Press "Enter" to skip to content

T.2.50 pisa pynhiar dor ka Sorkar MDA ïa ka Petrol bad Diesel ha Meghalaya

Shillong, Risaw, 10: Ka Sorkar Meghalaya Democratic Alliance (MDA) mynta ka sngi balang ka la shim ïa ka rai ban pynhiar dor T.2.50 pisa ïa ka umphniang Petrol bad Diesel ka ban treikam naduh lashai ka sngi palei, 11.10.2018, naduh ka por 11:00 baje mynstep.
U Bah Prestone Tynsong, Symbud Myntri Rangbah ka Jylla ha ka jingïakren bad ki lad pathai khubor hadien ba la wai ka jingïalang Kynhun Myntri u la ong, “ka jingpynhiar ïa ka dor jong ka Umphniang Petrol bad Diesel ka long hadien ba ka Sorkar Pdeng ka la shim ïa ka rai ha ka 5 tarik, Nailar, 2018 ban pynhiar ïa ka dor jong ka Umphniang Petrol bad Diesel da T.2.50 pisa.”
“Da kane ka jingshim rai mynta ka sngi ban pynhiar dor ïa ka umphniang Petrol bad Diesel, ka Sorkar kan hap ban shim ïa ka jingkitkhlieh ban buria ïa ka jinglut jingsep kumba 15 klur ha ka shisnem, ka ban long la kumno kumno 1 klur shi bnai,” ong u Bah Prestone.
Kumba ka long mynta ka dor jong ka Petrol ha Meghalaya ka long T.81.66 shi litar katba ka umphniang Diesel ka long T.74.11 shi litar.
Haba kylli, u la kam ba ïa kane ka rai ban pynhiar ïa ka dor jong ka umphiang Petrol bad Diesel la shim rai hi da ka Sorkar Jylla bad kam dei satia ka jingbthah na ka Sorkar Pdeng. Kumba ka long mynta 11 tylli ki Jylla ba la synshar da ka BJP ha dewbah India ba kynthup ruh ïa ka Assam, ka Tripura bad ka Meghalaya ba la synshar da ka NPP ba ïatreilang bad ka BJP ki la shim ïa kane ka rai ban pynhiar dor ïa ka umphniang Petrol bad Diesel.
U la ong shuh shuh, ïa kane ka pisa kaba la buria ha ka jingpynhiar dor ïa ka umphniang petrol bad diesel, yn sa bthah ïa ki tnat pynmih khajna ka Sorkar kum ka tnat DRDA, Mining and Geology, Forest, Transport bad kiwei kiwei ki tnat ba kin thaw lad thaw lynti ban pynmih pisa ha kaba kin hap ban wanrah ïa ka kaiphod sha ka Kynhun Myntri ban bishar sani bin pa bin.
Ha kane ka sngi, ka jingïalang Kynhun Myntri ba la pynïaid da u Conrad K. Sangma, Myntri Rangbah ka Jylla, ka la shim ruh ïa ka rai ban mynjur ïa ka jingtyrwa jong ka tnat Agriculture ïa ka Meghalaya Subordinate Agriculture and Horticulture Technical Service Rule, ïa ka Meghalaya Agricultre Engineering Mechanical Service Rules, bad ïa ka Meghalaya Agricultre Engineering Mechanical Subordinate Service Rules.