Press "Enter" to skip to content

Byrngem ïakhih ka KDA bym pyllait ka Sorkar ïa ka baibam

Shillong, Risaw, 11: Ki briew kiba don jingduna ha ki dkhotmet ki la byrngem ban pynlong da ka jingïakhih paidbah halor ka jingpynslem jong ka Sorkar Jylla ban pyllait ïa ka baibam kaba T.500 shi bnai ka la kynjoh mynta sha ka shi snem hynñiew bnai.
Ka Khasi Disabilities Association (KDA) ha u kyrwoh ba la phah mynta ka sngi lyngba u President, Bah Starwin Kharjana ka la ong, “la shisnem hynñiew bnai kata naduh 1 tarik, Ïaiong, 2017 haduh mynta
ki briew kiba don ka jingduna ha ki dkhot met kim pat ïoh ïa ka baibam kaba ki ju ïoh T.500 shi bnai na ka Chief Minister’s Social Assistance Scheme for Persons with Disabilities.”
“Ngi la ïakynduh la arsien kynthih ïa u Myntri Rangbah, u Conrad K Sangma bad shisien ïa u Myntri ka tnat Social Welfare u Ma Kyrmen Shylla, ki la ong ban pyllait noh, hynrei haduh mynta ki khlem patiaw,” ong u kyrwoh na ka KDA.
“Ka KDA kan ap haduh 30 tarik mynta u bnai, lada ka Sorkar ka dang ïai sngap mynthi ngim banse ban pynlong da ka jingïakhih ban pynbor ïa ka Sorkar ban pyllait noh ïa ka hok jong ki briew kiba don ka jingduna ha ki dkhot met ha ka jylla,” la bynrap u kyrwoh.
“Balei ko Sorkar phi ibeiñ ïa ngi kiba Dkoh, Matlah, Kyllut bad ba duna bor Pyrkhat, hato dei ba ngi tlot bor mo ba phim ju pyrkhat,” la ong shuh shuh u kyrwoh na ka KDA.