Press "Enter" to skip to content

Da ka ‘Living Root festival’ yn kyntiew ka Tyrna Elaka ïaka kam jngohkai pyrthei

Shillong, Risaw 10: Ka Tyrna Elaka bad ka Tourism Management Committee jong ka Elaka, kala pynkhreh ban pynlon ïa ka tamasa ‘Living Root Bridge Festival’ ha u bnai Naiwieng kum shibynta ban kyntiew ïa ka kam jngohkai pyrthei hapoh ka thaiñ.
Ka Tyrwa Living Root Bridge Festival bala tip ruh kum ka VillageTourism Festival, kan long ha ka 7 bad 8 tarik u Naiwieng ha ryngkat ka jingiatreilang bad ka Indian Council of Cultural Relations (ICCR).
Haba ïakren bad ki lad pathai khubor, u Sordar ka Elaka Bah Donborwell Marbaniang ula ong ba ka jingpynlong ïa kane ka tamasa ka long eh na ka bynta ban kyntiew ïa ka kam jngohkai, ban pynneh pynsah bad ban ieid ïa ka mei mariang bad ban kyntiew ïa ka ïoh kam ïohjam jong ki samla ka thaiñ.
Haba pyntip ba kane ka tamasa kan dei ka sien ba nyngkong
eh bala pynlong hapoh ka thaiñ bad ha Sohra Civil Sub Division, une u Khlieh Nongsynshar ula ong “La palat 15 snem ngi la sakhi ïa ka jingkiew ha ka jingwan jong ki nong jngohkai ïa ki jiengkieng diengjri ba don hapoh ka Elaka khamtam ka jiengkieng diengjri ba ar mala (Doule decker). Ka Elaka jong ngi ka don ïa ka jingkieng diengjri kaba jrong haduh 95 phut eiei bad kane ka jingkhring kala khring bha ïa ki nongjngohkai kiba na Jylla bad na shabar”.
Haba kylli ïa ka khana shaphang ka jingshna ïa ki jingkieng diengjri ha ka thaiñ, u Bah Donborwell ula ong “Ki jingkieng dieng jri ba don ha Tyrna ki dei kiba la palat spah snem bad kum ka Elaka mynta ka dang wad ïa ki jingtip haba ïadei bad ka rukom shna bad ki briew ba donkti ban shna ïa kine ki jingkieng khnang ban pynsah nam ïa ki”.
U Bah Donborwell u pyntip ba ha kane ka tamasa, ka Elaka kan sa pyllait paidbah ruh ïa ka khana pateng shaphang ki jingkieng diengjri bad ki shnong kiba don ïa ki jingkieng diengjri nalor ka thup kyrteng jong ki riew hyndai kiba don bynta ban shna ïa kine ki jingkieng”.
Haba pyntip ba ka jingshna ïa kawei ka jingkieng diengjri ka shimpor palat 150 snem bad kaba donkam ruh ban hap sumar bad aibam ïa ka diengjri ba kan plung bad khlaiñ ki thied, une u Rangbah ula ong “Mynta, ngi la thung biang ïa ki diengjri ban shna haduh lai tylli ki jingkieng hapoh ka thaiñ”.
U Manish Singh Director ka ICCR ula pyntup ba ka ICCR kaa ïasnohkti lang ha kane ka tamasa ban kyntiew ïa ka riti ka dustur nala tynrai jong ka Tyrwa Elaka bad ban pynpar khana ruh ïa ka jingkieng diengjri shabar jong ka Jylla Meghalaya.
Haba pyntip ba ka riti ka dustur jong ka Jylla ka don ha ki Shnong ki Thaw ha Nongkyndong, u Manish ula ong ba ka ICCR a kane ka tamasa kan sa wanrah ruh ïa ki kynhun shad kynhun tem nala tynrai, na kiwei pat ki Jylla ka thaiñ bad ïa ka bailut baisep kan sa buria hi ma ka.