Press "Enter" to skip to content

Bthah ka Sorkar MDA ïa ka UAD ban twad jingmut na u paidbah halor ka Elekshon Municipal

Namar ka hukum ka Ïingkashari Supreme Court
Shillong, Risaw 29: Ka Sorkar Meghalaya Democratic Alliance hynne ka sngi, kala bthah ïa ka Tnad Urban Affairs (UAD) ba kan twad jingmut bad ban ïasyllok bad ki kynhun bapher bapher ka Jylla na ka bynta ban pynlong ïa ka elekshon Municipal ha ki 27 tylli ki Ward jong ka Shillong Municipal Board (SMB).
Ka Sorkar Jylla kala buh ïa kane ka jingbthah halor ka hukum jong ka Ïingkashari Supreme Court, kaba bthah ïa ka Sorkar Jylla ba kan pynlong noh ïa ka elekshon Municipal tang ha ki 5 tylli ki Ward napdeng ki 27 tylli kiba don hapoh ka SMB, kumba la pyn paw da ka Sorkar lyngba ka Affidavit hapoh ka Kashari.
Haba ïakren bad ki lad pathai khubor hadien ka jingïalang jong ka kynhun Myntri, u Symbud Myntri Rangbah ka Jylla Bah Prestone Tynsong ula ong “Hadien ka jingïasyllok kaba sani bha halor ka jingtyrwa bala wanrah da ka Tnad, ka kynhun Myntri ka sngew dei eh ban shim lang ïa ki jingai jingmut jong baroh ki kynhun ïa kane ka kam namar ka dei ka kam kaba bun jyrwit jyrwat”.
“Namar kata, ngi la bthah ïa ka Tnad Urban Affairs ba kan leit sha u paidbah, pynlong ïa ki jingïalang ïasyllok nalor ki Public Hearing bad hadien sa wanrah biang sha ka jingïalang jong ka Kynhun Myntri ryngkat ka jingai jingmut la ka long ne em kaba don kam ban pynkylla thymmai ïa ka Shillong Municipal Act” ong u Bah Prestone.
Kat kum ka jingong jongu, ka Sorkar kala shim ïa kane ka rai hadien ka jingmih ka hukum ba dang shen jong ka Ïingkashari Supreme Court ba bthah ïa ka Sorkar Jyla ba kan khmih la ka lah ne em ban pynlong noh ïa ka elekshon Municipal ha ki 5 tylli ki Ward napdeng ki 27 tylli kiba don hapoh ka SMB kumba la kdew ha ka Affidavit bala aiti da ka Sorkar Jylla sha ka Kashari”.
U Bah Prestone u ong ba ka Sorkar kala bthah ïa ka Tnad ba kan sdang noh ïa ka jingïasyllok paidbah naduh mynta hi ka sngi bad ban wanrah ïa ka jingtyrwa kham kloi sha ka Sorkar Jylla. U Bah Prestone ula pynkynmaw ba halor ki hukum jong ka Kashari, ka Sorkar Jylla kala pyrshang la arsien ban pynlong ïa ka elekshon Municipal ha Shillong hynrei baroh kine kila pulom namar kiba bun ki daw.
“Napdeng ki 27 tylli ki Ward, tang 5 tylli la lah ban jied ïa ki Ward Commissioner ha ka elekshon Municipal ba long ha ka 17 tarik Naiwieng 1998. Hadien kane, ka Sorkar kala buh biang ban pynlong ïa ka elekshon ha ka 25 tarik Naiwieng 2000 hynrei kala pulom namar tang uwei u briew uba thep kyrteng bad une u briew ruh ula weng noh ïa ka kyrteng jong u ha ka sngi weng kyrteng” ong u Bah Prestone.
Haba kylli, u Symbud Myntri Rangbah haba kubur ba ka Jylla kala sakhi teng ïa ka jingpyrshah kaba jur jong kiba bun ki kyn hun ban pynlong ïa ka elekshon Municipal, ula ong “Ai ba ka Tnad kan pyndep shuwa ïa ki jingïasyllok bad baroh ki kynhun bad hadien ba kala pyndep, ngin sa shim ïa ka rai aiu ban leh”.
U Bah Prestone u ong “Namar kata, ka Sorkar kala ïasyllok sani bha ïa kane ka kam hynne ka sngi bad ngi da kwah shisha ban pynthikna ba shisien ba don hi ka hukum ban pynlong ïa ka elekshon, kane ka elekshon ka dei ban long kaba jai jai ”