Press "Enter" to skip to content

Dawa ka KSU ïa ka tnat ka Koit ka Khiah ban plie noh ïa ka Nongkynbah Sub-Centre

Shillong, Risaw, 10: Ka Khasi Students Union (KSU) Nongkynbah Area Unit ka la dawa na ka tnat ka Koit ka Khiah ka Sorkar Jylla ba kan plie noh ïa ka Nongkynbah Sub-Centre ha shnong Nongkynbah.
“Ha ka jingshisha, ka Engineering Wing jong ka tnat ka Koit ka Khiah ka ladep ban shna ïa kane ka Sub Centre naduh u snem 2014 hynrei ngi sngewlyngngoh namar wat hadien 4 snem ka tnad kam shym la lah ban plie bad ban thung noh ïa ki nongtrei ha kane ka Sub Centre ki ban ai jingshakri ïa ki paidbah,” ong u kyrwoh ba la phah da u Samla Gomelson Snaitang, President ka KSU, Nongkynbah Area Unit.
Ki shnong kiba la khmihlynti ba yn kynthup lang hapoh kane ka Sub Centre ki dei ka Sarin, Nongpdengkynbah bad Nongkynbah ha kaba ka jingdon ki nongshong shnong ka la long palat 2000 hajar ngut. Watla ïa kane ka Sub Centre la shna pyndep 4 snem mynshwa hynrei hadien ka jingbymlah jong ka tnad ka Koit ka Khiah ban plie bad pyntreikam ha kito ki por ka la pynlong ïa kane ka jingtei ban sdang tor bad kylla ingjah bad ka ktem jong ki jingsniew hapoh shnong.
Kumba kine ki lai shnong mynta ki hap hapoh ka Sub Centre Mawpud ka long shisha kaba shitom ïa ki paitbah ban leit ban wan namar ki donkam ban ïaid kjat haduh 3 ne 4 kynta kumta ka seng ka ban jur ba dei ban phah maramot bad plie noh mardor ïa ka Nongkynbah Sub Centre khnang ba yn lah ban weng noh ïa ki jingeh kiba ki paitbah ki la mad baroh shikatta.
Ka seng ka dawa ruh na ka Sorkar Jylla ba kumba mynta kine ki shnong la weng mynta napoh ka Ranikor Civil Sub Division dei ban pynhap noh ïa kine ki shnong hapoh ka Rangthong PHC namar ka la kham jan bunshah sha Rangthong bad Mawkyrwat ban ïa kaba leit hiar arsut shaduh Ranikor na bynta ban leit pyndep ïa ki jingdonkam jong u paitbah.
“Ngi kyntu ruh ïa u MLA jong ka Ranikor Constituency ban tuklar lem halor kine ki jingeh jong ki paitbah na ki lai tylli ki shnong bad shen ngin sa leit pynkynmaw biang ïa u Director of Health Services (DHS) halor kine ki mat ba donkam jong ki paitbah. Lada ki bor Sorkar kim shimkhia ngim banse ban lum ïa u paitbah hashwa ban shim da kiwei ki rai ba kham tyngeh,” la ong u kyrwoh.