Press "Enter" to skip to content

Dang ap ka BJP na Delhi ban pynieng ïa u kyrtong MP

Shillong, Naiwieng, 02: Ka Bharatiya Janata Party (BJP) kan dang hap ban ap shwa ïa u kyrwoh na ka High Command jong ka Party shwa ban shim ïa ka rai bakhatduh la kan sei neem ïa u kyrtong ban pynïakhun ha ka elekshon MP na Shillong Parliamentary
Constituency bad na Tura Parliamentary Constituency.
U Bah Alexander L. Hek, uba long u MLA ka BJP ha ka jingïakren bad ki lad pathai khubor mynta ka sngi thohdieng haba pynpaw ïa ka jingsngew shimet, u la ong, “lada phi kylli na nga, ngi dei ban ïaleh beit.”
Haba kyllil, u la ïathuh ba ka BJP haduh mynta kam pat shong ïa ka jingïalang ban pyrkhat ïa ka elekshon MP sha ka Ingdorbar Thawaiñ jong ka ri bad ïa ka elekshon MDC sha ki lai tylli ki Autonomous District Council (ADC) ki ban sa long la kumno kumno ha u snem 2019.
“Ngi hap ban shong ïa ka jingïalang ban shim ïa ka rai la ngin sei ïa u kyrtong ban pynïakhun na ka Party lane ban kyrshan ïa u kyrtong monlang jong ka Kynhun Meghalaya Democratic Alliance (MDA)” ong u Bah AL Hek uba long u Myntri ka Koit ka Khiah ka Sorkar MDA kaba bat ïa u lakam synshar hapoh ka jylla ba la ïalam da ka Nationalist Peoples Party (NPP).
U la ong ruh ba ka BJP, Meghalaya Unit kan hap ban ap shwa ïa ka rai kaba mih na ka High Command na New Delhi la ka BJP kan pynieng kyrtong neem ha ka Eleshon MP na Shillong bad na Tura. “Lada ka High Command jong ka Party ka ong da kumwei pat ngin hap ban peit ïa kata,” u la bynrap.
Kum ban shu kdew hangne, dei tang ka United Democratic Party (UDP) kaba la pynbna ïa ka kyrteng u Dr. Jemino Mawthoh, ban long u kyrtong ka Party bad ban tyrwa ruh ïa ka kyrteng jong u sha ka Kynhun MDA kum u kyrtong monlang.
Haba kylli halor ka jingsngew jong u shimet halor kane, u Bah Hek uba long ruh u nongïalam bahakhmat ka BJP u la ong, “u kyrtong monlang u ban ïakhun ïa ka Elekshon MP um dei ban long na kano kano ka Party, hynrei u dei ban long u kyrtong shimet ban kyrshan beit da ka Kynbun MDA lane un ïakhun na ka kynhun NDA.”
U la pynpaw ruh ïa ka jingsngew ïahap jingmut ïa ka jingbthah jong u Conrad Kongkal Sangma, Myntri Rangbah ka Jylla ïa baroh ki Seng Saiñpyrthei kiba synrop lang ha ka Kynhun MDA ba kin ïakren shwa hapoh ka seng ïa u kyrtong MP ban sa wan tyrwa pat sha MDA.
U Bah Hek u la kam ba ka BJP mynta ka don ha ka thong ban jop ïa ka Elekshon MP, namar ka don ïa ki nongtrei bad ki nongkyrshan ha baroh ki Mondal bad ki Primary Unit. U la ong ruh ba ka elekshon MP bad ka elekshon MLA ka don ka jingïapher namar ha ka Elekshon MLA ki paidbah ki kham jied ïa uba ki kham noh mynsiem katba ha ka Elekshon MP ki paidbah ki kham peit ïa ka jinglah treikam jong ka Party.
“Ha ka elekshon MP, sanphew na ka shipsha ka dei ka Vote jong u Kyrtong bad sanphew ka dei ka jong ka Party,” ong u Bah Hek haba kylli kaei ka jingïapher hapdeng ka Elekshon MLA bad MP.
Ha kaba ïadei bad ka jingkren ba dang shen jong u Bah Bindo M Lanong, Senior Vice President ka UDP lada ka MDA kam kyrshan ïa u Kyrtong MP ba la tyrwa da ka UDP kan ktah wat ïa ka Sorkar MDA, na ka liang u Bah Hek ula ai nuksa da kaba ong, “lada phi peit ha ka elekshon shiteng samoi ha Ranikor Constituency kam don kano kano ruh ka huri hura watla ki Sengsaiñpyrthei kiba don hapoh ka MDA ki pynieng la u jong u kyrtong. Ka elekshon MP hi da leilei ruh em kan ym ktah satia ïa ka Sorkar MDA.”