Press "Enter" to skip to content

Khanglad ka HNYF ïa ki bar jylla ba tih shyiap na Wah Umtrew

Nongpoh, Naiwieng, 02: Haba pynpaw ïa ka jingsngewkhia halor ka jingjyllei ki bar jylla, kiba la wan ban khlong Shyiap ha ka Wah Umtrew kaba don ha shnong Lailad ha Ri Bhoi, hynne ka sngi ki dkhot ka HNYF, 20Mer Circle, ki la pynlong ïa ka jingleit khynra ïa ki kot ki sla jong ki bar jylla kiba la trei ha katei ka jaka bad ha kane ka jingkhynra, la lap ba bun na kitei ki bar jylla kiba la trei ha katei ka jaka, kim lah ban pyni ïa ki kot ki sla kiba biang.
Ha kane ka jingleit khynra bar jylla, la ïalam da u Bah Paul Wahlang, President ka HNYF, 20 Mer Circle, ha ryngkat ka jingdonlang u Bah Ïaineh Wahlang, Organizing Secretary ka HNYF, Northern Region lem bad bun ngut ki dkhot ka HNYF.
Ha katei ka jaka khlong Shyaip ki bar jylla, ki dkhot ka HNYF, ki la khynra ïa baroh ki jaka kiba la trei da ki bar jylla, hynrei ka long kaba kyndit ban tip ba la jan baroh na kitei ki bar jylla, kiba la trei ha katei ka jaka kim lah pyni ïa ki kot ki sla kiba biang, hynrei ki don ki katto katne ngut kiba la shu pyni da ki Pan Card bad ki Dur Epic, ki bym shem la ithuh ithaw.
Katba ki dkhot ka HNYF ki dang pynlong ïa ka jingkhynra, ki la don ruh napdeng jong kitei ki bar jylla, kiba la phet krad da kaba jngi sha shilliang jong katei ka Wah Heh, da ka jingthmu ban lait phet na kitei ki nongkhynra.
Hadien ba la lap ba bun na kitei ki bar jylla kiba khlong Shyiap ha katei ka jaka kim lah ban pynbiang ïa ki kot ki sla, ki dkhot ka HNYF ki la maham tyngeh ïa ki ba ki dei ban mih noh na katei ka jaka bad ba ki dei ban pynbiang shwa ïa ki kot ki sla.
U Bah Paul Wahlang, u la ong ba ka seng hi ka sngewkhia ban ïohi ïa ka jingïoh laitlan ki bar jylla ban wan rung shapoh ka jylla, wat haba kim don ïa ki kot ki sla kiba biang, ha kajuh ruh ka por u la ong ba ka seng hi kan nym shong kli kti, hynrei nangne shakhmat kan dang ïai bteng ba khynra ïa ki bar jylla ki bym don ïa ki kot ki sla kiba biang.
Ka seng ka kyntu ruh ïa ka Sorkar ba ka dei ban pynstet noh ha ka ban shna ïa ka Entry bad Exit point, khnang ban tehlakam ïa kiba kum kitei ki bar jylla.