Press "Enter" to skip to content

Elekshon MP : U Kyrtong monlang ka MDA um dei ban ïakhun na ka Party : Lambor

Lah ban shim nuksa na ka elekshon MP 2004
Shillong, Naiwieng 02 : U kyrtong monlang jong ka sorkar Meghalaya Democratic Alliance (MDA) um dei satia ban ïa khun na ka shap jong kano kano ka party hynrei ban aireng na ka shap kaba long pdeng, ai jingmut u Chairman ka Meghalaya State Planning Board, Bah Lambor Malngiang.
“U kyrtong monlang um dei satia ban ïakhun na ka shap jong kano kano ka seng saiñpyrthei watla u dei na ka United Democratic Party, People Democratic Front ne kiwei kiwei,” u la pynpaw haba kren bad ki lad pathai khubor ha kane ka sngi Thohdieng.
Ha kane ka sngi, u Bah Lambor u la ai jingmut ba ka Coordination Committee ka lah ban shim ka nuska na ka elekshon MP kaba long ha u 2004 ha kaba ka jingpynkhreh ban sei ïa u kyrtong monlang napoh ki party ba don ha ka sorkar ka syriem kumjuh. Hynrei u la ong pat, ba ha utei u snem ka mih pat ka jingthut khyndiat namar na ka sorkar kaba ïalam da ka Congress, la mih ar ngut ki kyrtong, kata u kyrtong ka Congress bad uwei pat u kyrtong ba sei da ki party bym dei Congress ba la tip kum u kyrtong ka Regional Parties Alliance (RPA), Dr. SL Marbañiang.
“Hynrei mynta ka kynti ngi don ka jingkyrmen namar ngi don haduh 39 ngut ki MLA,” u la bynrap biang.
Katkum ka jingpynpaw jong u, ka jingmut kyrtong monlang jong ka sorkar MDA kan ym ïahap satia lada jia ba u kyrtong ba ka Coordination Committee ka jied u ïakhun pat na ka party kaba tyrwa ïa u.U ong ruh ba lada ki party baroh ki pdiang ïa katei ka jingai jingmut kan pynsuk ïa ki haba ki leit sha ki paidbah ruh.
Lah ban kdew hangne ba na ki 6 tylli ki sengsaiñ pyrthei kiba thaw ïa ka sorkar synrop dei tang ka UDP kaba la pynbna ïa u kyrtong katba kiwei ki party pat kim pat pynbna satia. Na ka liang ka PDF ka la pynpaw ba shen kin sa shong ïa ka Central Working Committee ban ïa kren halor u kyrtong bad lada ka CWC ka mynjur ki lah ban phah pat sha ka Coordination Committee ïa ka kyrteng jong utei u kyrtong. Na ka liang ka UDP dang shen ka la pynpaw ba kin sa phah noh mardor ïa ka kyrteng jong u Dr. Jemino Mawthoh sha ka Coordination Committee jong ka MDA ban ïoh ïa ka jingmynjur kum u kyrtong monlang.
Nalorkata u ong ruh ba lada ym lah ban pynbeit ïa katei ka ishu kyrtong monlang jong ka MDA, lehse ka lah ban poi da ka jingiakhun paralok hapdeng ki party ba don ha ka MDA da ka thong pat ban pynrem ïa ka Congress.
“Hynrei katei ka jingïakhun paralok kam dei satia pat ban ktah ïa ka jingskhem jong ka sorkar,” bynrap shuh shuh u Bah Lambor. Khnang ba katei ka ishu kyrtong monlang kan long kaba ïaid beit, u Bah Lambor u la ïathuh ruh ba ka Coordination Committee ha ka sien shong kaban wan ki sa ïatai sani bha khnang ba u kyrtong jong ka MDA un poi sha ka thong.
Katkum ka jingïathuh jong u la kumno kumno ha u Naiwieng la dei ban pyndep ïa katei ka ishu kyrtong monlang khnang ba u kyrtong un ïoh pat ban pynkhreh ïalade na ka bynta katei ka elekshon.