Press "Enter" to skip to content

Hukum ka Megh High Court ban shimkhia ka Sorkar ïa ki Khynnah ba khlem Ïing

Shillong, Naiwieng 02: Ka Ïingkashari Meghalaya High Court kala hukum ïa ki bor khmih jong ka Sorkar ba kin shim ïa ki sienjam ba donkam haba ïadei bad ka jingshngaiñ jong ki Khunlung Khynnah ba khlem Ïing khlem sem ha Nongbah Shillong bad kiwei kiwei ki District ka Jylla.
Haba shong bishar ïa ka Public Interest Litigation (PIL) bala mudui da u Bah Khroolamsalanki Pariat ba na Mission Compound, Jowai, ka Division Bench ba kynthup ïa u Chief Justice Mohammad Yaqoob Mur bad Justice SR Sen ha ka hukum ba pynmih hynnin ka sngi kala ong “Ïa mynta, ki Nongshah mudui (borkhmih) ki dei ban shim ïa ki sienjam ba donkam haba ïadei bad kane ka kam na ka bynta ka bit ka biang jong baroh”.
Ka Kashari kala hukum ruh ban ai notice sha u Chief Secretary,
Commissioner & Secretary ka Tnad Urban Affairs Department bad sha u Commissioner & Secretary ka Tnad Social Welfare haba khmih ïa ka jingkyrkieh jongkane ka kam. Kala bthah ïa ki bor khmih ba kin ai ïa ka jubab ha lane shuwa ka 12 tarik u Naiwieng, kaba long shisngi shuwa ban shong biang ïa ka jingbishar kata ha ka 13 tarik.
Lah ban kdew hangne ba u Bah Khroolamsalanki ula buh ïa ka mudui hakhmat u Justice SR Sen myn ha ka 23 tarik Risaw ba kyrpad ïa ka Kashari ba kan tuklar lang halor ka jingdonkam ban buh ïa ki Night Shelter Houses na ka bynta ki Khunlung Khynnah ki bym don ïing don sem namar ka jingshah kyntait hala ki jong ki Kmie Kpa.
“Nongbishar ba don burom, kan long ka jingkyrkhu kaba khraw ïa ki Khynnah ba khlem Ïing lada don ki Night Shelter Houses ha manla ki District Headquarter jong ka Jylla. Kane ka dei ban sdang ban Shillong, Jowai bad Tura” ong u Bah Khroolamsalanki ha ka mudui.
Une u rangbah u ong ba kum u Nongshongshnong ba sngewkhia, um lah satia ban shu peit ïa ki khmat bad jaw ummat haba ïohi ïa ki jingeh jong ki Khynnah ba khlem Ïing ha ka por mynmiet khamtam mynta bala wan artad ha Tlang. U ong ‘Hynrei ngam da don eh ka pisa tyngka bad nga sheptieng ba yn nym don satia ki bor Sorkar ki ban sngap ïa ka sur jong nga wat lada nga leit ban ïakren bad ki”.
Haba pynpaw ba kine ki Khunlung Khynnah kim dei satia ki Khun Swet, une u rangbah u ong ba bun ki dei na ki Longïing kiba duk raitoi bad ki dei hok ban ïoh ïa ka jingiada ïala ka jingim na ka jingkhriat jong ka miet tlang.
Kat kum ka jingong jong u, kine ki Khynnah kiba ju sah ha ki lynti ïaid kjat, ki lah ban long ki maw-it jong ka Ri lada ki ïoh ïa ki jingiarap bad jingkyrshan ba khyndiat eh. U ong ba tang ba kin im, kine ki Khynnah ha ka por mynsngi ki im ha kaba die kwai dong bad katto katne ki kot lyngkdop niam bad kiwei kiwei bad ha ka por mynmiet pat ki ju sah ha kano kano ka jaka ba long don jaka ban rieh.
U Bah Khroolamsalanki ula kynnoh ruh ba namar ka jingbym shimkhia jong ka Sorkar Jylla, kine ki Khynnah ki don ïa ka jing sngew ba kila shu shah iehbeiñ bad ym don shuh ki nongtbin lynti ïa ki bad haba kut ki kylla long ki briew ba kyrni ha kino kino ki jingdih pynbuaid (dendrite bad kiwei kiwei) tang ban lait na ka jingsngew marwei bad sngew dukha ka jingim.
Ha kajuh ka por, une u Rangbah u ong ba ki Night Shelter House kim dei ruh ban long tang ki jaka sah miet jong ki Khynnah ba khlem ïing hynrei ki dei ruh ban long ki shlem ai jinghikai ban sei ïa ka sap treikam jong ki Khynnah. U ong ba ki Night Shelter House ki dei ban don ïa ka skul miet ba manla ka sngi ka ban ai jinghikai ruh ïa ki jnghikai bapher bapher ha ka liang ka kam mistiri (Carpentry), shna pipe um (plumbing), eletctrical, Civil works bad kiwei kiwei khnang ba kin ïoh ka lad ban im ka jingim kaba don burom.