Press "Enter" to skip to content

Na ka NRC ha Assam, thmu riehtngen ki suba phetwir ha Dangar-Balat

Pyrkhing ïa ki NS : kyntu ka KSU ïa u Syiem Bhowal
Dangar, Risaw 29 : Ka National Register of Citizen (NRC) ba wanrah da ka sorkar Assam ka la pynlong ïa bun ki suba phetwir na katei ka jylla ban krih bad wan riehtngen wat sha ki bynta jong ka Dangar-Balat, kawei na ki jaka khappud ha Meghalaya kaba ki nongshong shnong kidei na ki jaidbynriew bapher bapher.
Ïa ka jingwan jong kitei ki briew sha katei ka thaiñ khappud la kubur ruh da u Syiem ka Hima Bhowal Paiem Kynsai N Syiem hadien ka jingïalang bad ki dkhot ka KSU ha ophis treikam jong ka Hima ha Dangar, kiba la kyntu ïa u Syiem ba u dei ban hukum ïa baroh ki Nongsynshar Shnong (NS) khamtam ha ki shnong bymdei Khasi ba kidei ban long kiba peitngor bha halor katei ka bynta.
Haba kren bad ki lad pathai khubor, u President ka KSU Balat Border unit, Bah Bonsen Snaitang u la ïathuh ba na ka liang ka seng ka la ïatai sani bha bad u Pa’iem khamtam eh na ka bynta ban ïada ïa ka Jaidbynriew bad ka khyndew ka shyiap bad ruh ban khanglad ïa ka jingwang rung kyrthlep ki mynder sha katei ka thaiñ.
“Ngi la kyntu ïa u Syiem ba um dei ban ailad ban thaw shnong thymmai khnang ban khanglad ïa kum kitei ki jaidbynriew ba nabar ban wan shong wan sah,” u la ong. Ki la ïathuh baki la dep kyntu ruh ïa u Syiem ba um dei satia ban ai jaka ne pata ïa ki briew bym dei Khasi bad ruh ban lum ïa ka khanasamari ha kito ki shnong ba sah da kiwei pat ki jaidbynriew.
Na ka liang u Syiem pat haba bynrap lang u la ïathuh ba kitei ki suba phetwir na Assam, lyngba ki bahaïing ha sem kiba sah ha katei ka thaiñ, kitei ki briew ki la nud wat ban pan ïa ki kot ki sla na ka Hima, ban pynshisha ba ki dei ki nongshong shnong jong katei ka thaiñ khnang ba kin ïoh ban rah pat sha Assam ban pynshisha ba ki dei ki nong India. “Kidei ki briew na Assam imat kiba shah kyntait ha ka NRC,” u la ong da kaba kam ba u kyntait mardor ïa katei ka jingkyrpad jongki.
Da kaba ïaroh ïa ka jingpeitngor jong ka KSU, utei u khliehduh jong ka Hima u la ïathuh ruh ba namar ka jingsuba ba kitei ki briew kidei kiba don ka jingïadei bad kiwei pat ki jaidbynriew kiba shong ba sah ha katei ka Hima, u la ïathuh ba ka Hima ka la pynmih ruh da ka hukum ba baroh ki Mulor (rangbah shnong ha ki shnong bym don Khasi) ba kim lah satia ban ai syrnod sngikha, syrnod ba ki dei ki nongshong shnong (residential certificate) ne kot khyndew khlem ka jingtip ne jingai bor da ka Hima.
Katkum ka jingïathuh jong u, ha ka Hima ki la don kumba 21 tylli ki shnong kiba ki nongshong shnong kidei na ki jaidbynriew bapher bapher kynthup naduh Garo,Nepali, Bengali, Hajong bad kiwei kiwei katba ki shnong Khasi pat ki don tang kumba 19 tylli. Na kata ka daw, u la ong ba u la hap ban shimkhia mardor khnang ba kiwei pat ki jaitbynriew kiba shah kyntait na Asaam kin ïoh ban wan riehtngen sha katei ka thañ.
Ha kajuh ka por u la kular ruh ba kum ka Hima kan sa shong ïa ka Executive Dorbar ban ïa kren sani halor kiba bun ki jingai jingmut kiba pynsngew da ka KSU.
Ha katei ka jingïakynduh, na ka liang ka Hima la donlang ruh ki Myntri, ki Basan bad kiwei kiwei.