Press "Enter" to skip to content

Diaw ka JSU ba bun jingïalang palat u DC

Khliehriat, Naiwieng, 02: Ki paidbah kiba ju leit donkam ïa u Deputy Commissioner ha Khliehriat ki ju ïa kynduh jingeh manla ka por khamtam ha ka sngi iew Khliehriat ha kaba kiba bun ki dei kiba wan na ki jaka ba jngai, namar, la ong ba bunsien kim ju lah ban ïakynduh ïa u DC ha ka por mynsngi tat haduh ynda la kem iongreiñ.
Ka Jaiñtia Student Union (JSU) Central Body lyngba u kyrwoh ba u Bah L.War, Presidentm ka la pynpaw ïa ka jingsngewkhia kaba khraw halor ka jingbunkam palat u Deputy Commissioner ka East Jaiñtia Hills District kaba buh jingeh haduh katta katta ïa ki paidbah jong ka District.
‘Ban ïakynduh ïa u DC ki paidbah ki hap ban ap haduh da miet bha, ynda la palat ka por trei ophis, kane ka buh jingeh haduh katta katta ïa ki paidbah khamtam kito kiba wan na ki jaka ba jngai,’ ong u kyrwoh na ka JSU.
Ha kaba ïakren bad ki lad pathai khubor, utei u nongïalam JSU u la ïathuh, dang myn ha ka sngi ïew Khliehriat ba ladep, kiba bun ki briew kiba la wan na ki jaka ba jngai ki hap ban leit phai thylli khlem da lah ban ïakynduh ïa u DC namar ka jingbun jingïalang palat u DC ka la buh jingeh ïa ki paidbah bad u dang don ha ka karma treikam haduh ka por janmiet bha ha kaba ym dei shuh ka por long ophis.
“Hooid ïa ki briew kiba hajan te kam pher, hynrei kito ba jngai lynti pat ka long kaba eh ba kin ap ïa u haduh janmiet da ka dum ka bneng,” ong ka Seng.
Ka Jaiñtia Student Union ka kyrpad ïa u Deputy Commissioner ba un kham ailem ka por ïa ki paidbah ban ïakynduh khamtam ha ka sngi iew Khliehriat ha kaba kiba bun ki briew ki ju wan na ki jaka ba jngai ha kaba ki hap ban beh ïa ki kali ïew ban ïoh leit phai sha la shnong.