Press "Enter" to skip to content

Kyrshan pura ki nongrep ka thaiñ Nongspung ïa ka jingdawa ka HFU, ai khublei ïa u Myntri

Shillong, Naiwieng: Ki nongrep na ka thaiñ Nongspung hadien ba kila ïoh ban wan sha ka jingïalang bala khot pynlong da ka seng jong ki nongrep ka Hill Farmer’s Union (HFU), kila ïoh sngew ruh da la ki jong ki shkor ïa ka jingthmu bad ki mat treikam jong kane ka seng ha kaba kila kubur ba kadei ka sien kaba nyngkong eh ïa ki nongrep ka thaiñ ba kin ïoh ban wan sha ka jingïalang jong ki nongrep ba la wan ïashim bynta da ki nongrep na kylleng kylleng ki jaka.
Na ka liang kitei ki nongrep ka thain Nongspung lyngba une u kyrwoh kila pynpaw ruh ba kan long ka sngi sah kynmaw na ka bynta jong ki halor ka jingïalang kaba la pynlong hapoh Khasi National Durbar Hall, Mawkhar Shillong, ha ka 5 tarik mynta u bnai.
Kumta ruh na ka liang kine ki paid nongrep ki ai ka jingkyrshan kaba pura ïa katei ka seng HFU halor ka jingïakhun ïa ka jingshah ot kilo bad ruh ia kiwei kiwei ki mat kiba ka seng kala dawa na ka sorkar.
Ha kajuh ka por ki ai ruh ka jingkitbok kitrwiang ïa ki nongïalam jong ka seng ba kin ïalam ïa u paid nongrep ka jylla da ka jingshem phang ba kin ïaid sha phrang khlem jingsheptieng namar baroh ki nongrep ki don ryngkat lang.
Shuh shuh na ka liang kine ki nongrep ka thaiñ kila ai ruh ka jingkhublei kyrpang ïa u Myntri ba dei khmih ïa ka rep ka riang u Bah Banteidor Lyngdoh halor ka jingshim khia ka jong u ïala ka kamram kum u Myntri uba la leit hiar da lade bad iuhkjat hi haduh ïew die lang, Iewduh ha ryngkat ka jingïadon lang jong u CEM ka KHADC u Bah HS Shylla, u Acting Syiem ka Hima Mylliem, u Paiem Ainam Syiem, ki Myntri lem bad ki ophis ka tnad ka rep ka riang ha ka step jong ka 6 tarik Naiwieng 2018.
Kumta na ka liang ki paid nongrep ki ai ka jingkhublei bad kitbok kitrwiang ïa utei u myntri kumjuh ïa u Acting Syiem ka Hima Mylliem ba kin shim khia ïa ki mat kiba ïadei bad ki paid nongrep bad khnang ba ka jingot kilo ha ïewduh kan duh kan dam noh shisyndon.