Press "Enter" to skip to content

Kynmaw burom ki riewngeit Katholik bad All Saint ïa kiba la khlad noh

Shillong, Naiwieng, 02: Ka Balang Katholik ha Jylla Meghalaya mynta ka sngi thohdieng ryngkat lang bad ki riewngeit ka pyrthei shityllup ka la kynmaw burom ïa ka mynsiem jong ki bahaing hasem kiba la khladnoh ïa kaba la tip ruh kum ka All Soul’s Day.
Ka jingkynmaw burom ïa ki mynsiem ba la khladnoh ka long da kaba ïashim bynta ha ka Mass Bakyrpang bad ban duwai kyrpang ruh na ka bynta ki mynsiem kiba la khladnoh ba kin ïoh ïa ka jingjahthait bymjukut.
Mynta ka sngi, da ki hajar ngut ki riewngeit ka Balang Katholik ki la tuid sha u lum jingtep ka Balang uba don ha Laitumkhrah ban leit buh syntiew bad ïashim bynta ruh ha ka jingkñia Mass Bakhuid ba la pynmynta da u Most Rev. Dominic Jala, SDB, DD, uba long u Archbishop ka Jyllaniam Bah Shillong ha ryngkat ka jingsynran lang jong ki Lyngdoh Sohblei.
Hadien ba la kut ka jingkñia Mass Bakhuid, ki Lyngdoh Sohblei ki la synreit ruh da ka umksiar um rupa ba la kyrkhu ïa ki lum jingtep ba la thiah da ki mynsiem kiba la khladnoh.
Mynta u bnai Naiwieng, ka Balang Katholik ha baroh ki Parish la ju pynlong ïa ka jingkyrkhu ïa ki lum jingtep da ka jingïashim bynta bariew blei da ki riewngeit ka Balang.
Jowai: Ha Jyllaniam Jowai, ki riewngeit jong ka Balang Katholik hynne ka sngi thohdieng ki la rakhe kynmaw burom ïa ka mynsiem jong ki bahaing ha sem kiba la khladnoh da kaba leit buh syntiew ha u Lum jingtep ka Balang Katholik ha Jowai bad ïashim bynta ha ka jingkñia Mass Bakhuid na ka bynta kiba la khladnoh la pynmynta da u Rt. Rev. Victor Lyngdoh, Bishop ka Jyllaniam Jowai.
Hadien ka Mass Bakhuid u Bishop Victor ryngkat ki Lyngdoh Sohblei ki la leit synreit da ka umksiar umrupa ïa ki lum jingtep ba la ap lypa da ki bahaing hasem kiba ïa lum lang khrui ban duwai kyrpang na ka bynta ka jingjahthait bymjukut ka mynsiem jong ki baieid bathoiñ jong ki.
Ha kane ka sngi, ka All Saints’ Cathedral kaba dei ka Balang jong ka Church of North India, ka la rakhe iaka sngi kynmaw burom ia kiba la khlad noh ne ka ‘All Soul Day’ ha ki artylli ki lum jingtep kaba don ha Rhino Point bad ha Bishnupur.
La sdang ia kane ka jingrakhe da ka jingiaseng khawai U Trai ha baroh artylli ki lum jingtep ha ka por 8:30 mynstep bad hadien kane pat la pynbud da ka jingkyrkhu ia ki syntiew hashwa ba ki parabangeit kin leit buh ha ki jaka tep jong kiba ieid ba thoiñ ki jongki.
Ha u lum jingtep ha Rhino Point, la pyndep ia ka jingleh niam da u Rev. Angel Daimary bad ha u lum jingtep ha Bishnupur pat lah pyndep iaka jingle niam da u Rev. Presley B. Lyngdoh.