Press "Enter" to skip to content

Ïoh pdiang ka Seng Kynthei Lapalang ïa ka khusnam ‘Glory of India’

Shillong, Risaw, 10: Ka Seng Kynthei Lapalang, Shillong kaba la trei shitom met bad mynsiem ban peitngor ïa ka bha ka miat jong ka shnong ka thaw ka la ïoh pdiang ïa ka khusnam ‘Glory of India’ (Gold Medalist) na ka Best Citizen Publishing House (BCPH).
I Kong Kelin Sohshang, iba la kit lyngkor ïa ka kam President naduh ba la pynkha ïa ka Seng Kynthei ha u snem 1999 ha ka jingïakren bad u Mawphor i la ïathuh ba im shym la lah ban leit pdiang ïa kane ka khusnam ba la ai ha Bangkok ha ka 5 tarik, ïaiong, 2018, kumta, ki bor pynïaid ki la phah lyngba ka Post ïa ka khusnam.
Haba ïathuh ïa u syniang u bynhei ba ka Seng Kynthei ka la noh sha u sup u thiar ka imlang ka sahlang, i la ong, ka Seng Kynthei Lapapalang ka la sdang nyngkong eh ïa ka jingtreikam da ka jingkhynra die Kyiad be-aiñ ha ka shnong Lapalang bad la lah ruh ban khang khyrdep haduh 23 tylli ki dukan die kyiad be-aiñ hapoh shnong.
“Ngim banse ban mih sha surok namar ngi ïohi ba ka kyiad ka la pynjot haduh katta katta ïa ki Longkpa, ki Longkmie, bad ki samla haduh ba kim tip shuh ïa ka iing ka sem,” ong i Kong Sohshang.
“Naduh u snem 1999 ba la sdang ka jingtreikam, ka Seng Kynthei ka lah ruh ban rat dyngkhong ïa u drok,” i la ong.
I ïathuh ruh ba kawei na ki kam radbah jong ka Seng Kynthei ka dei ka jinglah ban pynkohnguh ïa ki shipai ka Gorkha Regiment kiba la kyntur pud be-aiñ khlem da burom shuh wat ïa ki iing ki sem jong ki briew.
Katkum ka jingïathuh i Kong Sohshang, ki shipai ka Gorkha Regiment ki la pyrshang ban knieh jubor ïa ki jaka paidbah ka Lapalang kiba don markhap hynrei da ka jingïakhun tyngeh jong ka Seng Kynthei, ka Dorbar Shnong bad da ka jingïarap jong u Bah Patty Ripplie Kyndiah mynba u dang long u MP ka Lok Sabha, la lah ban kbum bad pynkohnguh ïa ki shipai ban sangeh na ka jingkyntur pud.
“Ha katei ka por, ngi la ïakhun tyngeh bad ki shipai kiba wan sieh da ki lama shabar jong ka jingker sainar na u pud u sam lajong sha ki jaka paidbah kat haduh ba ka la mih ka jingïapyni bor. Don ruh napdeng ki trai jaka kiba la ïam rangbah na ka jingkyntur pud u shipai. Ngi la jop da ka jingïarap jong i Bah Ripple bad ngi la leit wat shaduh New Delhi ban pynsngew sha ka Sorkar Pdeng tad haduh ba ngin da jop,” la ïathuh i Kong Sohshang.
“Ka don ruh ka jaka ba la wan buhai shnong da ki Nepali hangne ha Lapalang kiba kam ba ka khyndew ka dei ka nongkynti jong ka Cantonment kat haduh ba u shipai u wan thung mawpud. Ïa kane ruh ngi la ïakhun ngi la jop bad ngi la ïohlad ban ai pateng pat sha ki 5 ngut longkmie kiba duk ban shna iing,” la ïathuh kane ka President ka Seng Kynthei.
Shuh shuh i la ïathuh ba ka Seng Kynthei ka la jop ruh ïa ka jingpynlong jaka thang briew jong ki jaidbynriew Bengalee ha shnong Lapalang kaba la ktah ïa ka koit ka khiah ki paidbah.
“Hadien ba la ïoh ujor ngi la tohkit bad lap ba ki Bengalee ki ladep register ïa kane ka jaka thang briew. U Rangbah Shnong u la pynpaw ba ym lah leh eiei shuh. Marmar ngi la phah da ka jingthoh sha Delhi sha u MP ka Shillong Lok Sabha Constituency namar ngi lap ba don haduh 6 ngut ruh ha ka shi sngi ki dang thang briew,” ong Kong Sohshang iba la don bynta ha ka kam shakri paidbah la 19 snem.
“Ngi la ïakren bad phah jingthoh sha u Deputy Commissioner ban weng noh ïa kane ka jingthang briew. Ngi la jop, namar ngi lap ba ki Bengalee ki thok ba ki thang tang ïa kiba shong basah ha RR Colony hynrei ki wanrah pynban ïa kiba ïap na Demseiñiong bad na kiwei kiwei ki jaka,” i la ong shuh shuh.
I la ïathuh ruh ba ka Seng Kynthei ka la pyllait im wat ïa ki kynthei bar jylla kiba la mad wat ïa ka apot ban shah thang im ha u kurim lajong. “Ki bun ki jingujor ba ngi ïoh man ka sngi, don kiba wan ud ba u lok um ai baikhaw, kiba shah shoh lok. Ngi ïarap ïa kine ki riewkynthei bad ngi pynsoi da ka Soskular ba u Lok um dei satia ban pynshitom lada um lah ban ri hok,” i la ïathuh.
Haba kylli, i la ïathuh ba ka Seng Kynthei ka la pynduhjait ruh ïa ka jingdih kynja, ka khalai, ka ïathong. “Mynshwa ki samla wat tang ban leit thied jingthied sha Rynjah kim ju nud namar ba don ki nongdih kynja bad ka shnong Lapalang ka dap tang da ki nongbuaid, ki riewsniew bad ki nonglute,” i la ong.
“Ngi pynlong ka jingap ktem bad ngi la kem ïa ki nongleh kam bymman kat haduh ban da pynduhjait ïa ki riewsniew. Wat ha ka sngi lehniam Khristmas bad New Year ruh ngim ju thiah hynrei ngi ïaid pahara ïa ki lynti shnong baroh shimiet haduh ban da shai,” i la ong shuh shuh.
Ha kaba ïadei bad u drok, i la ïathuh ki don ki briew kiba ka Seng Kynthei ka suba hynrei haduh mynta kam pat ïoh satia ban kem hynrei watla katta ka seng kam shong kli kti hynrei kan peitngor ba une u jingdih um dei ban rung hapoh shnong.
I ïathuh ruh ba ka Seng Kynthei ka la phaikhmat eh khamtam sha ki kynthei bad ki longmie kiba duk bad ki khunswet kiba mad ïa ki jingjynjar.
“Ka Seng Kynthei ka la pynshlur ïa ki Longkmie da kaba jinghikai shna Umsoh, Achar, suhjaiñ lyngba ka jingïarap jong ka tnat Planning ka Sorkar Jylla bad ngi la phah leit shah hikai pynbtit ruh ïa ki longkmie ha ka ri syiar, ri masi, ri sniang sha Kyrdem Kulai bad ngi la pynshlur ruh ïa ki longkmie wat ha ka rep ka riang, hynrei kiba bun kim sngewtynnat ïa kine ki kam trei pynban ki pynpaw ba ki sngewtynnat ban leit bylla sngi,” i la ong shuh shuh.
Kawei na u synniang baradbah jong ka Seng Kynthei Lapalang ka dei ka jingseng ïa ka skul ba la jer kyrteng ‘Little Angel’ na ka bynta ki khynnah kiba wan na ki longiing kiba duk ha kaba la pynlong skul ha Cummunity Hall bad siew tulop ïa ki nonghikai da ka Seng.
“Kham hadien ka Shnong ka la shimti noh ban pynïaid hi halade ïa kane ka skul kaba la poi mynta haduh ka kyrdan Class-X,” la bynrap i Kong Listily Bareh, Secretary ka Seng Kynthei.