Press "Enter" to skip to content

Shah pyntieng ka DFO ba khang shna surok ïa ka PWD

Shillong, Naiwieng 02: Ka Divisional Forest Officer ka East & North Garo Hills (I) Division, ka la ujor da ka ejahar sha ki Pulit ba pyn tip ïa ka jingdon jong ki runar kiba pyntieng ïa ka namar ka jingbym ailad ïa ka Tnad PWD (Roads) ban shna ïa ka surok halor ka Wah Rongap.
Kane ka Ophisar ka Terakchi K Marak, IFS, kala pyntip ba kine ki runar kila pyntieng ïa ka da kaba wan thang ïa ki kynja kot hapoh ka phyllaw Ophis jong ka ha Williamnagar, kaba la jia myn ha ka janmiet 26 tarik Risaw hadien jong ka pakhang ophis jong ki kynhun Sengbhalang.
La kynnoh ba kane ka dei ka kam jong ki Sengbhalang ban pyntieng pynsmiej ïa kane ka DFO namar ka jingbym ailad ïa ka PWD ban shna surok hajrong kane ka Wah, kaba long pyrshah ïa ka Forest (Conservation) Act 1980 bad ka hukum jong ka Ïing kashari Supreme Court.
Na ka liang ki Pulit kila register ïa ka case halor kane ka ejahar bad ka jingtohkit mynta kala ïaid shakhmat.