Press "Enter" to skip to content

Don ka jingleh shilliang khmat haba ïadei bad ka jingjied ïa ki nongïalehkai kriket ha ka jylla

La pynrung beaiñ ïa arngut ki nongïalehkai bar jylla haka Ranji Trophy

Shillong, Naiwieng 8: Hadien ba ka jylla Megha-laya ka la ïoh ba kan ïakhun ha ka Vijay Hazare khamtam lei lei ha ka Ranji Trophy (plate goup), ka kynhun ki samla trai jylla, ba im sngi bad minot ha ka jingïalehkai kriket da kaba mih khmat ïa ki klob ne ki ïa ki shnong, ha ka Shillong Cricket League (First bad Super Division) bad ha ki lympung ba long ha kiwei pat ki distrik jong ka jylla, ki la kynnoh ba ka la don ka dak leh shilliang khmat haba ïadei bad ka jingjied ïa ki khynnah ïalehkai kriket.
Ka kynhun ki nong-ïalehkai kiba la kyrpad ban burieh ïa ka kyrteng ka jong ki na ka daw ïoh ba ki shah sospon ne pynshitom ha ki bor ba dei khmih ka SCA ne MCA, ki kynnoh ba ha kaba sdang kim shym la bna ne tip eiei lyngba ki lad pathai khubor haba ïadei bad ka prokram ban jied ïa ki nongïalehkai.
Ka khubor jingbym tip ka la par ruh wat sha ki distrik kiba don ha ka jylla, ha kaba la kynnoh ba ki samla ka ki distrik kim shym la ïoh ïa ka lad ban wan sha ka prokram jingpyrshang, ha ka por ba la pynlong ïa ka prokram ban jied ïa ki nongïalehkai naka bynta ban ïoh mih khmat ïa ka jylla.
Nalor kata, ka la don ruh ka jingkynnoh ba ka sur leh shilliang khmat ka la wan ba kan mih paw bha khatam lei lei ki khynnah ba dei na kane ka jylla. Haba ïa nujor bad man la ki kynhun ïalehkai ba la mih ban ïakhun ïa ka jylla, ka jingdon ki khynnah Khasi ha ki kynhun ïalehkai ka U-16, U-19 bad U-23 ka long tang uwei.
Kaba pynkyndit ïa ki nongïalehkai kriket ka jylla, ka dei ïa ka thup ïalehkai ka U-19, wat haba la dep ban shah jied ha ka jingpyrshang kaba nyngkong, ki khlem ïoh jingtip eiei shuh shaphang ka jingpyrshang kaba ar bad kumta ter ter, ïa kaba kum kane ka juh ka jingjied ka la mih paw ha ka kyrdan ïalehkai jong ka U-16.
Kaba pyndiaw bad bynñiaw ïa ki nongïalehkai trai ri trai muluk ka long ba na sha lyndet, ka don pynban ka jingpyrshang ban pyn-rung jubor da ki nongïalehkai bym dei syndon na kane ka jylla.
Ki nongïalehkai ïa kaba la kynnoh ba la pynrung jubor ïa ki sha ka kynhun ïalehkai ka kynthup ïa u Raj Biswa, namar kat kum ba la ïohlum jingtip da ki nong-ïalehkai na kane ka jylla, u Raj baroh shi katta ki snem u la kynriah noh ïalade ban ïalehkai sha Tripura, hynrei dei ha ki khyllipmat ba ka Meghalaya ka la ïoh ba kan ïakhun ha ka Ranji Trophy, la kynnoh ba u Raj u la wanphai biang sha ka jylla bad ban da ïoh ïa ka lad ban shah jied naka bynta ban mihhmat ïa ka jylla, namar la kynnoh ba ka MCA ka la pan jingbit (no objection certificate) na ka jylla Tripura.
Sa uwei pat u nong ïalehkai ba la kynnoh ba la shu pynrung jubor ïa u ha ka kynhun ïalehkai dei u Abhay Negi bad ba la kynnoh ba um pat juh ïalehkai ne mihkhmat ïa ki kynhun ne klob ba ïalehkai ha ki lympung ïalehkai kriket ba la long ha ka jylla.
Kat kum ka jingwad bniah da ki nongïalehkai ka jylla, ki la lap bad shem ba u Negu u dei napoh ka jylla Uttrakhand bad pule ha ka skul bah Jamia Islamia.
Sa uwei u nongïalehkai ba la kynnoh ba la shu pynrung jubor ïa u ha ka kynhun ïalehkai ba mynta ka jylla dei u Chaman Pushp ba dei napoh Secunderabad, kaba ka kyrteng ka jong u ka ka la rung ha ka thup pyllait ba khatduh ïa ki kyrteng jong ki pleïar naka bynta ban mih khmat ïa ka jylla.
Pynban hadien ba la lap pat ba une u nongïalehkai um shim la lah satia ban pynbiang ïa ki kot ki sla, kumta ki bor pynïaid ki la weng noh ïa ka kyrteng ka jong u na kane ka thup.
“Imat lada jia ba u Chaman u lah ban pynbiang ïa ki kot ki sla, ka kyrteng ka jong u kan jin da la neh pura ha ka thup ïa lehkai jong ka kynhun, da kaba khlem pyrkhat ïa ki trai jylla kiba don ka hok ban ïoh ïadon bynta ha ka kynhun” la pynpaw ki nongïalehkai kriket bym shym la shah jied mynta ka kynti ha ka Vijay Hazare ne Ranji Trophy ne kiwei kiwei ki lympung.