Press "Enter" to skip to content

Angnud ka UDP ban pynbna ïa u kyrtong Elekshon MP ka Party kum u kyrtong ka MDA

Shillong, Risaw 16: Ka United Democratic Party (UDP) kaba dei ka seng riewlum ba hehduh ha Jylla, kala rai ban pynbna noh ha ka 31 tarik Risaw ïa u kyrtong jong ka Party sha ka elekshon MP-Lok Sabha 2019 na Shillong Constituency haba pynpaw ruh ïa ka jingangnud ban pynlong ïa une u kyrtong kum u kyrtong iamonlang jong ka kynhun synrop Meghalaya Democratic Alliance (MDA).
Ka UDP kala rai ruh ban sa phah shen ïa ka jingtyrwa ïa u kyrtong iamon lang sha ka National Peoples Party (NPP) bad sha baroh ki seng riewlum (PDF,HSPDP, KHNAM) ba kin ai lem ïa ka jingkyrshan haba buh hakhmat ïa ka jingkongsan ban pynlong ïa ka Sorkar MDA kaba skhem.
Ka UDP kaba dei ka Party ba ar ha ka jingbun paid hapoh ka Sorkar MDA, kala dep buh teng ïa ka
kyndon ba ka NPP ka dei ban ïakhun ïa ka elekshon MP-Lok Sabha tang na Tura Parliamentary Seat katba ïa ka Shillong Parliamentary Seat pat kan leit sha ka UDP.
Kane ka rai jong ka UDP kala mih na ka jingïalang jong ka State Election Committee (SEC) ba long hynne ka sngi ha kaba u Working President ka Party Bah Bindo M Lanong, ula pyntip ruh ha ki Nongthoh Khubor ba ka jingïalang kala pdiang ïa ka jingpan ticket jong ki arngut ki Nongïalam jong ka Party na ka bynta ka elekshon MP-Lok Sabha na Shillong Constituency.
Kine ki arngut ki Nongïalam ki dei u Bah Paul Lyngdoh Working President ka Party, uba la long MLA la ar samoi na West Shillong Constituency bad u Dr Jemino Mawthoh, MLA barim ka Nongthymmai Constituency uba bat ruh ïa ka kam General Secretary ha ka UDP.
Lah ban kdew hangne ba u Bah Paul Lyngdoh ula ïakhun ïa ka elekshon MP-Lok Sabha 2014 hynrei u khlem kynjoh satia sha ka thong ka jingjop.“Baroh arngut kila pynpaw ba ki kwah ban ïakhun ïa ka elekshon Lok Sabha. Namar kata, ngi la rai ban buh ïa ak 31 tarik Risaw kum ka sngi ban shim ïa ka rai ba khatduh halor u kyrtong jong ka Party napdeng kine ki arngut” ong u Bah Bindo.
Une u Working President bala rangbah jong ka UDP, ula pyntip ruh ba ka Party kan sa phah noh mar mar ïa ka jingtyrwa sha ka NPP halor kane ka kam. “Ka jingtyrwa jong ki ka longba ka NPP kan pynieng kyrteng tang na Tura Constituency bad ba kan kyr shan ïa ka UDP na ka Shillong Constituency” ula ong.
U Bah Bindo uba la bat teng kum u Symbud Myntri Rangbah bad Lamphang ka Ïingdorbar Thaw Aiñ ka Jylla, ula pyntip ba ka UDP kala rai ruh ban sa ïakren ïa baroh ki seng riewlum ka Jylla ba kynthup ïa ka Hill State People’s Democratic Party (HSPDP), People’s Democratic Front (PDF) bad ka Khun Hynniewtrep National Awakening Movement (KHNAM) ba kin ai ïa ka jingkyrshan ïa u kyrtong ka UDP kum u kyrtong iamonlang jongka MDA.
“Shen ngin sa shong ïasyllok bad kiwei kiwei ki seng riewlum halor kane ka kam khamtam lei ha HSPDP kaba la ïatreilang bad ngi ha ka Regional Democratic Alliance (kaba la thaw hadien ka elekshon MLA ba dang shu dep)” ong u Bah Bindo.
Hynrei ka Bharatiya Janata Party (BJP) kaba dei kawei na ki Party ba ïatreilang ha ka kynhun MDA, dang shen kala pynpaw ba kan sei ïala u jong u kyrtong ha ka elekshon Lok Sabha la ka dei ha Shillong ne Tura haba pynpaw ruh ba ka jingtyrwa ban sei ïa u kyrtong iamon lang ka lah ban nym treikam satia ha ka elekshon Lok Sabha ban wan.
Haba kylli ïa kane, u Bah Bindo ula ong “Watla ngim lah ban khang iano iano ruh ba kin pynieng ïala u jong u kyrtong ha ka elekshon Lok Sabha, hynrei kan bha shibun lada ka don ka jingïasngewthuh jingmut lang hapdeng ki seng riewlum namar ka jing skhem bad jingkhlaiñ jong ka MDA ka dei ka kam ba kham kongsan eh”.
“Kane kan tehlakam ruh ïa ka jingiamutdur kai jong uba bun balang lada baroh ki paralok ha ka MDA ki rai ban pynieng ïala u jong u kyrtong ha ka elekshon ban wan. Ha nga hi shimet,nga sngew ba ngi don jingkyrmen bha ban jop na baroh artylli ki Constituency lada ngi don ïa u kyrtong iamonlang” ula ong.
Haba jubab ïa ka jingkylli, une u Nongïalam ka UDP ula ong biang ba ka jingbym don ka jingïasngewthuh jingmut hapdeng ki paralok ba ïatreilang ha ka kynhun synrop MDA ka lah banktah shibun bad wanrah ruh ïa ka jingsynjor ha ka sorkar MDA.
Ha kawei pat ka liang, u General Secretary ka UDP Dr Jemino Mawthoh ula ong ba ka Party ka ngeit skhem ba ka jingtyrwa ban wanrah ïa u kyrtong iamonlang kan long kaba seisoh.
“Ngi sngewthuh ba baroh ki Political Party ki donkam ban pyni ïala ka jingkhlaiñ hynrei lada ka jingïakren hi ka don, ngi don ka jingngeit ba skhem ba ngin lah ban pynurlong ïa ka kam” ula ong haba pyntip ba ka UDP kan sa thoh noh shen sha baroh ki paralok kiba ïatreilang ha ka MDA.
Lah ban kdew hangne ba ka kynhun synrop MDA ka kynthup ïa 6 tylli ki Political Party bad kine ki dei ka NPP, UDP, PDF, HSPDP, BJP bad ka NCP nalor ki MLA shimet.