Press "Enter" to skip to content

Yn wanrah sa ka “Clan Bill” ban pynkhlaiñ ïaka aiñ shongkha shongman

Shillong, Risaw 09: U bah Manstudy Nongrem Chairman jong ka ‘Consultative Committee’ lem bad ka kynhun mynta ka sngi kila leit ban ai ïa ka kaiphod halor ka Khasi Social Customs Lineage Bills 2018 sha u U Chief executive Member (CEM) jong ka KHADC u Bah HS Shylla.
ïa kane ka kaiphod jong ka Committee kaba kynthup ïa 17 ngut ki dkhot la khlieh da u Chairman jongka u bah Manstudy Nongrem.
Haba kren ha ki lad pathai khubor, u bah Shylla u la ong ba ka Executive Committee (EC) ka dang ïoh pdiang ïa ka kaiphod mynta ka sngi bad ïa kane yn rah sha ka EC ban shong bishar bniah shuwa ban rah biang ïa ka sha ïing dorbar thawaiñ ban pdiang ïa ka.
Haba jubab ïa ki jingkylli u bah Shylla u la ong ba ka thong jong ka EC ka long ban khanglad ïa ka jingshongkha khleh, hynrei ïa kata jingiashong kha kam shym la khang, lada ki dang ïa shong kha kita kiba ïoh da kiwei ki jaitbynriew kin duh noh ïa ka jingmyntoi kaba ki dei ban ïoh kat kum ki riti dustur khasi.
U bah Shylla u la ong ban pynkhlaiñ ïa kane ka KSCL Bills, ka EC kan wan rah ïa ka bill hapoh ïing dorbar ïa kaba yn tip kum ka “Clan Bills” bad kane ka long ba ithu noh ïa ki kur bad ka kur kan teh lakam ïa la ka jong ka kur ha kaba ïa dei bad jingkhang ïa ka jingiashong kha khleh.
U la iathuh ruh ba ha ka jingwanrah ïa ka jingpynkylla ba nyngkong la kum tynsad ïa ka ktien Rangbah Kur hynrei ha kane ka kynti la weng noh ïa katei ka kyntien bad ban wanrah noh da kane ka “Clan Bill”. U la ïathuh ruh ba yn buh kyrpang ïa ka jaka bishar ban khlieh da u Nongiasaid ain uba la don 7 snem ei ei ha ka kam khnang ba un peit ïa kino kino ki jingeh kiba ïadei bad ka bill.
U la iathuh ruh ba kito ki khun kiba ai jait sha u kpa ruh ki dei ban pynbeit noh mar mar namar kat kum ka section 10 jongka Khasi Social Custom of Lineage Act 1997 la kdew shai ba kino kino kiba shim jait na u kpa kin duh ia ka jinglong Khasi bad riewlum jongki. U la iathuh ba ka EC ka la rai ban pynjlan por ban ailad ïa kito kiba la ai jait kpa ba kin pynbeit ïa kane ka kam.
Ka Committee ka la phah hynniew tylli ki mat jingai jingmut bad kita ki long dei ban wanrah ka jingpynkylla ha ka aiñ Trading by Non Tribal Regulation ban lait na kino kino ki kynrum kynram. Donkam ban wanrah ïa ka Clan Bill ka ban ai bor shuh shuh ia kane ka aiñ shongkha shongman. Ka EC ka dei ban pyrkhing bha ban ai Trading bad Labour License. Ka EC ka dei ban bishar bniah ruh ïa kiwei kiwei ki Marriage Bill. Dei ban pynkhlaiñ bor ia ki Dorbar Shnong. Ban bishar bniah ïa ka jingwan rung ki mynder bad ki bar jylla. Ban ïakren bad kiwei kiwei ki Autonomous District Council (ADC) ban pyntreikam ïa kane ka juh ka Bill ban ïalong kawei ka aiñ ha ka jylla baroh kawei.
U bah Manstudy Nongrem haba kren ha ki lad pathai khubor u la ong ba ka Consultative Committee kala pyndep ïa ka kam jong ka bad mynta ka sngi la ai ïa ka kaiphod sha u CEM jong ka KHADC, u la ong nym lah ban batai ïa kaei kaba ki ai sha u CEM, hynrei ynda la wanrah hapoh ka iing dorbar ïa ka Bill yn sa ïa tip paidbah.