Press "Enter" to skip to content

U Bah Kondro lada u kwah ban ïakren ïa ki jingshisha u dei ban khot jingïalang paidbah: Tobias

Shillong, Risaw : U Bah Tobias Tiewdop, uba long u Secretary barim ka Dorbar Shnong Shella, u la kyntu ïa u Bah Kondro Ksanlah ba lada u kwah ban kren ïa ki jingshisha baroh u dei ban khot da ka jingïalang paidbah ha ka Shnong Shella khnang ban paw shai ki jingshisha baroh.
U Bah Tobias haba pynrem jur ïa u Bah Kondro, ha ka jingïakren bad ki lad pathai khubor ha ka sngi baar mynta ka taiew, u la kynnoh ba ka jingpynshai jong u Bah Kondro Ksanlah sha ki lad pathai khubor ha ka 3 tarik bad 4 tarik mynta u bnai ki dei tang ki jingkren lamwir, kren lamler bad ka jingthok suda.
“Ka jingkam jong u Bah Kondro Ksanlah ba ha ka jingïalang kaba la long ha ka 2 tarik, Risaw, 2018, la don ki dkhot ka Dorbar, ki Seng Longkmie, ki Seng Samla, ki long kiba shu lamler suda baroh,” ula ong bad bynrap, “kiba poi sha kane ka jingïalang ki dei tang ki bahaing hasem jong u Bah Kondro bad jong ki 14 ngut ki Rangbah kiba la shah ïalam bakla ha u Bah Kondro, kiba ïai pyrshah ïa ki rai Dorbar bad ïa ki riti ki dustur ka Shnong Shella.”
“Ka jingkynnoh u Bah Kondro, ba ïa nga la weng shipor na ka kam Secretary da ka Dorbar Shnong Shella, u dei ban pynshisha mardor, ha kajuh ka por u dei ban ai ïa ki Proceeding jong ka Dorbar,” la dawa u Bah Tobias bad bynrap shuh shuh, “hynrei ïa nga la sospon da u Acting Wahadadar da ka jingïalam bakla u Bah Kondro ryngkat ki 14 ngut ki rangbah da ki buit thok buit shukor. Hynrei kane ka jingsospon jong u (Acting Wahadadar) ka long be-aiñ namar ha ka 6 tarik, Kyllalyngkot, 14, u Acting Wahadadar u la weng hi ïa kane, kumjuh ka Meghalaya High Court, katkum ka hukum (order) 2 tarik, Nohprah, 2014, la pynrem ïa u Acting Wahadadar, Shella Confederacy ba um lah ban sospon ïa ka Dorbar bad ïa u Secretary bad ïa ki nongkitkam ka Dorbar.”
“Namarba ngi trei ïa ki kam kiba long pyrshah ïa ki (14 ngut ki rangbah ba la ïalam da u Bah Kondro), da kaba wanrah ïa ka pisa kaba la pynjah ha ka por jong ki, kaba long T.24 lak, la kyntiew ïa ka pisa ba dei ban siew da ka kompani Lafarge na ka T.30 lak sha ka T.1 klur, ka jingpynkiew tulop ïa ki nongtrei trai shnong Shella kiba trei bad ka Lafarge bad ïakren ruh ha ka Dorbar ban ïapynbeit ïa u pud u sam ha ki jaka ba trei ka Kompani Lafarge,” u la ong bad bynrap, “dei halor kine ki nongrim ba kine ki 14 ngut ki rangbah ki ieng pyrshah ïa nga bad kim kwah ban ïasuk namar ki tieng ban don ma ngi ha ka Dorbar.”
U la ong shuh shuh, “ka jingkynnoh ba ki kynthei bad ki longkmie ki wan khang ne pynthud ïa kine ki 14 ngut hapoh ka jingïalam jong u John Stalin Youroi, Assistant Secretary ban pynlong ïa ka dorbar ka dei namarba kim lah shah shuh ïa ki jingleh jong ki, kim banse ban mih pyrthei ban ieng pyrshah.”