Press "Enter" to skip to content

Pynksan ka High Court sha ka liang u Pandit trai ri, jai jai ka jinglong jingman ka Nartiang

Jowai, Risaw 16: Hadien ka jinghuri hura bad ka jingkulmar kaba mih hynne ka shiteng synïa ha Nartiang Temple kaba la wanrah ka jingmynsaw ïaki Pulit bad Paidbah na ka jingkawut lathi ki Pulit bad kawang maw bad tyllaw ding, ka ïing bishar ba don burom Meghalaya High Court kala pynksan ïa u Oni Maskut Deshmukh ban long u Pandit ban pynïaid ïaka jinglehniam Puja haka Nartiang Durga Temple.
Ka ïing bishar Meghalaya High Court haka jingshong bishar ïaka mukotduma halor ka Pandit ka nartiang kala ong ba tang u Oni Maskut Deshmukh uba la lah ban pyndep ïaka lehniam Puja ha Nartiang. Ka ïing bishar kala pynmih kane ka hukum hadien ba 900 ngut ki nongshong shnong ka Nartiang kila soi kyrteng ban pynpaw ba ki kyrshan ïa u Oni Maskut ban pynïaid iaka jinglehniam ha temple.
Ka ïing bishar kala pynmih kane ka hukum ban hadien ka jingjia ïa kulmar haka por kumba 10:30 haduh shiteng synia hadien ba thmu ban pynrung ïa u pandit Swappon Bhattacharjee hapoh ka temple kaba la pynkhia bitar ïaki paidbah bad ba ki Pulit ruh kila kawut lathi.
Ka ïing bishar kala ong balei u Waheh Shnong Nartiang u kwah ban wanrah pandit thymmai, haba ki paidbah ka Nartiang ki la jied ïa u Oni Maskut ban pynïaid ïaka puja. Kane ka jingwanrah pandit u Waheh Shnong ka dei kaba beaiñ bad ka pynkhein ruh ïaka hukum kaba la pynmih haka 9 tarik une u bnai bad la ong ba khnang ba ka puja kan ïaid beit da kaba suk ba saiñ ai ba kanlong katkum ka jingkwah u paidbah.
La bthah ruh ïa u DC bad SP West Jaiñtia Hills ban pynthikna ba u Waheh Shnong um dei satia ban wanrah pandit Swappon Bhattacharjee ha katei ka temple bad kiwei pat ki briew kim dei ban pyn,mih jingkulmar bad lada don ba leh pyrshah ka bor synshar district ka dei ban kem bad ban pynshitom katkum ki kyndon jong ka aiñ.
Ïa kane ka mukotduma ka ïingbishar kan shong bishar biang haka 1 tarik u Naiwieng 2018 bad la phah wanmih ruh ïa u DC, SP West Jaiñtia Hills District ha khmat ka ïing bishar.
U DC West Jaiñtia MA LSN Dykes Garod bad u SP West Jaiñtia Hills District haba kren kila ong ba kila shim ki lad ki lynti ban pynneh ïaka shongsuk shongsaiñ bad kila pynbiang ka bor pahara ban tem ïa kino kino kiba thmu ban wanrah jingkulmar.
Shuh shuh mynta ka sngi la sakhi ba jinglong jingman ka Nartiang kala jai jai bad ka bor District kala nang nang pynbha ïaka bor pahara ïaka temple. La ïohi ruh ba ki briew kiba nabar bad kiba District kila wan ban ainguh aidem ha katei ka temple.