Press "Enter" to skip to content

Plie u Ma Comingone ïa ka Aqua Park ba nyngkong ha ka Mawkyrwat

Mawkyrwat, Risaw 10 : U Ma Comingone Ymbon, Myntri ba dei peit ïa ka tnad Fisheries Department ha ka sngi Balang u la plie ïa ka Aqua Park ba nyngkong ha Photjaud-War kaba don hapoh South West Khasi Hills District, Mawkyrwat ha ka jingïadonglang u bah Renikton Lyngdoh Tongkhar, MLA, Mawkyrwat, u K.N. Kumar, Additional Chief Secretary ka Jylla Meghalaya, ka kong I. Laloo, IAS, Deputy Commissioner, South West Khasi Hills District, ka kong A.L. Mawlong, Director jong ka Fisheries bad kiwei ki heh ki haiñ.
Lah ban kdew hangne ba ïa kane ka projek la shna lyngba ka Meghalaya State Aquaculture Mission kaba ka jingheh ka long kumba 21,712 sq/m bad ha ka jingmang kaba 25 lak tyngka.
Haba ai jingkren na ka liang u kongsan u Ma Ymbon ula ong, ba lah ban pynurlong ïa kane ka jingthmu lyngba ka jingïatreilang bad ka jingangnud jong ki paidbah kane ka thaiñ ha kaba la lah ban plie ïa kane ka Aqua Park ba nyngkong hapoh ka Jylla bad da kaba ai ka jingïaroh ïa baroh kiba ïatrei shitrhem ha ryngkat ka jingïatylli ban pynlong ïa kane ka sngi kaba jop.
Ula ong ruh ba kane ka project, ym tang ba kan kyntiew ïa ka ïoh ka kot lyngba ka jingpynmih dohkha hynrei ha kajuh ka por ka lah ban long ruh kawei na ki lad ban kyntiew ïa ka kam jngohkai ka ban thaw kam bad lad kamai jakpoh na ka bynta kito ki briew ki bym donkam don jam. Shuh shuh ula ban jur halor ka jingdonkam ban pynneh ïa ka jingkhuid jingsuba bad ka jingitynnad jong ki sawdong sawkun kaba lah ban khrieng ïa ki nongjngohkai pyrthei kiba najan bad na jngai.
Ha ka jingkren jong u, u ula ïathuh ba kumba 12 hajar metric tons ka dohkha la lah ban pynmih mynta u snem katba ka jingdonkam jong ka Jylla Meghalaya ka long kumba 27 hajar metric tons ha ka shi snem. Ha kajuh ka por na ka liang jong u, ula kular ruh ban ïarap katba lah ka bor na ka bynta ban pynbiang ïa ka jingdonkam jong ki ha kane ka Aqua Park. Ula pyntip ruh ba ka Aqua Culture Mission ba II ynsa plie shen, da kaba ula ai mynsiem ïa ki nongrep dohkha ban shim ïa ka kabu khnang ban lah ban pynmih bun ki dohkha ba ka 300 klur kaba ngi pynlut na ka bynta ban thied dohkha na shabar yn lah ban pynneh hapoh ka Jylla. Ula kyntu ruh ba kin pynneh ïa ka jingïatylli, ka jingshaniah bad ka jingkhuid ha ka liang ka pisa ka tyngka kaba lah ban nang kyntiew shuh shuh ïa kane ka jaka sha ka Tourist destination da kaba u khot ïa ki paidbah ba ki dei ban pynneh pynsah ruh ïa ka jingitynnad ka mariang bad ki sawdong ki sawkun.
Ha ka jingkren u bah K.N. Kumar, Additional Chief Secretary ka Jylla Meghalaya ula ai ka jingïaroh ïa baroh kiba donkti ban pynlong ïa kane ka jingthmu kaba jop bad kaba nyngkong eh hapoh ka Jylla da kaba u khmieh lynti ruh ba lyngba kane yn lah ban pynmih bun ki dohkha bad ban pyndap ïa ka 15 metric tons ka dohkha kaba ngi la ju thied na shabar Jylla. Ula ong ruh ba ka Meghalaya ka dang duna shibun ha ka jingpynmih ïa ki dohkha ha kaba ngi hap ban shu shaniah ïa ki dohkha kiba wan na shabar. Nangta na ka liang jong u ula khot bad pynshlur ïa ki paidbah ba kin shim ïa ki lad ki lynti lyngba ka kam ri dohkha khnang ba ngin nym hap ban shu shaniah ha kiwei na ka bynta ka jingdonkam jong ngi kaba manla ka sngi. Ula kyntu ruh ïa ki Kiewshaphrang NaRM Group ba kan plie ïa ki lad kamai lyngba kane ka project khnang ba ka pisa kaba mih nangne yn lah ban pyndonkam ha kiwei pat ki jingdonkam.
Na ka liang u bah Renikton Lyngdoh Tongkhar, MLA ka Mawkyrwat ula pynpaw ïa ka jingangnud na ka bynta kyntiew ïa kane ka jaka da kaba ula pan ïa ka jingïatreilang na baroh ki liang na ka bynta ban wanrah shakhmat ïa kane ka district ha ka kam ri dohkha bad kumjuh ruh ha ka kam jngoh kai pyrthei. Ha kajuh ka por ula kyntu ïa ki paidbah ba kin ym ai lad ban shna ïa ki ïing ha kine ki jaka ba marjan bad kane ka Aqua Park namar ki lah ban pynjaboh bad pynsniew dur noh ïa ka jingitynnad jong kane ka jaka, da kaba ula kyntu ruh ïa ki paidbah ban long ruh kiba don-akor ha ka ktien ka thylliej khnang ban lah ban khring bun ki nongjngohkai ha kane ka jaka.
Ha kane ka sngi na ka liang u bah S.K. Lyngdoh, dkhot ka Kiewshaphrang, NaRM Group ula ïoh ban ai ïa ka memorandum sha u bah Comingone Ymbon. Ki nongkren ha kane ka sngi ki kynthup ïa ka kong Isawanda Laloo, IAS, Deputy Commissioner, South West Khasi Hills District, ka kong A.L. Mawlong, Director of Fisheries, ka kong D.G. Lyngdoh, Superintendent of Fisheries, Mawkyrwat, u bah T. Shangdiar, Acting Myntri, Photjaud-War.
U K.N. Kumar, Additional Chief Secretary of Meghalaya ula ioh ruh ban ai ïa ki tiar donkam ha jingri dohkha (fishing equipments and inputs) sha ka NaRM Group. U bah O.L. Passah, Superintendent Fisheries, East Khasi Hills uba la ai ka jingkren pdiang katba u bah E.K.S. Kharbuki, Fisheries supervisor uba la ai ka jingkren khublei.