Press "Enter" to skip to content

Leh beijot u rangbah ïa ka khynnah, ka don hapdeng ka jingbym tip briew

Dawa ka SCPCR ban kem i’u Nongleh bymman

Shillong, Risaw 16 : Kawei ka heprit ba dang 8 snem ka rta ka la shah leh beijot ha uwei u rangbah briew uba la don 3 ngut ei ei ki khun uba la 35 snem tam ei ei ka rta uba kyrteng u Riling Bamon bad kane ka la jia ha kawei ka shnong ha East Jaintia Hills bad na katei ka jingjia ka la ktah ia ka bor jingmut jingpyrkhat jongka mynta.
Haba ïakren bad kiba haïing ki la ïathuh kane ka jingjia ka la jia naduh ka 25 tarik u Nailar mynta u snem ha ka por 5 baje janmiet. Utei u briew uba dei u kynjah pakhynnah hi jong kane ka heprit u la wan sha ïing bad khot ïa kane ka heprit ban leit thied jingbam na dukan. Ma ka da ka jingshaniah ka la
leit lang hynrei u la patan pynban ïa ka sha ki sanium khlaw bad leh beijot ïa ka. Hadien kane u la byrngem byrsit ïa ka ba kam bit ban ïathuh hano hano ruh ïa kaei kaba u la leh bad lada ka ïathuh un sa pyniap ïa ka bad ïa ka para jongka.
Kane kaba pli ka heprit ka la sheptieng that bad katei ka jingjia ïa ka ka la pynlong ïa ka ban shu kyndit ruma bad lyniar beit ha ka por miet ne mynsngi ruh namar ka la pynphieng palat ïa ka. Hadien kumba ar taiew ei ei ma ka bad kawei pat ka para ki la phet noh na shnong bad wan sah noh bad ka hymmen arkmie ha Khliehriat. Haba u kni uba sah hi ha Khliehriat u la ïohi ïa ki baroh arngut ba ki don ha ka ïing jong ka pyrsa jongu u la kylli bad tohkit bniah na ki bad dei ha katei ka por ba ka la phla ïa kaei kaba la jia ïa ka bad kim nud shuh ban sah ha la shnong namar ba ki sheptieng ïa utei u briew. Kumta u ma ma u la khot sah noh ïa ka sha ïing jongu ha Khliehriat.
Ha ka 3 tarik Nailur mynta u snem katba ki khun ki kti jong u ki la leit skul lut bad don sa tang ki rangbah ba ap ïing bad treikam ïing, kane ka khynnah ruh ym tip ka mih ïaleh kai shabar ne ka kiew sha ki mala ba shalor jong ka ïing hynrei ha ka por 11 baje ei ei mynstep la don ba lap ba ka la shu thiah lyngktar khlem jingtip briew shuh ha nala surok kaba hajan ïing . Kiba haïing ki la ïathuh ba ka la mynsaw jur bha na ki bynta jong ka khlieh namar la shu phlei snam lut na khlieh,khmut, shkor, khmat bad shyntur ruh. Kumta u kni bad kiba haïing ki la wan kit noh ïa ka shane sha Woodland Hospital, Shillong. Ka la thiah ha katei ka hospital 4 sngi ha ICU hynrei ka khlem tip briew hi, namar ba ki dei na ka long ïing ba duk bad ym lah ban kyrda kumta la hap ban pynmih noh ïa ka na hospital bad kit sha iing kiba ha ïing ha Khliehriat.
La ïathuh haduh mynta ka sngi ruh kam pat tip briew satia tangba la shu sumar noh ïa ka ha ïing.
Na ka liang ka State Commission for Protection of Child Rights (SCPCR) haba shimkhia ïa ka jingtip halor ka jingshah leh be-ijot jong ine i Heprit 8 snem ha kawei ka Shnong ha East Jaiñtia Hills, kala bthah ïa u District Child Protection Officer (DCPO) ka District ban tynruh ïa ki Bor Pulit ba kin kem mardor ïa u nongleh bymman bad ban pynngat ha ki kyndon ka POCSO Act. La ïathuh ba une u briew ula phetrieh mynta ban lait na ka jingshah kem ha ki Pulit.
“Ngi la ïoh jingtip ïa kane ka jingjia bad kat kum ki jingtip ba ngi ïoh, kala don ruh ka jingpyrshang na ka liang jong u shynrang ban ïakren ïasuk halor kane ka jingjia” ong i Kong Meena Kharkongor, Chairperson ka SCPCR.
Haba ïathuh ba mar syn ïoh jingtip ïa kane ka jingjia, ila bthah ïa u DCPO ban wad jingtip ba thikna, i Kong Meena ila ïathuh ba u DCPO ula leit ïakynduh ïa ki Heh Pulit ka District ban lum jingtip bad ula buh ruh ka jingkyntu ba ki Pulit ki dei ban thwet bad kem mardor ïa u briew ba donkti ha kane ka kam”.
I Kong Meena i ïathuh ba kat kum ka jingtip ba ila ïoh lum, une u briew ba leh beijot ia ine i Heprit ula phetrieh mynta na Shnong ban kiar na ka jingshah kem ha ki Pulit.
Kat kum ka jingong jong i, ki bahaïing kila dep ruh ban ujor da ka ejahar sha ki Pulit halor kane ka jingjia, kaba la poi mynta wat sha ka jingtip jong ka Child Welfare Committee (CWC) ka District.
“Ka SCPCR kan buddien ïa kane ka kam bad kan pynthikna ba ki Pulit kim dei ban leh sting ïa ki case kiba hap hapoh ka POCSO Act” ong i Kong Meena.