Press "Enter" to skip to content

MANO BAN JOP HA KI ILEKSHON HA KI 5 JYLLA BAD LOK SABHA?

Bah Philip Marweiñ

Ka Election Commission jong ka Ri India ka la dep pynbna ba ki ilekshon ban jied ïa ki MLA ha ki 5 tylli ki jylla- Madhya Pradesh, Rajasthan, Chhattisgarh, Telangana bad Mizoram kin long naduh 12 tarik u Naiwieng haduh 7 tarik u Nohprah bad ka jingñiew ïa ki vote kan long ha ka 11 tarik u Nohprah, 2018.
Baroh u paidbah jong ka Ri India u ap khmih lynti ïa ka jingmih jong kane ka ilekshon, namarna ki sngewthuh ba kane hi kan long kum ka ilekshon rit jong ka Lok Sabha ilekshon kaba heh ka ban long ha u ïaïong-Jymmang, 2019. Shisha ka jingmih jong kine ki ilekshon hi ha ka 11 tarik u Nohprah, kan long kum ka jingplie pyrda ne jingkhang ïit ban ïoh khmih sha kano ka liang ka lyer ka MP ilekshon 2019 kan beh.
Haba peit bad bishar bniah na jngai, ha Madhya Pradesh ka sorkar kaba synshar hangtai ka dei ka sorkar BJP, kaba la bat mynta la slem. Hynrei, kumba ka long mynta ki bniat jong ka BJP hangto kim da khlaiñ shuh. Ka Congress, kaba la ïoh bat sorkar teng ha kane ka jylla la bun term hynrei kaba la duh noh, mynta ka la sdang khlaiñ biang. Katkum ka jurip ilekshon ba la leh da ki stad jurip TV jong ka Ri India, ka BJP hapoh ka jingïalam jong u Shivraj Singh Chouhan, kan ïoh duna bha ki seat ha kane ka sien, katba ka Congress hapoh ka jingïalam jong u Kamal Nath, kan kham tam ban ïa ka BJP hynrei, la kdew da ka jurip ba wat la ka tam seat makna ruh hynrei kan kham shitom ban ïoh ïa ka majority. Kiwei kiwei ki Party bad ki Independent ruh kin ïa ïoh mar mar khyndiat seat bad dei kine ki ban ïarap ban thaw sorkar lada jia ba ka BJP bad ka Congress ki duna briew ban thaw sorkar.
Wat ha Rajasthan ruh, malu mala, kan long kumjuh hi kumba long ha Madhya Pradesh. Ka BJP kaba synshar mynta ha kane ka jylla bad kaba la ïoh bat sorkar teng shuwa jong kane kajuh ka jylla ruh, kan shem jingeh ban dang wan phai sha ka bor synshar namarba ki paidbah hangtai ruh ki la sdang ngiah ïa ka sorkar BJP ba la ïalam da ka Vasundhara Raje Scindhia. Ka Congress kaba la ïoh bat sorkar teng ha kane ka jylla hapoh ka jingïalam jong u Ashok Gehlot kum u Chief Minister, mynta ka la sdang khie khlieh biang hapoh ka jingïalam jong u Sachin Pilot bad u Ashok Gehlot. Hynrei katkum ka jurip ba la leh da ki stad jurip TV jong ka India, ka pyni ba ka BJP bad ka Congress ki lah ban iakhur jan mar kajuh katjuh, shu ïatam kai malu mala. Kiwei ki party rit bad ki independent ruh kin ïa ïoh tang mar khyndiat hynrei ki lah ban long ki rong ser ha ka por ba ïathaw sorkar lada jia ba ka BJP ne Congress kim ïalah ban thaw sorkar na lade. Ha Chhattisgarh pat katkum ka jurip jong ki stad TV ka BJP kaba bat ïa ka bor sorkar hangtai, hapoh ka jingïalam jong u Raman Singh, ka dang shong skhem malu mala bad ka dang don ka jingkyrmen ba kan dang ïoh bat biang ïa ka bor hadien kane ka ilekshon ruh. Ka daw jong kane ka long ba ka Congress party hangto kam da don ki briew kiba tbit bha bad kiba khlaiñ bor ban ïa-aireng bad ka BJP, pynban ka Congress ka khmih lynti ban pynkyndit ia ka sorkar BJP ha kane ka jylla. Na ka liang jong u Aji Pramod Kumar Yogi ruh, u ba la bat nyngkong ïa ka khet Chief Minister hangtai u lah ban pynkyndit ïa ka BJP hangto.
Ha Telangana pat ïa mynta kiwei kiwei ki party kin jynjar ban ïaleh pyrshah ïa ka Telangana Rashtriya Samity (TRS) ba la ïalam da u riew paw nam bha jong kane ka jylla bathymmai, u Kalvakuntla Chandrashekar Rao. La hajar katta ruh, ka BJP ka lah ban ïoh katto katne seat ha kane ka jylla wat la kam pat da suhthied ruh. Kiwei kiwei ki Parti rit bad Independent kin jynjar ban ïoh khur seat mar iwei ne ar ruh namarba la khlaiñ palat ka TRS jong u Rao.
Ha Mizoram pat ka jingïaleh hangtai ha jylla barit kan kham long hapdeng ka Congress, kaba bat ïa ka sorkar hangtai la bun snem bad ka Mizo National Front (MNF) ba la ïalam da u Zoramthanga. Wat ka NPP ruh ka lah ban ïoh plie account ha kane ka kynti lada ka ïoh ïa ki briew kiba bit ban ïakhun.
Ki stad jurip TV ki la leit jurip ruh ïa kiwei kiwei ki jylla jong ka Ri India ban tip ïa ka sur jong ki paidbah kumno ki sngew halor ka sorkar u BJP (NDA) hapoh ka jingïalam jong u Narendra Modi. Katkum ka jurip ha ka ilekshon jong ki sha ha ki jylla bapher na ka bynta ka Lok Sabha,ka BJP kan ioh 276 ngut ki MP, ka Congress 112 ngut bad kiwei pat (lang baroh) kin ïoh 155 ngut. Ha Delhi katkum ka jurip ka BJP ka lah ban jop kham bun ka BJP, Ha Uttar Pradesh, kaba don 80 tylli ki seat MP, pat ka jurip ka ong ba yn kham jop bun kiwei pat ki party kum ka BSP, SP, ban ïa ka BJP. Ha Bihar ka BJP kan ïoh kham khyndiat tylli ki seat ban ïa kiwei ki party kum ki jong ka RJD, BSP, SP,LJP bad kiwei. Nangta, ha West Bengal ka Trinamul Congress kan dang kham wan shakhmat hi hynrei ka BJP ruh kan pynkyndit ha kane ka jylla ha ka jingïoh seat MP. Ha Karnataka ka jingïoh seat MP hapdeng ka Congress bad ka BJP ka lah ban iakhait namarba para ba khlaiñ bha. Kiwei kin shu ïoh kai mar khyndiat. Ha Maharashtra pat ka BJP kan ym ïoh kamai MP seat bun shuh kumba ka la kamai ha ka snem 2014. Ka Congress kan kiew bad kumjuh ruh ka Shiv Sena. Hynrei ka NCP pat kan hiar ha ka jingioh MP seat, ong ki stad jurip TV na ka jinglap jong ki ha Maharashtra.
Ha Rajasthan, Madhya Pradesh, Chhattisgarh, bad Telangana ka jingioh MP seat kan dang lah hi ka BJP ban ia kiwei kiwei, kynthup ia ka Congress. Ha Tamil Nadu ka BJP kan shitom shibun ban ioh seat katba hangthie kin kham kamai hi ka DMK bad ka AIADMK. Ha Kerala ki ban kham ioh seat kin dei ka CPI(M) bad ka Congress. Hynrei ka BJP kan jynjar bha ban ioh khur seat MP. Ha Gujarat ka BJP kan kham kamai bun ban ia ka Congress, kiwei kiwei kin shu ioh kai malu mala. Ha Punjab pat ka Congress kan kamai jem bha katba kiwei kin ia ioh tang mar khyndiat tylli. Ha Haryana yn kham lah ka BJP bud sa ka Congress. Ha Assam ka BJP kan hiar bha bad kan ym ioh shuh kumba ioh mynshuwa. Ka report kaba mih nangthie ka ong ba ka jingiakhun kan iathmit bha hapdeng ka BJP bad ka Congress. Ha kiwei kiwei ki jylla barit jong kane ka thain shatei lam mihngi, kum ka Arunachal Pradesh, Nagaland, Manipur, Tripura, Meghalaya bad Mizoram ka BJP kan ym kamai seat hynrei kan iohnong da ka jingjop jong ki party jylla jong kine ki thain, lait noh ha Arunachal Pradesh. Ha kaba kut hi, katkum ka jurip jong ki stad TV, ka BJP kan dang ioh Pass Mark, ha kane ka Lok Sabha Election ka ban long ha u Iaiong-Jymmang.