Press "Enter" to skip to content

Pynduh riti ka KHADC, kynnoh ka Kur Nongkhlaw Rngi

Shillong, Naiwieng, 08: U Myntri barim ka Kur Nongkhlaw Rngi, u la kynnoh ba ka Khasi Hills Autonomous District Council (KHADC) ka la pynduh ïa ka riti ka dustur jong ka Hima Mylliem da kaba thung ïa u Myntri bathymmai u bym dei na ka Kur Nongkhlaw Rngi.
Ka Khasi Hills Autonomous District Council (KHADC) mynta u snem ka la thung da u Bah Ïaineh Nongkhlaw hadien ba ladep weng ïa u Bah Jamphrang Nongkhlaw Rngi ha ka 3 tarik, Naiwieng, 2016.
U Bah Jamphrang Nongkhlaw ha ka jingïakren bad ki lad pathai khubor mynta ka sngi u la ong, “da ka jingbthah jong u Pa’iem Latho Manik Syiem, ka Dorbar Kur Nongkhlaw Rngi ka la jied ïa u Myntri mihteng bad ha ka 4 tarik, Kyllalyngkot, 2015 la jied ïa nga, u Jamphrang Nongkhlaw Rngi, ban long u Myntri mih teng na ka Kur Nongkhlaw Rngi kaba long kawei na ki kur jong u San Kur ka Raid Mylliem.”
“Hynrei tang hadien katto katne por, ka la mih pynban ka ujor na ki bym dei hok ban shimti ïa kane ka kam Myntri ha ka Kur Nongkhlaw Rngi. Hadien ba mih ka jingujor, ka District Council ka la pan jingpynshai na u Syiem,” ong u Bah Jamphrang bad bynrap, “wat hadien ba ladep pynshisha, pynban ki la ujor biang sha ka District Council.”
“Wat u Syiem Khynnah ka Hima Mylliem, u Pa’iem Dethwell Syiem uba shimti shipor ban pynïaid ïa ka Hima katba u Pa’iem Latho Manik Syiem u dang don hapdeng ka jingpang jingshitom, u la pynksan bad phah ruh da ka jingpynshai sha ka District Council ba ïa kane ka kam la pyndep (ban jied ïa u Bah Jamphrang Nongkhlaw Rngi) katkum ka riti ka dustur ba la ïoh ruh da ka jingthoh,” la bynrap une u Myntri barim ka Hima Mylliem.
“Wat u Pa’iem Ricky Nelson Syiem, uba la shimti kum u Acting Syiem ka Hima Mylliem ruh u la dep pynshai halor kane ka kam, hynrei ka District Council khlem da khot bishar ïa ki arliang mamla, ka la shu weng jubor ïa nga na ka kam Myntri,” u la ong.
U la ïathuh ruh hadien ba ka Dorbar Kur Nongkhlaw Rngi, ka ladep phah ïa ka apil sha ka KHADC ban bishar hok, ka District Council ka la bthah ïa u Pa’iem Ricky Nelson Syiem ban buh jingthoh na ki nongujor bad na ka Dorbar Kur Nongkhlaw Rngi bad u Acting Syiem u la pynshai sha ka KHADC ba dei ban thung biang ïa u Bah Jamphrang kum u Myntri.
“Kat kitei ki jingpynshai ka KHADC kam shym la sngap bad da ka bor ka la ïaid beit shakhmat. Kane ka pawshai ba ka District Council ka leh politik,” la kynnoh u Bah Jamphrang.
U la ïathuh ruh ba ha ka 10 tarik, Lber, 2017 ka Dorbar Raid Mylliem ka la phah da ka jingthoh halor ka jingpynshai na ka Dorbar u Sankur u Khatwei Kur bad na u Lyngdoh ka Raid Myllliem ba ki ithuh ïa u Myntri tang na ka Kur Nongkhlaw Rngi kat kumba la don ha ki thup jingthoh pateng.
“Hynrei kat kine ki jingpynshai, ka KHADC kam sngap satia ïa ka jingkyrpad jong ngi,” la kren bynñiaw u Bah Jamphrang bad bynrap, “ka Dorbar Kur Nongkhlaw Rngi ka sngewsih shibun ïa ka jingleh donbor jong ka District Council kaba long be-aiñ be-riti ban pynduh ïa ka riti dustur kat haduh ba kam sngap eiei shuh.”
“Balei phim (CEM ka KHADC) khot da ka hearing baroh arliang mamla ban ïasei ïa ki jingshisha baroh,” la ong u Bah Jamphrang.
Ha kaba ïadei bad ka jingdon bynta ka Kur Nongkhlaw Rngi ban pyndep ïa ka lehniam lehrukom hapoh ka Hima Mylliem, u Bah Jamphrang, u la ong, “ym tang ba ngi ïoh ban long ki Myntri hynrei ngi ïadon bynta ruh wat ban pyndep ïa ka niam ka rukom bad ïa ka riti ka dustur. Nga sngew ban ong ba ka District Council kumba ngi tip ka dei nongri nongsumar ïa ka riti ka dustur hynrei haba ka long kumne ka paw ba (ka KHADC) ka dei ka nongpynduh ïa ka riti ka dustur.”
“Ha ka 15 tarik, Jymmang, 2017 bad ha u bnai Jymmang, mynta u snem ka Dorbar Kur Nongkhlaw Rngi ka la phah ïa u Rangbah ban pyndep ïa ka lehniam lehrukom naduh Mawmarian shaduh Lumshyllong bad ban pynkut pat ha Ïewduh. Hynrei mynta pat ïa kaba sah shiteng ki ong ban aiti noh sha kiwei ban pyndep ïa kane ka jinglehniam. Kito kiba don bynta ban shimti ïa kane ka jinglehniam kin hap ban shimti hi ïa ka jingkitkhlieh namar ka Kur hi kam kitkhlieh lada jia eiei namar lada phi ïalehkai bad ka niam phin hap ban kitkhlieh hi,” la bynrap u Bah Jamphrang.
U ïathuh ba ka Dorbar Kur Nongkhlaw ka ladep mudui ruh da ka mukotduma ha ka Kashari jong ka District Council ban ïoh ïa ka jingbishar kaba hok.