Press "Enter" to skip to content

Pynsangeh jubor ka Assam ïa ka jingtrei surok PMGSY ha khappud West Khasi

Nongstoiñ, Risaw 16: Ha ka taïew ba la dep ki brïew jong ka sorkar Assam ba kynthup ïa ki heh ka PWD bad ki pulit, ki la leit ban pynsageh jubor ïa ki brïew kiba pyntrei ïa ka surok na Ranighat sha Umshiak kaba la bei pisa da ka sorkar pdeng na ka skhim PMGSY.
U Bah Chenang Marak uwei na ki nongïalam jong ka Village Dorbar Aradonga Centre (VDAC), haba pyntip ha u nongthoh khubor mynta ka sngi, u la ïathuh ba ki brïew jong ka sorkar Assam ba la ïalam da u Sub Deputy Collector (SDC) jong ka Boko Revenue Department ryngkat ki pulit ki la wan sha ka shnong Salpara bad Ranighat. Ha katei ka jingwan jong ki, ki la ïaid lyngba ka surok kaba la pyntrei da ka sorkar Meghalaya lyngba ka skhim MNREGS bad ki la lap ïa ki maw kyrteng ryngkat ki signboard ha kaba ki la jynrat bad pynpra
lyngkhot lyngkhai bad ïa ka signboard ki la rah noh sha Assam.
Nangta ha ka 1 tarik mynta u bnai, kitei ki juh ki brïew ki la wan biang sa sha Athiabari bad ki la leit ban jurip ïa ka surok ba la pyntrei da ka sorkar Meghalaya na ka Skhim Pradhan Mantri Gramsadak Yojana na Aradonga-Athiabari shaduh Umshiak lyngba ka shnong Salpara bad Ranighat. Ha katei ka jingjurip jong ki, ki la lap ruh ïa kawei ka Petrol Pump kaba dang sdang ban pyntrei da u bah Bhalanglin Kharlyngdoh ha rud ka surok Riangdo Hahim. Hangne ruh ki la pynsangeh jubor ryngkat ka byrngem byrsit ba lada um pynsangeh kin khang da ka bor.
La ïathuh ruh ba hadien katei ka jingwan tuklar bad thombor jong kitei ki brïew jong ka sorkar Assam, na ka liang ki rïew rangbah jong ka thaiñ ki la pynlong da ka jingïalang bad ïatai kaba slem bha. Ha kane ka jingïalang ki la rai ba kin ym ai lad ïa ka Assam ba kan shu mushlia ïa baroh ki kam pynroi kiba ka sorkar Meghalaya ka pyntrei na ka bynta ka jingmyntoi jong ki paitbah ka thaiñ. Ki rïew paidbah ki la rai ruh da kawei ka jingmut ban leit ïakynduh ïa u Myntri Rangbah ka jylla u Conrad K Sangma ban ïakren halor katei ka jingwan mushlia jong ka sorkar Assam.
Katto katne na ki, ki la leit ïakynduh ïa u James K.Sangma Myntri kam pohïing ka jylla ha kaba ki la aiti ruh ha u da ka Memorandum ban dawa ba un ïakren bad ka sorkar Assam ba ka dei ban sangeh shi syndon ban wan mushlia ha katei ka thaiñ, namar ka wan rah ïa ka jingshong syier bad ka lah ruh ban ktah ïa ka shong suk shong saiñ.
Katba na ka liang ki paidbah nongshong shnong naduh Malangkona Umchek, Athiabari, Umsaitwait, Rangsahpara, Aradonga, Lehadubi haduh Kamphaduli, ki la pynpaw bitar haduh katta katta ïa ka jingwan mushlia jong ka sorkar Assam na ka por sha ka por. Ka jingpyndik ïa ki jingpyntrei ïa ki projek kum ka MNREGS, lyngba ki ktien byrngem byrsit, ka la pynlong ïa ki paidbah ban ong ba lada ka sorkar jylla kam lah ban pynbeit noh kloi ïa kitei ki jingeh, khlem artatien ka huri hura kaba shyrkhei kan mih hapdeng ki paidbah nongshong shnong bad ki brïew jong ka Assam, namar kim lah shuh ban shu shah. Ym slem ba wat ki rangbah shnong ruh kin ym lah ban teh lakam bad kan wanrah ïa ki jingeh kiba khraw. Hynrei lada kitei kiei kiei kin jia, ka sorkar ka hap ban shim ïa ka jingkitkhlieh.