Press "Enter" to skip to content

Da ka Resolution yn rah ha Ïing Dorbar ban pynrung kyntien ‘United’ ha KHADC

Shillong, Naiwieng 08 : Ka Executive Committee jong ka KHADC ha ka sngi Palei ka la rai ban wanrah da ka Resolution ha ka Dorbar Tlang kaban sdang naduh ka 20 tarik ban pynrung biang ïa ka ktien ‘United’ ha ka kyntien Khasi Hills Autonomous District Council, khnang ban pynneh ïa ka jinglong kyrpang jong ka Council kumba la tip naduh mynshwa kum ka United Khasi – Jaiñtia Hills Autonomous Distric Council kumba ka la ju don naduh ki phew snem mynshwa.
“Ngin wanrah noh da ka Resolution haba ïadei bad ka kyrteng KHADC namar hadien ba ngi la ïoh ïa ka jinglaitluid bad ba ka Riti Synshar ka la treikam la thaw ïa ka United Khasi – Jaiñtia Hills Autonomous Distric Council da kaba pyndait lang ïa ka Khasi bad Jaiñtia distrik kaba mut ki British areas,” ong u Chief Executive Member ka KHADC, Bah HS Shylla haba kren bad ki lad pathai khubor.
U la ïathuh ruh ba katei ka United K-JHADC ka pyndait lang ïa ki 25 tylli ki Khasi States hynrei hadien pat la phiah noh ïa ka Jaiñtia Hills bad ai kyrteng da ka Jaiñtia Hills Autonomous District Council (JHADC) bad ïa ka jongngi pat la ai kyrteng da ka KHADC. “Kumta, hangne ka don ka jingbakla. Ka dang dei ban sah ka United Khasi – Jaiñtia Hills Autonomous Distric Council, namar ka dang dei hi ban neh ka kyntien ‘United’ namar ka pyntylli ïa ki 25 tylli ki Khasi States bad ki British Areas kum ka Laitlyngkot, Marbisu, Nongpoh bad kumjuh ki Sirdarship kiba bun kidei ki British Area ba hap ha Khasi – Jaiñtia District namar la weng tang shiteng ïa kiba hap ha ka Jaiñtia Hills.”
Na ka liang u CEM u ong ruh ba ka long kaba donkam ban pynneh ïa katei, khnang ba ki longdien bad kito kiba wad bniah kin tip ba ki don haduh 25 tylli ki Khasi States kiba donbor bha, bad ruh ba kin tip halor ka jingmih jong ka JHADC bad GHADC. “Hynrei lyngba ka United Khasi – Jaiñtia Hills Autonomous District Council kin lap ïa ka jinglong kyrpang bad ka don ruh ka hok kyrpang kum ki Khasi States. Hap ban pynneh ïa kane namar wat ka Supreme Court ruh ka pynmih ïa ka ktien Khasi States,” la bynrap biang u CEM.
Ha kajuh ka por u la ïathuh ba ha katei ka Dorbar kin wanrah ruh ïa ka Clan Bill kaba ïadei bad ki Dorbar Kur.
La pyntip ruh ba ka Council ka thmu ban wanrah bad thaw noh la ka jong ka AD Rules, namar haduh mynta hi ki dang pyndonkam ïa ka AD Rules jong ka Assam-Meghalaya. “Hynrei mynta ngi la thaw noh la ka jong ka AD Rules jong ka KHADC, kaba mut ba man la ki District Council kin don noh la ka jong ka AD Rules,” u la ong da kaba bynrap ba ïa ka AD Rules jong ka Assam ngim lah ban pynkylla hynrei donkam ban don la ka jong.
U la ïathuh ruh ba 15tarik ki lai tylli ki Autonomous District Council kin don ka jingïalang bad u Myntri ka tnad DCA ban ïa kren halor katei ka bynta. U la ong ruh ba lada don noh la ka jong ka AD Rules, kaba nyngkong ka long halor ka rukom pynkhyllem bad thaw Executive Committee ba thymmai ha District Council.
La ïathuh ruh ba tad haduh mynta, donkam 16 ngut ki MDC ban pynkhyllem ïa ka EC hynrei ban khot pat ïa ka Dorbar Kyrpang donkam ban ïoh ïa ka jingsoi jong ki 20 ngut ki MDC. “Kumta kane kam ïahap satia, namar lada don haduh 16 ngut ki MDC kiba kwah ban weng noh ïa ka EC, kadei ka kam u Chairman ban khot noh ïa ka dorbar kyrpang ban don ka jingtynjuh bor khlem da donkam shuh ban leit shaduh ka sorkar,” u la bynrap biang.