Press "Enter" to skip to content

Mih u Samla na Kyrdem ban pan ticket MDC na ka Congress ha Umroi

Nongpoh, Risaw, 10: Kumba ka lyer jong ka Election MDC ka la sdang ban beh ha Umroi Constituency, uwei na u samla u la mih shakhmat ban pan ticket na ka Congress party na ka bynta ban ïakhun ha kane ka election MDC na Umroi Constituency.
Une u samla uba la mih shakhmat ban pan ticket na ka Congress party, u dei u samla Pynhunlang Mawroh, uba shong basah ha ka Shnong Kyrdem bad ruh u dei uwei na u nongkyrshan ba hakhmat ka Congress naduh ki por jong ki MLA barim bad haduh mynta hapoh Umroi Constituency.
Haba ïa kren bad u Nongthoh khubor u Mawphor, u Samla Pynhulang Mawroh u la ong ba kum uwei na u samla u la rai ban mih shakhmat na ka bynta ban ïa khun ha kane ka election MDC jong u snem 2019 na Umroi Constituency bad u khmih lynti ruh ba ki paidbah kin ai ka jingkyrsha kaba radbah na ka bynta ka jingjop ba don burom jong u kaba u angnud ban shakri na ka bynta ki paidbah ka Constituency.
U la ong ruh bun na ki paidbah bad ki nongkyrshan ki la ai mynsiem ïa u ban mih pyrthei noh ha kane ka kynti bad u don ruh ka jingangnud ba ki paidbah ruh kin ai ka jingïatrei lang na ka bynta ban pyrurlong halor ki jingangnud kiba u kwah ban pyndep lada u shah jied kum u MDC ka Umroi Constituency.
“Nalor ka roi ka par bad ka jingeh ki paidbah ki baduk ba kyrduh, ka thong kaba hakhmat ka long ban pynneh pynsah ïa ki riti ki dustur, ka ktien ka thylliej u khun Khasi Khara, ka khyndew ka shyiap, ki pud ki sam bad kiwei kiwei” u la ong bad bynrap, “Ban pynurlong ïa kitei ki jingangnud ka dei tang da ka jingpynkupbor ki paidbah ban jied ïa u kum u MDC ka Umroi ha kane ka election ban sa wan ha ka jylla” u la bynrap.
Namarkata kum u samla u don ka jingangnud ban shakri ïa ki paidbah u kyrpad jur naduh ki heh nongïalam ka party ba kin ai lem ïa ka Ticket bad ruh ki paidbah nongkyrshan ban kyrshan bor bah ban pynïoh ïa ka Ticket na ka bynta ban ïoh ïa ka lad ban ïa khun kum u Kyrtong ka Congress ban poi sha ka thong jong ka jingjop, u la bynrap.