Press "Enter" to skip to content

Hato dang don aiñ dang don kanun ha Ri Lum Jaiñtia???

Jowai, Naiwieng 08: Ka jingshah pyniap dusmon u wei nongïalam sengbhalang bad ka jingshah thombor jong kawei nongïalam sengbhalang ka Kong Agnes Kharshïing kala wanrah ïa ka mynsiem jong ka jingshongsyier ïaki nongshong shnong jong ka Rilum Jaiñtia bad ki paidbah kila buh jingkylli hato dang don aiñ dang don kanun ne em?
Kine ki artylli ki jingjia ki pynpaw ïa ki dak ki shin ba ïa kino kino ki briew kiba kren ne ieng ïa ka hok ka jingshisha ne kren pyrshah yn sa shah pyniap ne shah thombor dusmon khnang ba kin sngap jar noh. Bad lada kane ka ïai jia long khlem pep ka Rilum Jaiñtia kan sa long ka thain kaba khlem aiñ khlem kanun haba kiba khlain bor bad kiba heh spah kin synshar katba mon bad ñion beiñ ia kiba duk ba rangli.
Kumba yn shu pynkynmaw ha ka 19 tarik u Bnai Lber mynta u snem, u Bah (L) Poipynhun Majaw uba long u President jong ka Seng Jaiñtia Youth Federation (JYF) u la shah pyniap dusmon ha ki riewthrang snam ha thain Khliehriat na ki daw ki bym tip satia haduh mynta mynne. Kaba sngewsih ka long ba haduh mynta ki pulit ne ka tnat Criminal Investigation Department (CID) kim pat lap satia mano ba pyniap ïa u Bah Majaw.
Hynrei haba phaidien ïa ki mat treikam jong u Bah Majaw u la long u briew u ba kren pyrshah ïa ki kompani cement na ka bynta ka jingpynjulor ka mei mariang bad kiwei kiwei ki ishu kiba ktah ïa ka jaidbynriew. Lehse na ka daw jong ka jingpyrshah jong u ki briew ki bym sngewtynnad satia ki la jied da ka lynti kaba tyngeh bad pynsngap jar noh ïa u shirta.
Mynta ka sngi, ki riew thrang snam kiba suba jur ba ki dei ki nongshalan tuh ïa u dewiong ki la nud ban shim ïa ka aiñ ha la ka kti da kaba thombor bad shoh dusmon ïa ka Kong Agnes Kharshïing President jong ka CSWO bad ka Anita Sangma ka dkhot jong ka CSWO ha Tuber Shohshrieh na ka daw jong ka jingpyrshah jong kane ka kam beaiñ kaba la khang da ka Supreme Court jong ka Ri India. Hynrei ka jingkhang shalan dewiong da ka Supreme Court of India kam shym la treikam pura na ki daw kiba bun.
Ha kawei pat ka liang ha 15 tarik u bnai Risaw, ki pulit jong ka West Jaiñtia Hills District kiba kynthup Ia u Bah P Syiem Additional SP, ka Kong Queenie Fancon Assistant Commandant ka SF-10, Sub Inspector Romit Syngkon bad kiwei de ki pulit ki la mynsaw jur hadien ba ki la shah thombor haduh ba kin da mynsaw jur ha ki shibynta ki riew ngeit Hindu ha Durga Temple Nartiang. Hynrei mynta lajan shibnai, ki pulit kim pat shym la kem satia ïa ki briew kiba don kti ha katei ka jingthombor kaba la jan shim wat ïa ka jingim jong kitei ki pulit.
Haba ïakren ba katto katne ki riew paidbah jong ka Nongbah Jowai ki la pynpaw ïa ka jingshongsyier jong ki namar ki riew bymman ne ki riew thrang snam ki nud ban shim ïa ka ain ka kanun ha la kti ban pynsngap jar junom ne shoh pynmynsaw ïa kino kino ki briew kiba kren ne ieng ïa ka hok ka jingshisha ne kren ïa kaei kaei kaba long pyrshah ïa ki.
“Kane ka long ka jingsdang jong ka jingkut lada ka sorkar jylla kam hukum tyngeh ïa ki bor pyniaid aiñ ban leh da kaba tyngeh ïa ki riewthrang snam bad pynshitom ruh ïa ki pulit kiba bam sap bam pisa na ki riew heh spah, ” ong u wei u riew tymmen.