Press "Enter" to skip to content

Rep khambun ki marbam ban lait ka na ka ïap thngan bad ka duk: DC Mawkyrwat

Mawkyrwat, Risaw 16: “Ngi dei ban pynshlur ïa k arep ka riang bad ki nongrep kidei ban pynbun ïa k arep ka riang, khnang ban lait na ka jingduk bad ka jingïap thngan shuwa jong ka snem 2030”, la ong ka DC jong ka South West Khasi Hills District Kong I. Laloo.
Ka Kong Laloo, kala pynpaw ïa kane haba kren ha ka jingïalang ban rakhe ïa ka Sngi pynmih marbam ne ka World Food Day ba la pyllong da ka ophis u District Agriculture Officer (DAO), South West Khasi Hills District, Mawkyrwat ha ka sngi ba ar. Ka phang jong kane ka jingrakhe ka long “Ki jingleh jingkam jong ngi kiba long ka daw jong ka lawei”
Ka DC, ka la ong ba ïa kane ka sngi la rakhe kum ban pynkynmaw bad pynshlur ïa ki nongrep ïa ka jingdonkam ban rep kham bun bad ban pynjur ïa ka jingïoh bam na ka bynta ban lait na ka jingduk bad jingïap thngan ha shwa jong u snem 2030. Ka ong ruh ba ki nongrep ki dei u bud lum jong ka ïoh ka kot bad ngi shaniah ha ki nongrep na ka bynta ka bam jong ngi kaba manla ka sngi. Ka la ong ruh ba hadien jong ka Green Revolution ngi la lah ban pynmih ar shah bad ngi la lah ruh ban pyndap bam ïa baroh ka jaitbynriew, hynrei dang don hi ki briew kiba thiah jingit. Ka la ong shuh shuh ba kumba 212 milion ha Ri India jong ngi ki briew ki ïap na ka jingduna bam bad ka daw ka lah ban long na ka jingduk, ne ka jingduna ha ka jingpynmih ïa ka bam da ka jingpynulor jong ngi ïa ka mariang lyngba ka jingleh jong ngi hi ki briew kiba manla ka sngi kiba long ka daw jong ka jingpynsniew dur ïa ka mariang.
Na ka liang ka DC ka la pynshlur ruh ïa ki nongrep ba kin mih shakhmat da kaba pyndonkam noh da ki buit kiba thymmai kiba ki lah ban ïoh ki jinghikai lyngba ka Agriculture Department na ka bynta ban pynmih kham bun bad ban pynroi ïa ka kam rep khnang ba ngin lait na ka jingduk jingkyrduh bad ka shah thngan. Ka la pynshlur shuh shuh ïa ki nongrep ba kin shim ïa ki lad ki lynti kiba na ka liang ka Agriculture Department ka ai lyngba ki skhim bapher bapher na ka bynta ban pynroi bad kyntiew ïa ka rep ka riang. Ka la khot ruh ïa ki briew kiba la nang la stad ba kin mih shakhmat bad shim ïa ka kam rep kum ka lad ban kamai jakpoh da kaba kyntu ruh ba ngi dei ban sumar ïa ka mariang bad ka sawdong sawkun bad ban kynmaw ba kaei kaei kaba ngi leh kan ym pynjot ne pynthut ïa ka mariang na ka bynta ka jingbha ka lawei ki khun ki kti.
U bah R. Langstieh, Director jong ka Agriculture u la ai jingkren ha kane ka sngi da kaba ong ba ïa kane ka sngi la rakhe kum shibynta ban pynbiang ïa ka bam kaba tei ïa ki met ki phad ha ki babun ki jaka. “Ka jingrep jingriang ka dei kawei na ki lad kaba aikam aijam na ka bynta ki paidbah la ha kano kano ka jaka bad ka ban long ruh ka jingmyntoi na ka bynta ban pynbiang ïa ka bam kaba tei ïa ki longïing”, ong u bah Langstieh.
Shuh shuh u la kyntu ruh ïa ki nongrep kba ba ki dei ban shim noh da kawei ka lad ha ka ban thung ïa u kba kata na kaba shu bet sha kaba shu thung khnang ban lait na ka jingshah bam ha u khñiang uba bam ïa ki kba. “Kum ki nongrep phi dei ban shim ïa ka kabu ka biang eh na ka ka bynta ban rep ka riang khnang ba kan long ka jingïarap na ka bynta jongphi”, ong shuh shuh u bah Langstieh bad bynrap ruh ba ki nongrep ki dei ban buh ruh ïa ki jingri khnang ba ka lah ban ai jingïarap ha kaba ïadei bad ka sboh.
Na ka liang jong u Director jong ka Agriculture ula buh ka jingkyntu ruh ïa ki samla ba ki mih shakhmat ban shim ïa ka rep ka riang kum kawei na ki kam kiba lah ban pynmih ïa ka ïoh ka kot namar ba ban ïa beh tang ïa ki kam sorkar ha kine ki por ba mynta ka la eh than bad ba kin don ruh ka jingïatreilang bad ki department bapher bapher jong ka sorkar ha kaba kumno kin lah ban wanrah ïa ka kam rep kaba jop.
Hadien jong ka program la ïoh ruh ïa ka jingïaphylliew jingmut hapdeng ki nongrep bad ki officer jong ka District Horticulture Officer, Mawkyrwat bad ka Agricultural Technology Management Agency (ATMA), Mawkyrwat.
Ïa ka jingïalang ba pynïaid da u bah B. Shylla, District Agriculture Officer, South West Khasi Hills District katba u bah S. Syiemlieh, Assistant Director of Agriculture, South West Khasi Hills District uba la ai ki kyntien khublei.