ba ki don haduh kumba 33 tylli ki karkhana plywood ha ka jylla ha ki jaka ba la ithuh da ka sorkar kum ki jaka karkhana. “Kine ki karkhana ki pyndonkam bun bah ka dieng bad ka wanrah ka jingjot kaba shyrkhei ïa ki khlaw ki btap ka jylla”, u la ong. Ha kajuh ka por u la pynpaw ka jingsngewkhia kaba jur halor ka jingkynrei ki karkhana otdieng kiba khlem don laisen bad kane ka pyni ba ka jingkhang pomdieng jong ka Supreme Court ha ki snem 1997 ym shym la don ba patiaw.
Uwei pat u dkhot ka Committee, u Bah HM Shangpliang, u la ong ba ki don ki khep ba ki District Forest Officers (DFO) ki la lap ba ki don ki karkhana dieng kiba la treikam khlem laisen, hynrei kim shym la leh eiei pat. “Ka sorkar kadei ban shim jingpynshitom ïa ki ophisar kiba kum kine”, u la ong, da kaba bynrap ba kane ka pyni ba ka don ka jingïalewh sop sop hapdeng ki trai karkhana bad ki ophisar ka tnad khlaw.