Press "Enter" to skip to content

93.45 % poi ka jingïoh injek MRVC ki khynnah ha West Jaiñtia Hills

Jowai, Naiwieng : Ka ophis jong ka District Medical and Health Officer, West Jaiñtia Hills ha ka jingïalang kaba la long ha kane ka 2 tarik mynta u bnai halor ka Measles- Rubella Vaccination Campaign (MRVC) ha Conference room jong ka ophis u Deputy Commis sioner, ïa la jingïalang la pynïaid da u D. M Wallang, Additional Deputy Commissioner bad la wan ïashim bynta da ki nongpynïaid jong ka Measles-Rubella Vaccination Campaign bad ki riew paidbah.
Ha kane ka sngi la ïoh jingkheiñ ba katkum ka report kyllum na Laskeiñ bad Amlarem Block kiba la ïoh injek ka la poi sha ka 97% bad 94%, katba na ka Thadlaskeiñ Block ka jingwan ai injek ki nongshong shnong ka duna na ka jingbym sngewthuh ki paidbah ïa ka jingdonkam kane ka MR. U D.M Wallang haba kren ha kane ka sngi u la kyntu ïa ki nongtrei ban leit biang sha ki shnong ki thaw da ka jingtip jong u Rangbah shnong, ki VECs, ki nonghikai skul bad ki paidbah nongshong shnong ba kim dei ban ïaid lait na kane ka jingai injek Measles-Rubella.
La ong ruh ba katkum ka jingkheiñ ba la ïoh lum na West Jaiñtia Hills District ki nongïoh injek ki la poi sha ka 93.45 % haduh ka 7th November, 2018 bad kiba dang dei ban ïoh ïa kane ka injek kiba naduh ka 9 bnai haduh ka 15 snem ka rta ki long sa kumba 8212 ngut na ka 1, 25,466 ngut ki khynnah kiba don hapoh ka District.
La ong ruh ba ha ka 26th October, 2018 u Deputy Commissioner ka West Jaiñtia Garod L.S.N Dykes u la wan jngoh hi dalade ïa ka shnong Namdong bad ïakynduh ïa u Rangbah Shnong bad ïa kiwei de ki Rangbah Shnong ba marjan ha ryngkat ki ka jingïadonlang ki Doctor na ka District, Nartiang PHC bad na Namdong PHC. U Deputy Commissioner ha kane ka jingïakynduh lang ula batai ïa ki paidbah ïa ka jingdonkam ïa ka jingkoit jingkhiah ha ka met bad mynsiem. U kyntu ïa ki ban ïatreilang bad ba kane ka jingthmu jong ka sorkar kan long kaba jop.
Na ka liang ka DIO, West Jaiñtia Hills, ka la ong ba ha ka jingleit campaign jong ki, ki don ki jaka hapoh ka District ki bym treh ban ai injek ha ka nongrim jong ka jingngeit ñiam. Nangta ka DIO ka kyntu jur ïa ki paidbah nongshong shnong ban ïatreilang bad ban pynsngew thuh paidbah ba kane ka injek Measles-Rubella dei ban ioh ïa baroh ki khynnah kiba naduh ka 9 bnai haduh 15 snem kiba don hapoh ka District ba kin lait na jingpang Measles bad Rubella.