Press "Enter" to skip to content

Thylli ka pla pisa ka sorkar jylla, ympat pyllait ïa ki MLA skhim mynta u snem

Thawlad ka sorkar tang ban ïoh siew beit ia ka tulop ki nongtrei
Shillong, Risaw 10 : Kat kum ka jingtip ba la ïoh lum ka sorkar jylla mynta ka don hapdeng ka jingeh kaba khraw bha namar ka jingduna bad thylli ka pla pisa kat haduh ba la poi sha u pud ban nym pat pyllait ïa ki MLA skhim bad bthah ruh ïa ki myntri sorkar bad ki Chairman bad ki ophisar ruh ban pynduna ka leit jingleit.
Dang ha kine ki khyndiat sngi u myntri rangbah ka jylla u Conrad K Sangma ula pynshisha ïa kane ka jingeh ba ka sorkar ka ïakynduh kata na ka jingduna pisa palat pud. Haba iakren bad ki lad pathai khubor dang ha kine ki khyndiat sngi u la ong “ Ka daw ba ka sorkar ka shim por ban shim rai na ka bynta ban pynhiar dor ïa ka petrol bad diesel ne pynduna ia ka Value Added Taxes (VAT) ka dei namar ba ka jylla ka don hapdeng ka jingduna pisa kaba khraw bha dei na kata ka daw ka hap ban bishar bniah bha na ki laing baroh shwa ban shim ia kano kano ka rai”.
La ioh jingtip ba mynta ym don kawei ruh ka skhim ne project ba thymmai jongka sorkar
namar kane ka jinduna pisa bad kiei ki project kiba treikam mynta ki dei tang kito kiba rim kiba la ïaid lypa ka jingtrei.
Shuh shuh ka tyllong khubor ka ïathuh, ka sorkar mynta ka shu pyrshang beit katba lah ban pynbiang ïa ka pisa tang ban ïoh siew ïa ka tulop jong ki nongtrei sorkar khnang ban lait na kino kino ki kynrum kynram. ïa mynta hi wat ka sorkar pdeng ruh ka khlem pyllait ïa kino kino ki skhim kiba thymmai namar ka la bthah ba dei ban pyndep shwa ïa baroh kiba rim bad hadien kata kan sa mang da kiba thymmai hadien ba la ai ia ka Utilisation Certificate (UC) sha ka sorkar pdeng.
Mynta hi ka sorkar ka la bthah ruh ïa baroh ki myntri sorkar, ki MLA ki Chairman ba kin pynduna ka leit jingleit bad lada ki leit ruh ki hap ban pynlut shwa na ka pla lajong bad hadien kane kin sa ai ïa ka bill khnang baka sorkar kan ïoh ban siew ynda la ïoh pisa.
Kawei na ki daw ba wanrah ka jingduna pisa kaba jur ïa ka jylla Meghalaya ka dei naduh ba khang ïa ka jingtih bad khaïi dewiong ha kane ka jylla da ka National Green Tribunal (NGT) namar na ki khajna ba ka sorkar ka ioh lum bun eh ka dei na u dewiong namar tang na u dewiong ka sorkar ka ïoh lum khajna hapdeng ka 500 klur haduh 1000 klur tyngka ha ka shisnem.