Press "Enter" to skip to content

Plie ka DC ia ka jinghikai ba shi sngi ia ki nongrep

Mawkyrwat, Naiwieng 08: Ka kong I. Laloo, IAS, Deputy Commissioner, South West Khasi Hills District, Mawkyrwat ha ka workshop ba shisngi na ka bynta ki nongrep ha kaba ïadei bad ka Cattle Dairy Ranch ba la pynlong hapoh ka Multipurpose Hall DC’s Office Mawkyrwat ka la ai ka jingkyntu na ka bynta ki nongrep da kaba ong ba, “Ka jingïalong kawei ka long ka bor”.
Shuh shuh ha ka jingkren jong ka DC hynnin ka sngi ka la ong ba kane ka workshop kan long kum ka jinghikai, ha kaba ki nongrep kin lah ban ïaphylliew jingmut bad pynpaw ïa ki jingeh kiba ki shem khnang ba kin lah ban nangkyntiew shuh shuh ha kaba ïa dei bad ka kam rep.
Ka DC la ong ruh ba ka Jylla jong ngi khambun hi ka shaniah ha ki nongrep, kumta kum ki nongrep ki dei ban nang kyntiew shuh shuh ha ka ban pynmih ïa ki mar rep khnang ba ka Milk Revolution ïa kaba na ka liang ka District ka dang shu plie ka lah ban ai jingïarap na ka bynta ban nang kyntiew shuh shuh ïa ka ïoh ka kot ha kane ka District, da kaba ka la ban ruh ha kaba ïadei bad ka jingïalongkawei, ka jingïasngewthuh jingmut kiba long ki lad ban nang kyntiew sha ka thong ka jingjop.
U bah R. Kharbihkhiew, Block Development Officer, Mawkyrwat ha ka jingkren jong u, ula ong ba lyngba kane ka program ki nongrep kin tip ïa shibun kiei kiei kiba ïadei bad ka Cattle Dairy Ranch kaba ai jingmyntoi na ka bynta jong ki. Ula khot la wer ruh ba kin long kiba treishitom khnang ba kin poi sha ka thong bad ong ruh ba lyngba ka jingïatreilang jong ki nongrep kane ka projek kan long kawei na ki lad aikam aijam na ka bynta ki paidbah jong kane ka dong ka thaiñ.
Ha kane ka workshop ba shisngi ba la pynlong da ka office jong u District Animal Husband & Veterinary (DAH&V) la wan ban ïashimbynta da ki nongrep kiba na Mawmerang, Rangthong bad kiwei kiwei ki jaka kiba hap hapoh ka South West Khasi Hills District.
Kiba ai jingkren ki kynthup ïa u Dr. G.M.R.K. Marak, District Veterinary Officer, Mawkyrwat, Dr. J. Langstang, Joint Director, AH & Vety, Shillong, bah P. Kharbteng, Advisor, Umlyngka Primary Milk Co-opewrative Society, bah R. Mukhim, Senior Cooperative Officer, Sub Registrar Cooperative Societies, Mawkyrwat. La ïoh ka jingkren pdiang na u Dr. F.A. Sangma bad ka jingkren khublei na u Dr. J. Kongwang.