Press "Enter" to skip to content

Lap u Chief Whip ka Sorkar ba khlem lah pyntrei ka MTDC ïa ka ‘Rural Eco Tourism’

Sahkut ka song tyngka ka NEC haduh T. 3.75 klur
Shillong, Risaw 10: U Chief Whip ka Sorkar Meghalaya Democratic Alliance (MDA) u Marcuise.N.Marak ula lap dalade ba ka Meghalaya Tourism Development Corporation (MTDC) ka khlem lah satia ban pyntrei ïa ka project ‘Rural Eco Tourism’ ba palat T. 3.75 klur bala mang sha ki 9 tylli ki Shnong ka Ri-lum Garo mynta la palat shisnem shiteng.
U Chief Whip ka Sorkar uba dei ruh u MLA ka Williamnagar, ula lap ïa kane ka jingbym treikam ka MTDC ha ka jinghiar jurip ïa ki Project ha kine ki 9 Shnong myn ha ka 4 bad 5 tarik Risaw. Ïa une u Heh Sorkar la synran lang da ka District Tourism Officer (DTO), ki Magistrate, ki Pulit lem bad ki Nokma jong kine ki Shnong.
Ka Rural Eco Tourism ka kynthup ïa ka Eco Camp ha Mandalgre, Ampanggre, Nengmandalgre, Bolkinggre, Baweggre, Rap-dikgre, Jakopgre, Chiokgre bad Gitokgre, kiba hap hapoh ka Williamnagar Constituency.
Lah ban kdew hangne ba ka North Eastern Council lyngba ka Ministry of Development of North Eastern region (DONER) ha ka 22 tarik Lber 2017, kala pyllait ïa ka song tyngka T.375.21 lak (lai klur hynniewphew san lak, arphew wei hajar) sha ka Sorkar Jylla kum ka Installment ba nyngkong ban pyntrei ïa ka “Rural Eco Tourism Circuit ha Ri-lum Garo” na ka bynta u snem 2016-2017.
Ka Sorkar Jylla hadien ba ïohpdiang ïa ka pisa, kala aiti ha ka Meghalaya Tourism Development Corporatin (MTDC) ba kan pyn trei ïa ka project ka ban long ka jingkyrkhu kaba khraw ïa ki paid nongshongshnong jong ka Williamnagar Constituency.
Kat kum ka jingong u Marcuise, ka jinghiar jurip ïa kane ka project ka long eh na ka bynta ban phah pynsted shaid shaid ïa ka kam hynrei lyngngoh pat ban lap ba ka Project kam shym la sdang satia haduh mynta mynne bad ka MTDC kala shu ieh lut ïa ki prioject lait noh tang ka jingtih khyndew ba malu mala ha ka shnong Bawegre ha kine ki khyndiat bnai bala lah.
Une u Chief Whip ula ong ba ka jingwanrah ïa kane ka project hapoh ka thaiñ kala pynkmen bha ïa ki paid nongshongshnong bad ka dei ruh kawei na ki project kaba la khring bha ïa ki samla bala rung kam kaikhlaw ba kin wan pyndem wait bad ban im ryngkat noh ha ka imlang sahlang.
“Hynrei ngi kyndit ban lap ba kawei ka project ruh kam pat sdang haduh mynta. Kane kala pynduh jingkyrmen bad pynduh ruh ïa ka jingshaniah jong u paidbah” ong u Marcuise haba pyntip ba ka NEC kala dep kren shai ruh ha ka shithi ba ka lah ban pyn duh noh ïa ki project namar ka jingbym shimkhia jong ki bor ba dei khmih ïa ka kam. U ong ba ka jingduhnong ka ap ïa u paidbah bad ka lah ruh ban wanrah ïa ki jingjia ki bym sngewtynnad kum ka jingshongsuk, kaba la sdang ban wanphai hapoh ka thaiñ.
U Marcuise ula kyntu ïa ka Sorkar Jylla ba kan shimkhia noh mardor ïa kane ka kam bad ban pynshitom ruh ïa ki briew kiba don kti ban pynsuki ïa ka kam .