Press "Enter" to skip to content

Kiar na ka shongkha khynnah bad na ki Drok, kyntu u MLA

Nongpoh, Risaw, 16: Haba leit ban shim bynta kum u kongsan ban kren ha ka jingrakhe ïa ka sngi jong ki Kmie ki Kpa (Parent’s Day) ba la pynlong da ka RCUP School Pahammawleiñ mynta ka sngi ha Pahammawleiñ, u MLA ka Nongpoh u la ong ba bun na ki khynnah skul ki jot noh ka jingim bad ki pep skul ruh tang shiteng por dei namar ka shongkha khynnah bad ka jingkyrni ha ka jingdih drok bad kiwei kiwei ki jingmlien ba sniew.
Kum u nongmihkhmat, u Bah Mayral Born Syiem u la ong ruh ba ka jingrakhe ne ka jingkynduh lang jong ki kmie ki kpa, ki nonghikai bad ki khynnah skul ka long kaba donkam haduh katta katta, namar ha kum kane ka por lah ban pynsngewthuh ïa ki khun bad ruh ban don lang kata ka jingkitkhlieh kumno ban tei ïa ka lawei ba phyrnai jong ki khun ki kti.
U la pynsngewthuh ruh ïa ki kmie ki kpa bad ki nonghikai halor ka jingktah jong ka shongkha khynnah bad ruh ka jingkyrni ki khynnah ha ka jingdih drok. Ka daw kaba la pynlong ïa ki ban ngat ha kitei ki jingmlien ba sniew ka dei namar ba duna kata ka jingsneng jingkraw naduh ing haduh ha skul bad kam don ruh kata ka jingïatrei lang kumno ban saiñdur ïa ka lawei jong ki khun ki kti, u la ong.
“Bun ki khynnah ki hap ban pep skul noh tang shiteng por bad ki hap ban mad ïa ka lawei kaba dum ha ka jingim, dei namar ka shongkha khynnah bad ruh don ki khynnah kiba la kyrni ha ka dih drok bad kiwei kiwei ki jingdih basniew” ong u Bah Mayral Born Syiem, bad bynrap ba lada ki kmie ki kpa bad ki nonghikai ki angnud ban saiñdur ïa ki khynnah ki dei ban shim ïa ka jingkitkhlieh na ka bynta ban peitngor ba kum ki khynnah kim dei ban ngat ha ka tyrsim jong u drok bad ruh ka shongkha khynnah ba wat ka ri ka khein beaiñ bad ki pynshitom ïa ki khynnah kiba shongkha khynnah, u la bynrap.
Ha kane kajuh ka por, u Bah Syiem u la kyntu ruh ban don kata ka jingïatrei lang na ka bynta ban ïada ïa ka mariang, namar kane ruh ka dei kawei ka jingma ba la kren ha kylleng ka pyrthei halor ka jingpynjulor pathar ïa ka mariang, ha kaba lada ngim lah ban ïada kan wan rah ka jingma kaba khraw ha ka pateng ban sa wan, u la bynrap.
Na ka liang u Assistant Parish Priest ka Byrnihat, u Fr. Lamphrang Marbaniang haba kren ha kane ka sngi kum u symbut kongsan, u la kren halor ka jingpyndonkam ban peitngor na ka jingpyndonkam bakla ïa ki internet bad ki Mobile, ha kaba bun ki khun ki kti ki la jot ka jingim namar ba kim nang ban pyndonkam ïa ki jingmyntoi ba ki ïoh na ka Internet bad ki Mobile. Lyngba jong kane ka sngi, ka la long ruh ka jingkmen naduh ki Nonghikai bad khamtam ki Kmie ki Kpa ban ïohi ba ki khun ki don ïa ki sap bapher ha ka rwai ka siaw, ka tem ka pud bad ka shad ka kmen ba ki la pynsngewbha ïa ki Kmie ki kpa ban sei la ki sap shi bynta ban burom ïa kane ka sngi kyrpang jong ki Kmie ki Kpa.
La sakhi lang ruh ha kane ka sngi da ka jingdon lang u Rangbah Shnong, u Bah Jayand Sylliang, ki riew rangbah ba kynthup ïa u Bah Plielad Tiewsoh, u Bah Balajied Rani bad kynthup ruh ki riew rangbah bad ki paidbah nongshong shnong ka Pahammaleiñ.
Ha kane ka sngi na ka laing ka RCUP School, Pahammawleiñ ka la phah ruh ïa ka Dorkhas sha u MLA ba kynthup ïa ka jingdonkam ka Additional Class Room, ka Basketball Court, ka Footpath bad ka surok rong bad na ka liang u MLA u la kular ban shim khia bad khamtam ka Basketball Court ba kaba long ka jingdonkam ba hakhmat kumba la pynpaw da ki bor pynïaid jong ka skul.