Press "Enter" to skip to content

Kwah ka Sorkar da ka ujor shwa ban tohkit ïa ka jingkynnoh shah kynriahkam u Ophisar MCS

Shillong, Risaw, 10: Ka Sorkar Jylla mynta ka sngi balang ka la pynpaw ba ka kwah ban da ïoh shwa da ka jingujor shwa ban thung ïa kano kano ka jingtohkit halor ka jingkynnoh ba uwei u Ophisar MCS ba trei ha rilum Jaiñtia, u la shah pynkynriah kam tang namarba um treh ban kohnguh ïa u para jong u Myntri ka Sorkar Jylla, uba dei na Jaiñtia Hills.
Kane ka jingkynnoh ka la mih na u MLA jong ka Seng Congress, u Bah HM Shangpliang. Haba batai ïa kane ka jingjia, u MLA ka Mawsynram uba long ruh u nongaiktien jong ka Congress, u la ong ba u Bah SC Laloo, uba long u Additional Deputy Commissioner ka West Jaiñtia Hills District, u la shah pynkynriahkam tang namarba u la kyntait ban kohnguh ïa ka jingkwah une u para jong u Myntri Sorkar, namarba kam ïahap satia bad ka rukom treikam jong ka Sorkar. U la kynnoh shuh shuh ba u Bah Laloo, ym tang ba u la shah pynkynriahkam, hynrei u la shah tim bad shah kren beiñ ruh ha une u para jong u Myntri. Hadien ba u la shah kynhied ha une u para, kham hadien pat la wan hi syndon da une u Myntri Sorkar uba la kham kynhied bad byrthen ruh ba un pynshitom ïa u. Ha kane kajuh ka sngi ha ka por janmiet, u Bah Laloo u la shah pynkynriahkam noh sha Ampati, South West Garo Hills.
U Bah Prestone Tynsong, Symbud Myntri Rangbah ka Jylla ha ka jingïakren bad ki lad pathai khubor mynta ka sngi palei hadien ba la wai ka jingïalang Kynhun Myntri u la ong, “lada ngi ïoh pdiang da ka ujor ngin phah tohkit ban lap ïa ka jingshisha bad ong ruh ba um lah satia ban shu ngeit tang ïa kaei kaba paw tang ha ki lad pathai khubor.”
“Lada don kino kino ki ophisar kiba shah leh bym hok balei kim leit ujor sha ka aiñ bad ki lah ruh ban mudui wat da ka Ejahar namarba ka Service Rules ka don bad ka shah ïa ki ban leh kumta,” ong u Bah Prestone.
Haba kylli hato kine ki Ophisar ba shah leh bym hok kim sheptieng mo ban ïaleh pyrshah ïa ki Lei San snem, u Symbud Myntri Rangbah, u la ong, “hato phi dei ki mraw, hato phi sheptieng ban leit sha ka aiñ pyrshah ïa ki. Baroh kiei kiei ki long kiba shai, ka aiñ ka don, phi lah ban leh sha ka aiñ.”
U Bah Shangpliang u la kynnoh ruh ba bun ki ophisar IAS, ki la mih noh na ka jylla ban leit trei noh sha Delhi ha kine ki hynriew bnai baladep. Halor kane, u Bah Prestone u la ong, “nga kwah ba u Nongaiktien ka Congress (Bah HM Shangpliang) un da jer kyrteng katno ngut ki don ki ophisar kiba la pynkynriahkam bad ha ka por ka sorkar kaba rim bad ha ka por ba ka Sorkar MDA ka la bat ïa u lakam synshar, katno ngut ki don (kita ki ophisar ba shah leh bym hok). Katno ngut kiba shah pynkynriahkam (Deputation) shwa u Rymphang 2018.”
Dang ha kane ka taïew baladep, u Nongïalam ka Liang Pyrshah u Dr. Mukul Sangma, u la phah da ka jingthoh sha u Myntri Rangbah ka Jylla, u Conrad K. Sangma ba un tuklar halor ka jingshah pynkynriah kam ba thurmur jong ki Ophisar ka jylla.