Press "Enter" to skip to content

Kyrpad ka EM ha ka EC : Ailad kyrpang ban ai jait kpa ha Ri Bhoi

Sdang kyllaiñ ka Lineage Bill jong ka KHADC?
Shillong, Risaw 10 : Ha ka por ba ka Executive Committee jong ka KHADC ka mut ban rah noh ïa ka Khasi Social Custom Lineage Bill ha ka Dorbar Kyrpang ha ka taïew ban wan, la mih kynsan pat ka jingtyrwa na ka Executive Member ban ailad kyrpang ban ai jait kpa khnang ba ki katto katne ki Kur ha Ri Bhoi kin lait na ka jingduh jait.
Ïa katei ka jingtyrwa la wanrah da ka MDC na Nongpoh, Kong Rona Khymdeit ba dei ruh ka EM ha ka jingïalang jong ka Executive Committee kaba long ha ka janmiet sngi Balang halor ka nongrim ba katei ka jingtyrwa ka long katkum ka riti dustur naduh kulong kumah ha kaba kito ki Kur (Jait) bym don kynthei shuh, ki ju ring-Bhoi ïa kiwei ki jaidbynriew ban roi biang ka Kur ka Jait.
Kumta, na ka liang u CEM, Bah HS Shylla haba kren bad
ki lad pathai khubor u la ong, ba ha ka jingshisha ki thmu ban khot ïa ka Dorbar Kyrpang ha ka 15 ne 16 tarik mynta u bnai ban rah ïa katei ka Bill, hynrei mynta ki la hap ban bishar bniah biang pat ïa katei ka jingtyrwa.
U CEM u la ong ruh ba katkum ka jingïathuh jong ka MDC ba dei ruh ka Executive Member, ïa katei ka ring-Bhoi ba ju tip ruh kum ka ring-bia ne ring-Mikir la ju leh da kaba ai jait noh sha u shynrang khnang ban pynneh ïa kato ka Kur tynrai kaba ju don naduh mynshwa ha Ri Bhoi ba kan ym duh jait.
“Kane kam dei ka Tang-jait hynrei kadei kaba la tyrwa ban leh kyrpang khnang ban ym duh jait. Na ka liang i Kong Rona ruh i kwah ban ailad kyrpang namar kadei ka dustur kaba ju leh naduh mynshwa,” bynrap shuh shuh u CEM.
Nalorkata, u ïathuh ruh ba na ka liang ka Council hi ki kwah ban wad bniah biang, kiei ki Kur kiba la sdang ban duh jait. “Ka Executive Committee ka hap ban wad ki lad ki lynti ban syllok bad ki riewshemphang na Ri Bhoi halor katei ka bynta.”
Katkum ka jingïathuh jong u, ka jingïalang jong ka Executive Committee ha katei ka sngi ka long ban pynïaid noh shakhmat ïa ka kam hadien ba ka Consultative Committee kaba khlieh da u Bah Mansturdy Nongrem ka la aiti ïa ka kaiphod jong katei ka Bill ha ka sngi Hatmajai. Hynrei la ong pat ba da ka jingmih noh kitei ki jingtyrwa la hap ban bishar bniah biang shwa.
U CEM u ong ruh ba ki hap ban da leh sani bha bad lada kum ka Executive Committee ka sngew ïahap ki hap ruh ban da pyrkhing bha khnang ban im ka dustur.
Kumban shu kdew hangne, ha ka por ba wanrah ïa katei ka Bill, ka Kong Rona ka la ïeng ban pynpaw ba ha Ri Bhoi ka ju don ka jingai jait kpa kaba ju don naduh hyndai hynthai na ka bynta kito ki Kur kiba la jan duh jait bad ki bym don shuh ki nongmih pateng.