Press "Enter" to skip to content

Phla u Gadkari ba jop elekshon ka BJP da ki jingkular thok suda

Mumbai, Risaw 10: U Nongïalam ka BJP bad Myntri ka Tnad Roads & Surface Transport u Nitin Gadkari ula phla ba ka seng Bharatiya Janata Party (BP) kala jop ïa ki elekshon jied Nongmihkhmat da kaba wanrah ïa ki jingkular thok suda sha u paidbah.
Une u Myntri ka Sorkar National Democratic Alliance (NDA) ula phla ïa kane ha kawei ka Television Show jong ka Channel Marathi bala pyllait dang shen, kaba lah ban wanrah ruh ïa ka jinglehraiñ kaba jur ïa ka BJP bad ka jingpyrsad mynsiem ïa ka Congress ba kan tynjuh.
Kat kum ka jingong u Gadkari “Ngi la ngeit skhem bha ba ngin nym wan satia ha ka bor bad namar kata, la ai jingmut ïa ngi ban pyndonkam da ki jingkular thok suda. Mynta ba ngi la don ha ka bor, ki paidbah kila pynkynmaw ïa ngi halor kine ki jingkular hynrei mynta ngi la shu ïapler bad leh beit la ka jong ka kam”.
Haba pynpaw ba um lah satia ban shu peit ïa ki jingkular thok ka BJP, hynrei u ong ba ha u hi u dang sngew ba u Modi u dei u briew uba biang eh ban synshar ïa ka India.
U Gadkari ula ong ruh ha kane ka show ba ka BJP kala jop ïa ka elekshon da ki jingkular bym urlong satia.
Ka Congress kala kloi bha ban kynthoh ïa kane bad kala pynsaphriang ïa ka video clip ha Twitter bad ong ba u Gadkari ula pynshisha ba ka Sorkar BJP ka dei kaba la tei da ki kamkai bad jingkular thok suda.
U President ka All India Congress Committee u Rahul Gandhi ula kynthoh ha kane ka video da kaba ong ïa u Gadkari ba ula kren ïa ka jingshisha. Ula ong ba wat ki briew kila sdang ban pyrkhat mynta ba ka Sorkar BJP kala pyndonkam ïa ka jingangnud bad jing shaniah jong ki tang ban lah pyndap pynbiang ïa ki jngdonkam ka Party.