Press "Enter" to skip to content

Dawa ki Nongsynshar na ka NCST ban pynrung ktien Khasi ha ka khyrnit ba phra

Nongstoiñ, Risaw 16: Ki khlieh Nongsynshar naduh u Syiem ka Hima Nongstoiñ, ki Rangbah Shnong, ki sordar shnong jong ki shnong bapher bapher, ki la pynsngew bad ai jingthoh hakhmat u Hari Krishna Damor dkhot jong ka National Commission for Scheduled Tribe (NCST), ban pynrung noh ïa ka ktien Khasi ha ka khyrnit kaba phra jong ka riti synshar.
Kane ka jingdawa jong ki nongsynshar shnong ka la jia long hynnin ka sngi ba u Hari Krishna Damor u hiar jngoh ïa ki Nongsynshar jong ka Nongstoiñ ryngkat ka jingsynran lang jong u S.P.Meena Assistant Director.
Ha ka jingïakynduh ba la donlang ruh da u DC, SP bad ki Ophisar jong ka District ha Circuit House Nongstoiñ, ka la don ka jingïaphyllïew jingmut na u Syiem, ki sordar bad ki dkhot jong ka Commission. Hynrei u Hari Damor u la kyrpad ïa ki ba kin thoh sha ka Commssion ha kaba ïa dei bad ki jingeh kaba ki la pyni kum ka jingpynrung noh ïa ka ktien khasi ha ka khyrnit kaba phra. Nangta ki jingeh ha kaba ïadei bad ka jingbym pat don ki surok sha ki shnong kiba kham sha kyndong, ka jingbym biang ka light, ki street light, ka um bam um dih bad kiwei kiwei. U la kular ba un sa ïa kren bad ka sorkar kmie lyngba u Chairman jong ka Commission.
Hynne ka sngi pat, u Damor bad u Meena ki la pynlong ïa ka jingïakynduh bad ki ophisar jong ki tnad sorkar bapher bapher jong ka Nongstoiñ hapoh Conference Hall DC office Nongstoiñ. Hangne, la ïakren ïa shibun ki mat bad la ïoh ban ïatai ban ïakren ha kaba ïadei bad ka scholarship jong ki khynnah skul hapoh ka District, ki hostel na ka bynta ki shynrang bad kynthei, ka mid-day meal, PDS bad kiwei kiwei.
Na ka liang ki ophisar ki la kyrpad ïa kitei ki dkhot jong ka Commission ba kin pynbha bad pynjanai ïa ki kyndon ba la buh da ka sorkar pdeng, katkum ka rukom im ki nongshong shnong, ka jaka, ka jinglong tynrai jong ka thaiñ kaba hap hapoh North East jong ka ri India. La ïoh ban aiti ruh ïa ka memorandum da ki nongïalam shnong ban pyni ïa ki jingeh bad jingshitom ba la shem da ki nongshong shnong kiba donkam kyrkieh ban tuklar da ka NCST.