Press "Enter" to skip to content

Yn mihkhmat Balaphrang bad Jessica ïa ka India sha Thailand

Shillong 10 Risaw: Ar ngut ki nongpyni dohksah ka jylla kynthup u Bah Ba-laphrang Kharshiing bad Jessica Bamon, ki la shah jied ban mihkhmat sha ka rynsan ïa pyni dohksah ka Body Building and Best Physique Champion kaban long ha Thailand ha u Nohprah ban wan.
Kine ar ngut ki la shah jied ban mihkhmat na ka ri India, bad ki dei napdeng ki 36 ngut. Ka jingshah jied jong ki, ka long hadien ba ki khur takma na ka rynsan ïakob 52nd Asian Body Building bad Best Physique Champion kaba long ha Pune naduh ka 2-7 tarik Risaw myna u snem.
Haba kren sha ki nongthoh khubor mynta ka sngi, u Bah Arnold M Lanong General Secretary ka Meghalaya Body Builders Association (MBBA) u la ïathuh ba kane ka jingleit jong ki sha katei ka rynsan ïakhun, ka donkam shibun ka jinglut bad namar kane, ki la donkam ban noh syn-ñiang lem ki riew don mynsiem bad khamtam ka sorkar, kaba khlem pat ai jingïarap eiei ha kine ki snem, wat la ki la dep ban buh jingthoh na ka tnad ïalehkai ka jylla.
Ki nongïalam ka seng, ki la kam ba ha kine ki ar snem ba la dep, ka seng kam ju ioh jingïarap eiei na ka sorkar wat ha ka jingshisha, ki la phah ia ka jingthoh sha ka sorkar namar ba ka la ai daw ba kam don pisa bad kawei pat ka dei namar ba kam dei ka jingïalehkai ba rung ha ka Olympic.
Kane ka seng ka dei ruh kaba la ithuh da ka Meghalaya State Olympic Association (MSOA) bad ka la pynïasoh bad ka IBBF.
Ka kong Jessica kawei na ki thei pyni ksah, ka la ong ba lada ka sorkar kan ai jingïarap pisa, kan pynlah ïa ki ban leit shim bynta shabar bad kane ka khring ïa kiwei bad kum noh kan pynpaw nam ïa ka jylla Meghalaya namar ba haba ki leit shabar kim don ba bna ïa ka jylla Meghalaya lane ïa ka Shillong.
Katba u Bah Balap-hrang Kharshïing u la ong ba na kane ka jylla, dei tang ma u, uba la ju leit ïashim bynta shabar bad kiwei kham niar. U la ong ba bun ki samla kiba ïashim bynta ha kane ka jingïalehkai hynrei namar ba ki leit ïasoh ha ki seng bym ithuh ka IBBF, ka la pynlong ïa ki ban duh lad ban leit ïashim bynta ha ki rynsan.
Ha kawei ka MBBA kan pynlong ïa ka jing-ïalehkai pyni dohksah kaba 44 ne ka 44th State Body Building and Yoga Cham-pionship ha kane ka 13 tarik mynta u bnai ha Aurobindo Institute of Indian Culture kaba don ha Bivar Road, Shillong.