Press "Enter" to skip to content

Kaei ka jingnoh synñiang ki ‘political appointee’ ïa ka jylla?

Kawei ka sorkar ka leit bad kaweI ka sorkar ka wan khlem da ñiew la kadei ka sorkar Congress ne sorkar synrop ba ïalam da ka NPP, tangba ka rukom treikam ka long beit kumjuh khlem da ïapher than eh khamtam lei lei haba ïadei bad ka jingthung ïa ki MLA, MDC kumjuh ïa ki politishan ba la rem elekshon kumjuh ruh ïa ki kiwei kiwei kiba don jingïadei bad ka party ba don ha ka bor synshar, kum kita ki political appointee. Hynrei ka jingkylli kaba mih mynta ka long haduh katno kitei ki ‘political appointee’ ki la noh synñiang na ka bynta ban kyntiew ïa ka roi ka par ha ka jylla.
Katkum ki jingtip ba la ïoh lum la kdew ba ka sorkar ka pynlut da ki phew lak tyngka shibnai tang ban siew ïa ka tulop jong ki khlem da buddien pat kaei ka jingnoh synñiang jong ki kum kita ki Chairman, Vice Chairman bad co-chairman ha ki Board bad Corporation bapher bapher kiba don ha ka jylla.
Man la ka por ka ju mih beit ka jingdawa na ki seng saiñ pyrthei ba dei ban pynduna noh ïa ka jingthung Chairman, Vice Chairman bad Dy Chairman nalor ban pynduna ruh ïa ka jingleit shang khlem phoida jong ki Myntri bad ki Ophisar khnang ba kan ym ktah than ïa ka pla tyngka ba la sdang ring tyrkhong jong ka sorkar jylla hynrei dei kito kiba dawa ha kito ki por kiba leh hi pat ïa katei ka kam ynda ki la don ha ka bor. Ka la dei ka bynta ïa kito ki kynhun kiba ju pyrta ba ki trei ban kyntiew ïa ka roi ka par ban buddien ruh halor katei ka jingthung ïa ki MLA, MDC bad ki briew ba la rem ha ka elekshon ne ki nongïalam party ba kaei ka kam kaba ki leh naduh ba ki shah jied ban long kum kita ki chairman, vice chairman ne co-chairman ha ki jaka treikam bapher bapher ne ki la shu sei suk tang ka tulop bad kiwei kiwei ki jingïoh ba la mang kyrpang na ka bynta jong ki khlem da trei.
Ki jingïoh ba harukom ba ju ai ïa kum kitei ki political appointee bunsien ki pynjawdud khamtam eh naba ka jingsiew ka kham ïapher katkum ki dak ba la pynngat ïa ki, kata kum ha ki kyrdan A+, AA, A, B bad C. Don napdeng kitei ki kyrdan kiba ïoh ïa ka jingmyntoi ne jingsiew thik la kumba ïoh ki myntri ba don ha ka sorkar. Ka don ruh ka jingong ba kito kiba ngat ha ka kyrdan ‘AA’ kidei kiba la mang tang na ka bynta u Chairman jong ka State Planning Board, kaba ka jingïoh ka long da ki phew phew hajar shi bnai, bud pat sa kiwei kiwei ki jingïoh ba harukom kynthup ïaka bai sumar, bai phone, bai leit bai wan bad kiwei kiwei. Hynrei lada phai ha katei ka bynta, ka State Planning Board pat ka da pyni ïa ka jingtreikam jong ka khamtam ban peit ïa ka roi ka pa bad ka jingsahdien jong ka jylla.
Ki don bun ki board ne corporation kiba ka sorkar ka thung kum ki chairman, vice chairman ne co-chairman kiba ym lah satia ba jer kyrteng kiba ym pat ju kham ïohsngew ba kin shong jingïalang ne don ka jingïalang pyrkhat kam ban pyrkhat ïa ki sienjam ban kyntiew ïa ka rukom treikam ha ka jylla ne ban kyntiew ïa ka roi ka par hynrei imat ha kaba kut ïa ka kam baroh la hap ban pyndep hi da ka sorkar. Kham ñiar ruh ban ïohsngew ïa kitei ki ‘political appointee’ kin leit kum ki kongsan ha ki jingïalang lait noh tang katto katne, kiba la ju mlien ban leit ha ka por ba ki dang long MLA, MDC ne nongïalam paidbah.
Ka por ka la dei ïa ki paidbah mynta ban buh jingkylli ïa ka sorkar ba kaei ka jingmyntoi ba ka ïoh na kaba thung ïa kitei ki briew kum ki chairman, vice chairman ne co-chairman ha ka sorkar bad lada ka jubab kadei ‘EM’ , ka la dei mardor ban weng noh lut ïa ki bad ba ïa ka tulop ba ju siew sha ki dei ban siew noh sha ki nonghikai ne ban kyntiew pynban ïa ka rep ka riang, ka ri jingri ha ka jylla khnang ba ka Meghalaya kan kiew ym tang ha ka jingdon ki political appointeee hynrei ban kiew ruh ha ka ïoh ka kot ha baroh ki liang.