Press "Enter" to skip to content

Hadien 2 bnai, leit phai ïing ki nong Huhuapara

Nongstoiñ, Naiwieng 8: Hadien 2 bnai jong ka jingphet rieh na ki pulit Assam bad sah ha Christ King School Malangkona, ki paidbah nongshong shnong naduh ki tymmen ki kro, ki longkmie longkpa, ki samla bad ki heprit, ki la leit phai noh sha la shnong bad ki la poi ha ka shiteng sngi jong ka sngi thohdieng ha ka taiew ba la dep. Shwa ban mih na Christ King Skul, la pynlong ruh ka jingduwai ba u Blei un ri un sumar ïa ki.
Ïa kane ka khubor la pyntip da u Sordar Shnong Huhuapara Bah Jedick Sangma lyngba ka phone, u ba la ïathuh ba ha ka sngi thohdieng jong ka taiew ba la dep ki paidbah nongshong shnong ki la poi sha la ki ïing ki sem ba ki shong ki sah. Hynrei ha ka sngi u Blei, ka kynhun jong ki pulit Assam ki la wan ban pyni bor biang hapoh shnong bad knieh ïa ki tiar ki tar jong ki riew paidbah.
U la ong ba ha ka sngi saitjaiñ, la khreh ruh ban sdang ban trei ban ktah ban pyntrei noh khamtam ïa ka muri um ha ka surok ka ban pynpoi sha ka kshaid Chongadre. Ïa katei ka skhim la mang pisa lyngba ka MNREGS jong ka Mawshynrut Block West Khasi Hills.
Hynrei ki pulit Assam mar shu ïoh jingtip ba ki paidbah jong ka shnong Huhuapara ki la leit phai sha shnong, ha ka sngi u Blei ki la wan biang sha katei ka shnong bad ki la khynra ïa ka shnong baroh kawei na ka bynta ban kem ïa ki nongïalam shnong.
Ha katei ka jingkhynra jong ki, la ong ba ki la lap hynriew phew byrni ka dewbilat, saw kwintal u nar rod na kawei ka ïing ba ka shnong ka la buh bad pynkhreh ban shna ïa katei ka muri um. Nalorkata ki la lap ruh ïa u shyiap bad mawria ha katei ka jaka ba thmu ban shna. Ïa kine ki tiar baroh ki tar baroh, kitei ki pulit Assam ki la rong tuh noh bad rah sha jaka ba ki wan.
Kane ka jingleh jong ki pulit Assam, ka la pyntieng lut ïa baroh bad la ïathuh ba ki riew rangbah ka shnong khamtam eh kito kiba kham long ha khmat ha ka kam shnong kam thaw, kim pat nud satia ban sah miet ha ïng ha sem bad ki khun ki kti namar haduh mynta ki dang don hapdeng ka jingsyier.
Halor kane ka jingjia, na ka liang ki nongïalam ka Federation of Khasi Jaiñtia & Garo People (FKJGP) Langdongdai Area Unit bad Mawshynrut Circle ki la pynrem jur halor katei ka jingleh riewkhlaw jong ki pulit Assam bad ki la dawa ba ka sorkar MDA ka dei ban shimkhia halor katei ka jingjia. Lym kumta na ka liang ka seng kan leh da kaba tyngeh.