Press "Enter" to skip to content

Ka rai ki Seng Saiñ Pyrthei ban ïakhun pyrshah ïa ka Assam

Kan long kaei kaei ka rai kaba ai mynsiem haduh katta katta ia ki paidbah kiba shong basah ha ka thain khappud jong ka Meghalaya bad Assam lyngba ka jingïasyllok hapdeng ki Seng Saiñpyrthei bad ki Khlieh Nongsynshar Shnong hynnin ka sngi ban ïakhun pyrshah ïa ki kam thombor bad lehbor ka Assam.
Kane ka jingïakynduh jong ki nongïalam seng saiñ pyrthei jong ka Rambrai ryngkat ki nongsynshar shnong lem bad u DC incharge jong ka District, ka la mih hadien ba ka sorkar Assam ka la thoh sha ka Election Commission jong ka ri India ban pyrshah ïa kitei ki saw tylli ki Polling Station, da kaba ong ba ki hap ha ka jaka ïa kajia pud.
Ïa ka kynhun ba la ïalam da u MLA jong ka Rambrai Jyrngam Bah Kimfa Sidney Marbaniang ryngkat ki riew rangbah jong ka thaiñ Rambrai, nangta u Bah K.P Pangniang ex MLA, ki sordar jong ki shnong ka thaiñ Langpih ha ka jingïakynduh ïa u Deputy Commissioner jong ka West Khasi Hills ki la shim ruh da ka rai ruh ban ïakhun pyrshah halor ka jingthmu jong ka sorkar Assam, ban weng jubor ïa ki saw tylli ki polling station na katei ka thaiñ ba kynthup ïa ka Langpih, Ktiehthawiar, Nongsohram bad Madanjaïaw.
Ka Langpih sha ka thaiñ West Khasi Hills ka dei kawei na ki khappud jong ka Meghalaya kaba la shah pyndik haduh katta katta ha ka Assam kat haduh ba 4 ngut ki mynsiem briew ki la duhei ïa la ka jingim ha u snem 2010 ha ka jingshah synreit kuli ha ki pulit Assam. Ym tang katta, ki paidbah Khasi kiba shong sha kane ka thaiñ ki mad ïa ki jingshah pyndik ba har rukom na ka jingpyndik ki Nepali kiba wan buhai shnong bad kiba long ki diengkper ban ker ban da ïa u pud u sam ka Jylla Assam na ka Meghalaya.
Na ka liang ki Sordar Shnong bad ki riew rangbah jong kane ka thain ki la ïathuh ruh ba ka jingbyrngem jong ki pulit Assam ban weng jubor ïa kitei ki Polling Station ka la pynrah mynsiem ïa ki paidbah Khasi kiba hap ban shu peitngor bha lada jia ba ki pulit Assam kin wan rung jubor ha kano kano ka por.
Ka Sorkar Meghalaya Democratic Alliance (MDA) ka la dei ban shimkhia bha ïa kine ki jingeh ba ki paidbah kiba shong basah ha khappud ka Meghalaya bad Assam ki la ïakynduh mawsiang da ki phew snem tang namar ka jingïakajia pud hapdeng kine ki tylli ki Jylla.
Ka jingburom sah jong ka sorkar Meghalaya ïa ka Status Quo, naduh ba la lam khmat da u Bah EK Mawlong, Myntri Rangbah barim ka Jylla (Bam kwai ha dwar u Blei), kat haduh kine ki sngi ka la pynlong ïa ka Sorkar Assam ban shim kabu bad kheiñ trioñ ïa ka Sorkar Meghalaya. La 46 snem ba ka Jylla Meghalaya ka la ïoh ïa ka Jylla kam pat don satia ïa u pud u sam uba thikna. Namarkata, lah ban ong ba ka Jylla Meghalaya kam pat don ïa ka dur ka dar kaba thikna.
Kum ban pynkynmaw ba napdeng kitei ki saw tylli ki polling station, ka Langpih ka dei ka polling kaba ki paidbah ka thaiñ ki la ïoh ban thep vote naduh u snem 1976 ha ka election MLA sha ka Meghalaya Legislative Assembly. Nangta ha u snem 1977 ha ka MP Election bad ha ki election kiba long haduh mynta mynne. Watla ki paidbah nongthep vote ha katei ka thaiñ ki la ïoh lad ban pyndep ïa ka hok jong ki ban thep vote ha katei ka polling station. Hynrei kham hadien ki pulit Assam kiba don ha Langpih bad Mawsikar ki la sdang ban pynklumar da kaba khang lad ïa ki paidbah Khasi ban leit thep vote. Ki da byrngem ruh ba lada ki lap ba ki leit thep vote kin kem bad pynshitom. Hadien kane, na ka liang ka Sorkar Meghalaya ka la hap ban rah noh ïa katei ka Polling Station sha Mawsikar. Mynba u Bah K.P.Pangniang u dang long u MLA ka Rambrai Jyrngam Constituency, u la pynphai biang ïa katei ka Polling Station ha Langpih bad ka Sorkar ka la thaw sa ar tylli kiwei pat ki Polling Station kata ka Nongsohram bad ka Madanjaïaw. Hynrei kaba la pynbitar ïa ki paidbah ka long ba hadien katto katne por jong ka Election MLA 2018, ki pulit Assam ki la wan ban rung jubor ha kitei ki Polling Station bad byrngem byrsit ruh ïa ki paidbah nongshong shnong ba kin weng da ka bor. Hynrei mynta ka Assam ka la mudui da kaba phah jingthoh syndon sha ka Election Commission.
Kine ki jingeh ki pynkthang haduh katta katta ïa ki paidbah nongshong shnong katei ka thaiñ namar ka jingklun jaka jubor jong ki Nepali kiba wan buhai shnong ha katei ka thaiñ bad leh ruh ïa ki kam kiba long pyrshah ïa ka hok longbriew manbriew pyrshah ïa ki Khasi trai shnong trai jylla.
Ka Sorkar MDA ba la ïalam da ka NPP kaba ïatreilang bad ka BJP ha New Delhi bad ha Jylla ka la dei ban shimkhia ban ïapynbeit noh mardor ïa u pud u sam bad ka Sorkar Assam kaba la ïalam da ka BJP bad la dei ruh ban phah tuklar da ka Sorkar Pdeng lada ka Sorkar kwah shisha ïa ka shongsuk shongsaiñ ki paidbah ha khappud.