Press "Enter" to skip to content

Pynbiej kai ki shipai BSF ïa ki paid khappud ka Bangladesh da ki mashin shna tiar

Khliehriat, Naiwieng, 02: Ki paidbah nongshong shnong jong ka thaiñ Kuliang, Umkiang bad kiwei kiwei ki shnong ba marjan kiba don ha khappud bad ka ri Bangladesh kiba dang hap hapoh u pud u sam ka East Jaiñtia Hills District ki la dap da ka jingsngew lyngngoh halor ka jingset khop khop jong ki shipai Border Security Force (BSF) ïa ki mashin shna tiar ba la ai sngewbha sha ki paidbah ha ka 17 tarik, Lber, 2018.
U Mawphor, haba ïakren bad u Ma Bendro Khongstia, Waheh Shnong ka shnong Kuliang, u Ma Henry Suchiang uba long u dkhot ka Dorbar Shnong Kuliang, ki la ïathuh ba ka tnat shipai BSF ha ka 17/3/2018 ka la ai sngewbha ïa ki mashin shna tiar ïa ki shnong ha ki thaiñ Umkiang, Kuliang bad ki shnong ba marjan bad kine ki mashin ki dei kiba lah ban shna ïa ki tiar (One Time use) na ki Dobwai (ba ïoh na u dieng kwai).
Kine ki nongïalam shnong ki la pynpaw ruh ka jingsngew lyngngoh halor kano kano nongrim ba ki shipai BSF ki la buh pynban ïa kitei ki mashin ha BSF Camp khlem da aiti pat sha ki paidbah.
Haba kylli, kine ki nongïalam shnong ki la ïathuh ba ym ju don satia mano mano ruh ban leit rung sha ktem sah ki shipai BSF ban pyndonkam ïa kitei ki mashin namar ba kane ka ktem ka don kham pajih na ka shnong ba shong ba sah ki briew.
Ka jingbuh ïa ki mashin hapoh ka BSF Camp ka pyntieng pynsmiej ïa ki paidbah khamtam ïa ki kynthei bad ki khynnah
Ka jingai sngewbha jong ka tnat shipai BSF ïa ki paidbah ïa kitei ki mashin ka la long tang kum ban shu pynbiej kai ïa ki nongshong shnong jong ka thaiñ khnang ïoh ïa ka jingshahniah na ki paidbah.
Ha ka jingïalang ba ka tnat shipai BSF ka la ai sngewbha ïa kitei ki mashin ka la pynpaw ba kin long ki jingmyntoi kiba khraw ïa ki nongshong shnong ha ka por ba ki donkam khamtam eh ha ka kam khawai dawai ne ha ki jingïalang ha shnong ha tnaw ha kaba ki paidbah ki lah ban shna hi ïa ki tiar kum ki pliang, ki shamoit bad kiwei kiwei bad ki paidbah ki lah ruh ban die ïa kine ki tiar ha ki jaka ïew ka ban long kum ka lad kamai, hynrei phewse imat kine ki jingjaw khleiñ jong ka tnat shipai BSF ka long tang ka buit ban pynbiej kai ïa ki nongshong shnong.
Halor kane, u Mawphor un nang ïai buddien shuh shuh ban tih bniah halor kaei ka daw kaba pynlong ïa ka tnat shipai BSF ban shukor ïa ki paidbah.