Press "Enter" to skip to content

Ailad ïa ka NPP ban synshar haduh 5 snem

(Bah I.R. Dkhar)
Ka National People Party (NPP) kaba la seng da u Late PurnoAgitokSangma, ka la shimti ïa ka jingsynshar ïa ka Jylla Meghalaya ha ka 6 tarik u Lber 2018. Dei ha kane ka sngi ba la pynsmai ïa u Conrad Kongkal Sangma kum u Myntri Rangbah ryngkat bad ki 11 ngut ki Myntri. Ha ka ilekshon kaba la dep ha u bnai Lber mynta u snem, ka NPP ka la ïoh tang 19 ngut, ka Congress 21 ngut, kaba tam da 2 seats, hynrei namar ba ki Regional Party kumka HSPDP, UDP, NCP, PDF, KHNAM bad ki Independent, ki kyrshan kaba la poi sha ka 34 ngut, ka la ïoh ban bat ïa u lakam. Kane ka Sorkar NPP ka dang don tang 7 bnai tam ha ka jingsynshar. Hadien katto katne sngi, ka Congress ka la pyrshang ban tan ïa kiwei ki MLA jong ki Regional Party ban pynkhyllem ïaka Sorkar ba la ïalam da ka NPP. Ha ka ilekshon ba la long ha Williamnagar kaba la long ha u bnaiJymmang 2018 (kabym lah ban pynlong lang na ka daw ka jingïapnoh u candidate), ka NPP ka la jop sa 1 uwei u MLA, kumta la mar ïakhaid bad ka Congress ha ka jingbun paid. Kumba ka long mynta, ïa kane ka Sorkar, yn nym don ba lah ban pynkhih namar ki MLA na kitei ki Regional Party kidang kyrshan.Nalor kata, la don ruh ki MLA jong ki kiba la ioh long Myntri.
Ngi ïohi ba tang shu shimti katei ka Sorkar khleh-khaw-lang ne ka Coalition Government, ka la pyni ïa ka jingtrei kam jong ka kum ïa ki surok, ka jinglehkhuid ïa ki lynti ki synkien bad ïa ka mariang, ka um bam um dih kum ban shu jer kyrteng khyndiat. Ki Myntri jongka, ki la leh ia la ki kamram jong ki. Dangbun kiwei kiwei ki kam, kumba ngi tip bad ïohi kaba kane ka Sorkar ka dei ban leh. Lahruh ban ong, ba ki skhim ka la don lypa naduh ka Sorkar Congress, kaba kane ka Sorkar ka hap ban pyndep kaba la ieh daka Sorkar barim.Tangba kaba dei ban ai ka jingïaroh ka long ba kane ka Sorkar ka la sdang ban leh da ki kam. Ngi dang ia khmih lynti haduh katno kane ka Sorkar kan lah ban leh bha, ban wanrah ïa ka jingroi jingsan jingkiew shaphrang kumba kane ka Jylla kadei ban long ha kine ki sngi, kibnai bad snem ban wan.
Ngim lah ban shu khmih lynti noh mynta mynta dang kumba 7 bnai eiei ha u lakam.Ngi u paidbah ruh, ngi peit bad puson da ka jingtipbriew, kumki ‘riewrangbah bad longkmie,ym ba ngin shu bam jakhluit bad kwah noh hi mynta mynta ïa kiei kiei baroh. Don kapor ia kiei kiei baroh – naduh ka pisa, ki diengpynkiang ne ki jingehhar-rukom kaba kumka Sorkar ka ïakynduh. Hynrei ngi ngeit bad kyrmen ba kumba u paidbah u la jied ïa kiNongmihkhmat ban longki ‘rangkynih ‘rangphawar ha ka Sorkar ban synshar, khlem pep, ki kam kin iaid shakhmat. Ki MLA opposition ruhkidei ban ïa treilang. Ki dei ban trei hok khamtam ban nym leh klop ne bamsap haki kam bad pisa paidbah. Yn don ki Nongmihkhmat-shim-kabu ne ki Seng ne ki Party-kwah-rhah ne kiba bishni ki ba kwah ban pynpra pynkhyllem ïa kane ka Sorkar jong u Conrad K. Sangma. Ngin hap ban ai lad ïa kane ka Sorkar NPP ba kan synshar bad kan neh haduh bakut ka samoi ne ka term treikam jong ka haduh 5 snem. Hangta, ngin sa ïohi ïa u soh, la, la dei ban jied noh da kawei pat ka Seng Saiñ Hima Sima ban synshar ïa kane ka Jylla Meghalaya.
Kumba kitei ki Party Riewlum ki la ai ka jingkyrshan, ai kanneh haduh ba kut. Haoid, kiba bun kikam, katba ngi ïohi, la jan man la ka sngi na ki Kotkhubor, ïa ki jingdonkam ban pynbeit bad pynïaid shaphrang kum ka jingïakajia khappud bad ka Assam, ki jingeh ki nongrep kiba bsa ïaka Jylla, ki lynti synkien, ka jingkiewdor ki mar bam mar dih bad kiweikiwei. Hynrei lada kine kiba pynkheiñ noh ïa ka jubanlak jongki, ki weng noh na kane ka Sorkar, kumno ka Sorkar kan pynïaid ïa ki kam sha khmat. Kin sahkut lut ki kam ki jam bad ïano ngin kynnoh. Bun ki kam ne ki ishu kiba kane ka Sorkar ka hap ban leh nangne shakhmat, ngi tip bad ïohi ïa kata kum ki nongshong shnong bad ka jaitbynriew.
Kaba kongsan eh kadei ba kitei ki Party Riewlum kidei ban ïaineh ha kane ka National Party kaba ïalam ïaka jingsynshar. La dei ban ai jingmut ba kim dei ban pynkhih jingmut shane shatai, da ka jingbeh ka lyer ban pynthut ïa kane ka Sorkar. La dei pynban ba kiba ïa synrop, kin ïa treilang, ïa dei jingmut bad ïa tylli, wat la ki ïa pher ka Party jong ki, naka bynta ka jingroi jingsan jong ka jaitbynriew bad ka jingkiew shaphrang ha ki liang baroh.Lada khyllem kane ka Sorkar, shano ka Jylla jongngi kan poi? Katba kadei ban kiew shaphrang nang patan pynban shadien. Shano ngin ïapoi. Ngi hap ban ïapuson bad pyrkhat jylliewbha bad ai lad ïa kane ka Sorkar kan synshar.