Press "Enter" to skip to content

Mudui ejahar i Kong Silbi Passah sha ki Pulit ba shah kren tohmet ha Facebook

Shillong, Risaw, 16: I Kong Silbi Passah, iwei na ki nongthaw jingrwai Khasi tynrai ba la pawnam bha ha ka Jylla mynta ka sngi baar i la mudui da ka ejahar sha ki pulit ka Lumdiengjri Police Station pyrshah ïa ki briew kiba donkti ban kren tohmet bad kynthoh pyrshah ïa i ha ka sla ‘Facebook’ ba la ai kyrteng, “Na Lyngwiar Dpei u Hynñiewtrep.”
Kane ka jingshah kren tohmet i Kong Silbi Passah ka long halor ka jingleit ïashim bynta ka kynhun shad tynrai jong i ha ka jingleh burom ïa ki shipai kiba la pha ïa la ka jingim na ka bynta
ban ïada ïa ka ri ba la pynlong da ka Rilbong Durga Puja Committee (RDPC) ha ka sngi u Blei mynta ka taiew ha Rilbong, Shillong.
Haba sot ïa ka jingkren tohmet pyrshah ïa i Kong Silbi Passah ha ka sla Facebook, “Na Lyngwiar Dpei u Hynñiewtrep” la thoh, “Ha ka prokram Durga Puja u khar Hindu, ïashim bynta lehkmen ki thei Khasi naba dei ka aiom puja u khar pohjait. Ka kynhun ka Kong Silbi Passah ryngkat ka jingshad bad riam tynrai kaba la long mynhinnin ka sngi ha Rilbong. Ha ka prokram puja, da ki riam shad khasi tynrai….Don aiu ha lyndet? Khasi Tynrai=Khar Hindu????” Ïa kane ka jingkren tohmet ha ka sla Facebook “Na Na Lyngwiar Dpei u Hynñiewtrep” la pynmih ha ka 15 tarik mynta u bnai ha ka por 8:30 baje mynmiet.
Ha ka jingïakren bad u Mawphor, i Kong Silbi i la ong, ‘nga sngewsih bha ki ong ba nga leit mihkhmat ïa ka Puja katba ka prokram ka dei ka jingleh burom ïa ki shipai kiba la aiti ïa ka jingim ban ïada ïa ka ri.”
“Nga da sngewsih haduh katta katta ba ki kynthoh ïa ka kynhun jong nga namar nga leit ïashim bynta ha katei ka jingleh burom namar ka dei ka jingkhot sngewbha ki nongpynïaid ban kynmaw burom kyrpang ïa ki shipai jong ka ri kiba la khladnoh ha kaba u Lat ka Jylla u la long u Kongsan,” la ong shuh shuh i Kong Silbi.
I Kong Silbi iba la ïoh ruh ïa ka khusnam Tirot Sing na ka Sorkar Meghalaya ha u snem 2014 bad kiwei kiwei ki khusnam ha ki snem ba la leit lyngba u synniang ba i la noh sha u sup u thiar jong ka rwai ka siaw bad ka thoh ka tar ha ka Jylla, i la ong shuh shuh, “la 30 snem nga la trei ban kyntiew ïa ka shad ka kmen lyngba ki jingrwai ha ka sur tynrai bad ka jingshad tynrai kaba nga da wad bniah na ki Khanatang ym ju don eiei ruh em. Hynrei kum kine ki jingkynthoh ki long kum ka jingtheh umpjah ïa ki jingtrei shitom kiba ngam don jingïohnong eiei ruh em.”
I la ïathuh ba ka jingshad tynrai ba la ai kyrteng “jingshad ïada da ka stieh” ba la shad da ka kynhun jong i ha katei ka sngi u Blei ka la ïoh jingïaroh na baroh kiba sakhi ha kane ka sngi.