Press "Enter" to skip to content

Ka Annual Meet ba 40 Cum-Ruby Jubilee jong ka ASC ha Jowai

(Da u MM. Thaïang)
Jowai, Risaw :Ka Annual Meet ba 40 Cum-Ruby Jubilee jong ka Association Salesian Cooperators Shillong Province kaba arsngi naduh ka 27 tarik haduh ka 28 tarik mynta u bnai la rakhe pyndonburom ïa ka ha St. Mary’s Mazzarello Higher Secondary School Jowai. Ha shwa ban sdang ïa ka jingïalang ha St. Mary’s Mazzarello Convent’s Hall, la pynher ïa ka lama ka Association da u Fr. Hilarius Lamare, Vicar General ka Jowai Diocese, uba long ruh u Parish Priest ka Parish Jowai..
U Fr. Hilarius Lamare haba kren ha kane ka sngi, u la pynpaw ïa ka jingkmen bad pdiang burom ïa ki dkhot ka Salesian Cooperators Shillong Province na ki 18 tylli ki Centre kata naduh kiba wan na Agartala (Tripura), Garo Hills, bad na ka Archdiocese Shillong ban ïa kynduhlang bad kum shibynta ban rakhe ïa ka Ruby Jubilee jong ka ha Parish Jowai.
U Phadar Hilarius Lamare haba kren ha kane ka sngi, u ïaroh ïa ka jingtrei jong ka jingïasyllok Salesian ha kaba kyntiew ïa ka jingnang ka jingstad lyngba ki Skul, ki Hospital, ki kam leh jingisnei ïala ki para briew bad kiwei de ki kam babha kiba kyntiew ïa ka Balang, ïa ka Rilum Jaiñtia, ña ka State Meghalaya bad ña ka ri India hi baroh kawei.
Ha ka juh ka por u kyntu ïa ki dkhot jong ka Association Salesian Cooperators jong ka Shillong Province ban nang ïaitrei shitom shuh shuh ha ki por bad ka sngi ki ban dang wan na ka bynta ka bha ka miat ki para briew bad da ka jingim Khristan babha jong ki ha ka imlang ka sahlang ha ka ban kyntiew ïa ka Ri bad ïa ka jait bynriew bad ïa ka Association Salesian Cooperators ba kan nangïaid shaphrang ha ki por bad ki sngi ki ban dangwan.
Ha ka 28 tarik hashwa ba ka Association kan bteng ïa ka Annual meet jong ka, la pynlong ïa ka jingkñia Mass bakhuid ha St. Theresa Cathedral Jowai, kaba la lamkhmat ïa ka Knia ka Khriam da u Rt. Rev. Victor Lyngdoh DD, Bishop ka Jowai Diocese ha ryngkat ka jingsynran lang ki Lyngdoh sohblei.
U Bishop Victor Lyngdoh ha ka sneng ka kraw jong u ïa ki Salesian Cooperators, u la shim na ki kyntien jong u John Bosco bad ka kynthei Nongsamaria kiba ong “AI IA NGA IA KI MYNSIEM BAD SHIM NOH IA KIWEI PAT NA NGA” bad jong ka kynthei Nongsamaria kaba pan na u Jisu “KO KYNRAD TO AI LEM SEH IA NGA IA KATA KA UM JINGIM”.( John 4:15). Nangta u Bishop u pynkynmaw ïa ki kyntien jong u Trai Jisu kiba ong “Uta uba dih ïa ka Um ba ngan ai ma nga, un ym sliang shuh lano lano ruh.
Ka Um kaba ngan ai ma nga kan kylla long hapoh jong u ka Umpohliew ka ban kyrsoi sha ka jingim bymjukut” (John 4.14) namar kata ko Salesian Cooperators baieid kumba ka Um ka long kaba donkam ïa ki briew baroh ban im ha kane ka pyrthei, kumta ruh to pan ïa kane ka um ka jingim jong u Trai Jisu ban ïoh im bad U junom ha ka akher ka sngi.
Nangta u Bishop u ong kumba u Don Bosco u la im ban wad ïa u Jisu ka tlong jong ka jingim jong u, kumta ruh kum ki Nongïatreilang jong ka kynhun jingïasyllok jong u Don Bosco to wad ïa u Jisu kum ka tlong um jong ka jingim jong phi.
Shuh shuh u Bishop u pynkut ïa ka jingkren da kaba kyntu ia ki dkhot ka Association, to long ka nuksa ka babha ïa kiwei pat, imbha im miat hala iing hala sem, ha ka Association bad imsngi ha ki kam babha bad ha kaba pynphriang ïa ka khubor babha u Trai Jisu Khrist naba ym don kawei pat ka kyrteng lait na ka kyrteng jong u Jisu kaba lah ban pynim ïa ngi (Kam 4:12).